Geehhoeemaá 10 - Biblía Axweesantá Hhohho' ar Mungú 2004

Malaykamo nee Kitaábuú niiná

¹ Malaykamoó hatlá' nguri ár oo aleesleemuú koóm, i awdiit gawaá doorí wa ale, kwaa tsiitiís ar huunkáy. Nee gár gawaá sagós i dirii' a ga/alér tluwaay. Slám gitsee/awós a adór tsee/amá. Nee ya'aawós a adór uheemaá asla.

² Baraá dakose gár i kon a kitaábuú niiná oo taa gweér. Yaaeerós ar doó /iyáy gari qaás daanduú tlawi. Nee yaaér doó basáy gari qaás gawaá yaamaá kaahaará'.

³ Malaykamoowí iri tseé' ar afór ur adór aahhór diraangw. Nee qoomár iwa tseé', kududuhoó faanqw niri kududuhuút.

⁴ Qoomár kududuhoó faanqw iwa hhe'eés kududuhaywo, aníng ana slaá' /aymi'iidá' ngiwa gooiim. Afór dooraá daahh ana axaás, i kat, «Aymi'iisíng taa axweés nee kududuhoó faanqw dugnií qaaseek ki lú/, mi gooiimaar.»

⁵ Aluuwo malaykamoodá' naa ár, kudá' aa sihhiit gawaá daanduú tlawi, nee gawaá yaamaá kaahaará', inós dakós oo doó /iyáy guri gawaá doorí tleés.

⁶ Inós lo'o gari huúw ar Mungú kudá' slaáf tam ay alhhe'eesay wasle, Munguúdá' doori gaa tleehh, nee muruudá' baraadií diriia, kudá' yaamu gaa tleehh, nee muruudá' baraadií diriia, kudá' tlawi gaa tleehh, nee muruudá' baraadií diriia sleeme. Malaykamoodá' lo'o ngiwa huúw, iri oó', «Daxta qoomár daamaraangw aa fák.

⁷ Ala de'emaá malaykamooduú faanqw tarumbeétarós ngiwa ufahhan naaqór Mungú i bó/, tidá' taa alki/iít nee sagadiyuuseerós tidár aaruuse.»

⁸ Afoodá' aníng naa axaás gawaá doorí wa ale, iri amor'eé' axwés malé alé iri beér, «Tláw, kitaábuudá' niiná oo taa gweér taataahheek kudá' gawaá dákw malaykamoó i dirií', kudá' aa sihhiit gawaá daanduú tlawi nee gawaá yaamaá kaahaará'.»

⁹ Malaykamoodá' nguri i daqáw nguri báw, «Kitaábuusíng niiná haniisang.» Aníng iri báy, «Taataahheek, ku /ák. Inós i qarqaar baraá guruuwoge, ala baraá afkoge i nuqnuuq adór danú wa ale.»

¹⁰ Kitaábuudá' niiná nguri taataáhh gawaá dákw malaykamoodá' wa ale, nguri /aáy. Ala gawaá afkueene i nuqnuuq adór danú wa ale. /Aymaaro nguwa hhe'eés, iri qarqaruút baraá guruueene.

¹¹ Aluudae aníng tiri báy, «Gár kuúng tuwa hariím an malé aariín daanduú múk yaariire, nee daanduú xoordaá yaariire nee slám daanduú tsifrír yaariire nee waawitú yaariire.»