Galatia 5 - Biblía Axweesantá Hhohho' ar Mungú 2004

Ma ki/aara' baraá lawaali'iima

¹ Kristo atén tina gweér baraá lawaali'iimaaro as atén tawa hootaan ar adór múk lawaaleerooká. Gawaá adoorihe sihhiité', ma ya/aamara' tunduwa malé tseegi baraá lawaali'iima.

² Iia qaasaak, anuú Paulo gár ni oo' a tí! Kuungá' burtunda al/utlín, Kristo gár nuwa bui i káhh.

³ Án /aymuuwí ngu malé inkií/ nee nguri gawdeés, umuúqo heewo oo taa al/uútl, gár kuwa hariím a hara'aya sleémeero gan boo/ees.

⁴ Kuungá' bar gan'amuú leelehhitá' ar hara'aya kawa eeharahada', kuungá' taa qaroó partlé' dír Kristowo, nee aga quutlé' dír gurtleemuú Munguhe.

⁵ Ala atén, harahhifoorén a Mungú ti gan'amií harafaar. Gaarí an gár ta daamaaramaan ar haratlintaao ar /uuruú Qeeruú Mungú.

⁶ Asma hee barnaxes i baraá Kristo Yesu, dirose al/utlo a gaarooká, laqaá tam kwa al/utliiká a gaarooká. Ala gár afhhamít a haratlintaao, tidá' ti laqaqaam ar sla'aari.

⁷ Kuungá' ana kumité' ar adór hhoo' baraá slafingwhúng oo Krishanu'uumaro. Ala heé kuungá' naa ilaa/ a heemá, tawa kumita', looeema kiwa iialooeemisa'?

⁸ Ala heé adoorí gaa tleehh a Munguheeká, kudá' kuungá' nu ateetiím.

⁹ Gadaádá' mikaáte ir sluufasluf tam ka niiná, aqo /aarmoó yangaariiír sleeme gu sluuftís.

¹⁰ Atén sleémeero a wak baraá Aakoowo. Gawaá adoorihe aníng kuungá' nu xurumitaaká, ala gár ni xuu' a tí, kuungá' sleeme axweesante'eé' tí a siaasia'aaká. Ala heedaádá' kuungá' nu sagaqwaareés, sakwasleemaarós ga sláy, inós tam heemahe.

¹¹ Ala hhaee'eé', án barnaxes kángw al/utlo un alki/iít tawa gár hariím, ala waáy, án misti slahh'eemiis? Ala án geeraawo bar kángw al/utlo un alki/iít adór ir hariín, geera alók heé dukuutsmo i slay i kaahh gawaá alki/ituueé' daanduú msalaábaro.

¹² Ala mukwí kuungá' nu tlaahhír i qamiím, alók masók tin kilooín tuu'utiyá'.

¹³ Ala kuungá', hhaee'eé', kuungá' tunduna ateét as tawa hota' ar amohhooa. Ala amohhooarhúng tisíng ma ar hootara' as ilatleerír slaqwa kawa eeharahada'. Ala ti sagadiyuse' ar sla'aari.

¹⁴ Asma hara'aya sleémeero kaa haragaás gawaá hara'ayaarí wák, tí kah, «Inslaawmoowók slaeek adór kuúng tir kilók sla'.»

¹⁵ Ala kuungá' miti a'aawara' tiwa kikihha' nee tiwa tlu'uunda', asma adoorí bara tlehhé', ti kiloohúng hhaamisá'.

Qeeru nee slaqwa

¹⁶ Ala gár án ni kah a tí, Qeeruú Mungú slafingwhúng ngu geerahaari, daqaní kuungá' nu aleesleemuú i haniis oo kángw slaqwa i sla' kuwa sia'.

¹⁷ Asma slaqwa kángw i ilatleerus a kudá' Qeeru i slaiiká, asma Qeeru nee slaqwa tin tlaampa'aamisiyá', tam kuungá' adoodá' ta sla'a' a aleesleera'aaká tleehhamooro.

¹⁸ Ala kuungá' Qeeru burnu geeraharahaar, daqaní kuungá' hara'aya nu sa waawuti'ii'iindaaká.

¹⁹ Tlehhma'aá slaqwa ki geehhoo', a kuká': Sli'ima, nee tlehhma'aá slasla/aren, nee tsaatu'uuma,

²⁰ nee slaqsa'aá mungui kiwa haratlintaati'i, nee da/ari, nee wakaari, nee gila, nee da/i, nee buhhta, nee fola, nee tlaahhi qamiingw, nee partlito,

²¹ nee tloomatloong, nee oonitime, nee hheehha, nee muruú hatlá' oo nee kwí slaqamiimís sleeme. Adoodá' naa qaroó geerií oó' dirhúngií alé, ngin malé oó', niwa kah, múk adoorí /imaamiís, waawuti'iimár Mungú ga baloó aaliiká.

²² Ala gár Qeeru i laqwaali baraá slafíngw heewo a sla'aari, nee qwala/, nee wayda, nee qitla, nee hhooeema, nee gurhhooa, nee inkihhimu,

²³ nee tsaeema, nee harqoomaay. Gawaá daanduú muruú adór kwihe hara'aya i káhh.

²⁴ Múk Kristo Yesu slaqooín gaa kikií' dinkwa nee sla'aarír tlakw ar slaqwa nee ilatleeri.

²⁵ Qeeru atén taa slafíngw i haniís, gawaá adoorihe hotangwrén Qeeru ngu geerahari.

²⁶ Atén xirif muwa leelehhiitaán tam atén tiri kiloorén giirimiisaán nee tari tloomatloomaán.