Galatia 6 - Biblía Axweesantá Hhohho' ar Mungú 2004

Ti alee/iimise'

¹ Hhaee'eé', hee bira huú' baraá tlakweemakaarí alé, kuungaásingá' awa Qeeru heé adoodá' gan'aasaak ar tsatsa'aareema. Ala kuungá' kilá' ti harmagahhe', kuungá' sleeme mutunduwa iiara'ár.

² Ti alee/iimise' umuúqo heewo huwár heewós ngi gagaari. Ala adoorí bara tlehhé', daqaní hara'ayár Kristo aga boo/esé'.

³ Hee bir baraá muunaáwós i kaahi, «Aníng a heé kilá',» ala laatí inós a heé kilaeeká, heé adoorí tin kilós al/agín.

⁴ Ala umuúqo heewo gadiyeérós ngi kilós alqaytsiti adór kar hhoohhoó', nee ngi kilós xui baraá muunaáwósí alé, ala mitiwa heé hatlár qoomeemeés.

⁵ Asma umuúqo heewo gár kuwa hariím aqo huwaarós gan kilós gagaar.

⁶ Umuúqo heé ta intsaahhatimisi axweesantá Munguhe, intsaahhatusmoowós ngu qay tidá' hho' sleémeerowo.

⁷ Miti kiloohúng al/agiimara'. Mungú ku niqaaqinká. Umuúqo gár hee i dahaasin, an tidá' i bu'un.

⁸ Asma tlehhema'aá hee a adór dahaasiingw. Ala hee baraá slafiingose gár aa dahaasín bar tidá' slaqwa i sla', gár i bu'un a gwa'ara. Ala gár aa dahaasín bar tidá' Qeeru i slai, gár i bu'un a slafíngw alhhe'eesay wásl.

⁹ Mawa slaaqataán hhooeema tlehhtuuwo. Bar aga mune sianiiká, bu'uungw u slawaán qooma bira xeér.

¹⁰ Gawaá adoorihe atén qoomaarí tawa baraaká' yaamuú i diriiaan, hhooeema ki tlehhiitaán dír muu sleémeerowo, ak alé dír kudá' haratlintaauuse.

Gurbu'úngw alhhe'eesaay nee intsihhiisani

¹¹ Ga/aawaagáy, gooirí ni gooiim ngina gooiím ar gooír uren ar dakw'eé' oo kilá'.

¹² Mukdá' sleémeero kuungá' nu harakeemiís as tunduwa al/utlin, inooín nun harakeemisiyá' as muu nguwa sla'atisiya'. Gár adoorí ngis tlehhiitiya' a wak kilós, as kahhó' mikiwa slahh'eemiís as msalaábár Kristo.

¹³ Asma tam mukwí al/utlór iinuús, inooín awa kilá' hara'aya ngi iialooeemisiaaká. Gár inooín i slaiya' a masók kuungá' tundun al/utlín as kahhó' inooín tiwa kilooín xirfayeemiisiya' as al/utlorhúng.

¹⁴ Ala aníng ti baloó xirfayeemiisaaká gawaá umuúqo gaaro, aqo har msalaábár Aakoorén Yesu Kristo. Gawaá msalaábarihe muu sleémeero kwa kikií' dir'eene, nee aníng taa kikií' dír muu sleémeerowo.

¹⁵ A gaarooká hee burkwa al/uútl, laqaá barnaxes kwa al/uutliiká, ala gár afhhamít a hee kuwa heé /abén tleehhi.

¹⁶ Mungú wayda ngu haniisi, nee gurtleemu, dír kudá' sleémeero naa ya/ane' kaangwí eeharto baraá slafingw'ine, tam dír múk Mungú sleémeerowo.

¹⁷ Iimír hamí aníng hee miwa sangw daawiitiís, asma aníng a mulkoó Yesú koóm gawaá slaqwte'eene.

¹⁸ Hhaee'eé', Tsuuqaá Aakoorén Yesu Kristo masók i dinkwa nee kuungá'. Amin.