Geehhoeemaá 11 - Biblía Axweesantá Hhohho' ar Mungú 2004

Lamabu'uusér tsár

¹ Hhartá daai kingiri aníng i haniís, aníng tiri báy, «Tláw, Doó Mungú qoomeeseek, nee kitangwduú ilahhooa, nee mukdá' baraadá' wa sluufmiís ku fát.

² Ala afeenidá' tsee/aá Doó Mungú i dirii' maweek, ma qoomeesaar. Asma afeenidá' kaa múk xoorduú i haniís. Nee inooín gixsár Mungú ka adarah ar ya'aaín slahheeri mibeeri tsiyáhh nee tsár.

³ Nee aníng lamabu'uuser'eé' ar tsár a ya/aáw. Inooín tari aarirín deelo kumuú wák nee tsiire tsár nee mibeeri lahhoó'. Inooín tsitay'ín a guniyadu.»

⁴ Lamabu'uuseerí tsár a xaaiidá' ta babay seitúni. Nee slám a tsaa'asoodá' tsár, tidá' sihhimiit dír geeraá Aakoó yaamuú wa ale.

⁵ Nee bar hee ngi slahh'eemisuú wa slaa', asla in baraá afer'ín wa ti'imít, nee wakuuser'ín tidá' gari /ák. Gawaá adoorihe, bar hee ngi slahh'eemisuú wa slaa', inós kun gaas ar adoorí.

⁶ Lamabu'uuseerí i hara'ayár koón ar doori ngiwa tsek, as tluwaay miwa tluúw qoomaadár aaru'uumar'ine. Nee slám i hara'ayár koná' ar ma'aay kiwa tseere tleehhi nee yaamu ngiwa muxiya' ar umuúqo muxtaaro ar qoomaadá' inooín ta slai.

⁷ Ala inooín lamabu'ungw'ín bar ngwa hhe'eesiyé', makiito'oodá' baraá bohóngw aa tsarere'eét daahh, iri sláqw nee inooín, nee inooín giri arbá/ giri tsú/.

⁸ Nee tu'uuín kiri geexáy baraá loohidár gixsár ur. Gixsadá' baraá qeeruuwo umuuwós ta babay Sodoma nee Misri. Nee slám gixsarí an tidá' Aakooín kwi kikií' gawaá msalaába.

⁹ Afiqoomár deelór tám nee tlaqto, muu tu'uuká' kiri didá' wa ara'ar. Mukwí amór i dahhi a baraá umuúqo mar'afto nee tlahhaywo nee tsifriro nee xooro. Nee mukwí ta ya/anká tu'uuín kiwa fooli.

¹⁰ Nee múk baraá yaamuú wa hoót i qwalalaa/ nee iri baraa/ as inooín, nee tiri kilooín ilahhooár i hanmisiyá'. Asma aaruuseerí tsár mukdá' baraá yaamuú wa hoót guna ló'wa daawitamís.

¹¹ Deeloorí tám nee tlaqi iwa waaráhh, qeeruú slafíngw koóm oo amór Mungú daáhh tu'udá' giri i dáh. Inooín tari sihhiít ar ya'aaín. Nee mukdá' xumiís tari ló'wa da'ayuut.

¹² Aluuwo aaruuseedá' tsár afór ur kari axaás ar gawaá dooraá daahh, giri beér, «Tsa/amaré' ay amoorí.» Tari tsa/án gawaá doori ar baraá huunkáy, qoomár wakuuser'ín iwa amor'íní xumis.

¹³ Qoomaadár kilae kunseeli niri hardát, bartá wák ar gixsa iri hú', baraá baduudá' mibaango awa gixsa. Múk kumér faanqw kuri tsuú/ nee kunseelidá'. Nee múk aa meet iri ló'wa da'ayuút, Munguú doori kuri xirfayeemiís.

¹⁴ Slahh'ámuú tsár aa waaraáhh. Ga/aaweek, slahh'amuú tám i lawee' ar gaanslaay.

Tarumbeétár faanqw

¹⁵ Malaykamoó faanqw tarumbeéta gari ufaáhh. Afór yaariir iri gawaá doorí wa ilawáts, iri ó', «Waawuti'iimár baraá yaamu daxta ar Aakoorén nee Kristowós. Nee inós a waawutmo ay alhhe'eesay wasle.»

¹⁶ Bariiseedá' mibeeri tsár nee tsiyáhh, tidá' dír geeraá Mungú wa iwiiwiit baraá kiteeraá aleesleemuuwo, tari tumbarara'amiít dír geeraá Mungú, Mungú kuri sluufmiís,

¹⁷ tari oín, «Atén kuúng u sluufmiisaán, Aakoó Munguú Aleesleemusmoó mura' sleémeero. Kuúng a kudá' dáw nee kudá' qaroó daadáw iimír aange sleeme. Asma kuúng aleesleemuuwók kudá' úr ugwa ót nee aga waawuti'iín.

¹⁸ Múk xoordu ina buúhh. Ala xarasleemaawók naa hardihiyé'. Nee slám qooma naa hardát ar múk aa qaatl kuwa sakwasleemuuti. Nee slám qooma naa hardát ar sagadiyuuseerók tidár aaruuse kawa bu'utuuínií haniisi, nee mukók kudá' hhohhó', tam mukdá' sleémeero kuúng u ilaiwawaá/, múk urén nee na/iiwo. Nee slám qooma naa hardát ar mukdá' yaamu gi hhititiím kuwa hhitin.»

¹⁹ Aluuwo Doó Mungú, kudá' gawaá doorí dirií' kuri gweér, nee sandakmooduú alqadór Mungú iri geehhoúy baraá do'ós wa ale. Mankari iri werere'eliín, afo kari axaás, kwarara/a iri kwarará/, kunseeli niri ti'ít nee tluwoó yaariír oo tlaa/e iri tluúw.