Geehhoeemaá 1 - Biblía Axweesantá Hhohho' ar Mungú 2004

¹ Gaarí a gár Mungú aa geehhoeés dír Yesu Kristo, as Yesu Kristo muruudá' hardáh ar gaanslaay nguwa laqan dír sagadiyuuseerós. Kristo malaykamoowós guri ya/aáw amór sagadiyusmoowós Yohane, as muruuwí nguwa dirós i laqan.

² Nee Yohane muruudá' sleémeero aa ár guri alki/iít. Inós axweesantá Mungú gari lamabu'ún, nee lamabu'úngw Yesu Kristo sleeme.

³ Heé amohhoó' a kudá' axweesantá aaru'uumarí ga soomuús. Nee múk amohhoó' a kudá' tidá' taa baraakií gooín ga axamiís nee gaa oh. Asma qooma aa naká/.

Intsihhiisantá amór múk krishaanáy oo baraá gixsadaá faanqw

⁴ Anuú Yohane muruuwí una gooiím amór múk kríshaanáy oo baraá gixsadaá faanqw awa baraá yaamaá Asia. Tsuuqa nee wayda kudá' amór Mungú dahhá' masók i dinkwa nee kuungá'. Inós an kudá' dáw, nee kudá' qaroó daadáw, nee kudá' hardáh. Nee slám tsuuqaaká' nee wayda amór i dahhiya' a amór qeeremoodá' faanqw, kudá' dír geeraá kitaangós oo aleesleemuú i diriiá'.

⁵ Nee amór i dahhiya' sleeme a amór Yesu Kristo. Inós an lamabu'usmoó inkihhím, nee slám inós an heé geera oo naa waaslee/ baraá múk aa qatli. Nee a waawutmoó waawitá sleémeero baraá yaamuwo. Inós atén tin slaa', nee tina gweér baraá lawaali'iimár tlakweemaá wa ale ar tseereerós.

⁶ Inós atén tina waawuti'iimár i sláy, tiri kaahamuusér Mungú wa qaás, as atén Mungú, Baabuúwós, kuwa sagadiyuusaan. Xirif nee aleesleemu i dirós ay alhhe'eesay wasle. Amin.

⁷ Qaytsiít, inós ni hardah ar baraá huunkáy. Umuúqo heewo guri ar ar ila', tam mukdá' inós gwa mutin sleeme guri ar. Nee muu sleémeero oo baraaká' yaamu iri /aa/amín ar gurhaami as inós. Eeít, adoorí an adoodá' tleehharuut. Amin.

⁸ Aakoó Mungú i kaahi, «Aníng an Alfa nee Omega, aníng an iimu/uungw nee alhhe'eesaay.» Aníng an kudá' qaroó dáw, kudá' daadáw, nee kudá' hardáh, kuduú Aleesleemusmoó mura' sleémeero.

Adór Kristo tira geehhoeés dír Yohane

⁹ Aníng a Yohane, hhiyaahúng, kudá' aa al dinku'uus nee kuungá' baraá slahh'amaayeero, nee baraá Waawuti'iima, nee baraá qiqtliingw baraá Yesuwo. Qoomarkaaro aníng ana hardáh baraá yaamaá kaahaar awa tla/ángw tlawi, awa ta bay Patmo, as a axweesantá Mungú ngiwa alki/iit nee Yesu nguwa lamabu'uum.

¹⁰ Bál Deelór Aakoowo Qeeru aníng ina i hardáh, afór ur ngiri axaás ar axwees aluueé' wa ale. Afoorí a adór afór tarumbeéta.

¹¹ Afoorí ina beér, «Gár kuúng ta aan gooiimeek baraá kitaábií alé, nee daqaní kay ya/áp amór múk kríshaanoó baraá gixsadaá faanqw, awa Efeso, nee Smirna, nee Pergamo, nee Tiatira, nee Sarde, nee Filadelfia, nee Laodikea.»

¹² Aníng niri warqáw as heedá' amor'eé' axweés nguwa ar. Nee qoomár niwa warqáw, kiteeraá faanqw awa tsaa'asór koomá' awa taa tleéhh ar sahaábu ina ár.

¹³ Nee baraá tla/ángw kiteeridá' tsaa'asór kooma'a, heeko una ár oo adór slaqsoó garmoó hee. Hiyoó naa dahaás aa hardáh ay baraá ya'a', nee himuú sahaábu gwaa gawaá da/eewawósií tseék.

¹⁴ Se'éngw sagós ku ló'wa /awák adór se'éngw bee/aangw, nee adór tlaa/aá tluwaay. Nee ilaawós i gwa/aatiyá' adór tsángw asltá wa ale.

¹⁵ Nee ya'aawós a adór muqslír sirdaa/aat, ar taa hamaatla hhe'eés ar baraá asla. Nee afoorós a adór ma'aá yaariir awa wa/amiimá' baraá wa/ángw i alé.

¹⁶ Nee baraá dakós oo doó /iyayhe i tsatse/uú faánqw kón, nee paángár afa xaraasl badu tsaraawo i baraá afkós wa ti'iimít. Slám gitsee/aawós i gwa/aatiyá' adór tsee/amuú qoomár siiree/i.

¹⁷ Aníng qoomár nguwa ár, niri huú' dír ya'aawós i alé adór heé aa gwaa'. Dakós oo doó /iyáy nguri qaás gawaaeé' alé, iri oó', «Ma da'ayuumitaar. Aníng a kuduú geera nee kuduú alhhe'eesaay,

¹⁸ kudá' slaáf. Aníng geeraawo ana gwaá', nee qaytsiít, hamí a slaáf ay alhhe'eesay wasle. Nee slám aníng gweermo a koóm ar gwa'ara nee ar baraá gi'i.

¹⁹ Gawaá adoorihe, muruudá' kuúng taa aán gooiimeek, kudá' dáw nee tam kudá' sangw hardáh sleeme.

²⁰ Lu/aaroó tsatse/uudá' faanqw, kudá' kuúng taa aán baraá dakw'eé' oo doó /iyáy, nee oo kiteeridá' faanqw awa sahaábu awa tsaa'asór koomá', gídaabárós a tí: Tsatse/uudá' faanqw a malaykér múk kríshaanáyduú baraá gixsadaá faanqw. Nee kiteeridá' faanqw awa tsaa'asór koomá' a múk kríshaanáyduú baraá gixsadaá faanqw.»