Galatia 4 - Biblía Axweesantá Hhohho' ar Mungú 2004

¹ Gár án ni kah a tí, aaliitmo qoomár tawa na/aay a dimbeheeká nee lawaalmoowo, tam mura' sleémeero a kose.

² Inós i dabaá múk urén nee múk saayuuse ay dír qoomaadá' baabá aa hara'ayín i bo/.

³ Tam atén sleeme qoomár tawa na/ii, atén a adór lawaale tawa baraá /uuruú aleesleemuudá' waawuti'ii'iím baraakaá yaamuwo.

⁴ Ala qooma iwa bó/, Mungú Garmaawós nguna ya/aáw, kuri laqwaál nee /ameeni, kuri laqwaál didár hara'aya i sa waawuti'ii'iin,

⁵ as kudá' sleémeero awa baraá lawaali'iimár hara'ayár i diriiá' ngiwa tu/i, as kahhó' atén tawa na/aá Mungú tleehhitaan.

⁶ Asma adoodá' kuungá' tawa na/iiwós, Mungú Qeeruú Garmaawós nguna baraá muneeréní ya/aáw, kudá' ateetiím, «Baabá, Baabá.»

⁷ Ala bar adoosíng kuúng daxta a lawaalmoowooká, ala kuúng a na/aay. Ala kuúng bar na/aay, kuúng a aaliitmo sleeme, oo taa aaliitmo tleéhh nee Mungú.

Paulo i daawimiit as haratlintaauuse

⁸ Qoomaadá' aáng kuungá' Mungú kuwa xui'iiká, kuungá' a lawaalér munguaá hatlá', ala inooín a munguiwooká.

⁹ Ala hám daxta kuungá' Mungú ugwa xué', laqaá an oo', hám daxta kuungá' Mungú naa xuú'. Kuungá' adór tara ki/é' a adoomá baraá /uuruú muruudá' liitlakwén nee oo /uuruú koomaaká? Asma gár kuungá' ta sla'a' a lawaali'iimár muruudá'.

¹⁰ Kuungá' kángw deelo nee slahheeri un ló' wa eeharahadá', nee qooma nee kureeri sleeme.

¹¹ Aníng aga da'ayuút kuungae. Aníng ngi slaá' gadiyér naa tleéhh as kuungá' a tawo.

¹² Hhaee'eé', án kuungá' nu harhheehhe'eés, kuungá' masók a adór aníng, asma aníng sleeme a adór kuungá'. Kuungá' gár tlaakw ar naa aníng i tlehhé' i káhh.

¹³ Kuungá' a insleerá' án Ya/abtór hho' gár ngisa alki/iít har geeraawo dirhunge a adoodá' niwa wananaa'.

¹⁴ Ala tam adoorihe án kuungá' iga waaqai'iiká laqaá aga xin'i'iiká as adoodá' aníng ni dirii'. Ala ina ilaoté' adór malaykamoó Mungú wa ale, nee adór Kristo Yesu inósuú kilá'.

¹⁵ Qwal/uuhúng kudá' úr oo qoomaadae ta koonda' i amá daxta? Asma aníng a insláw adór qoomaadae kuungá' tar ya/aandá' ilaahúng kiwa tu/uunda' bar geera in ya/aanda ngiwa aníngií hanisa'.

¹⁶ Ala hamí aníng aga wakusmo tleehhiíti asma looeema ngiwa dirhúngií alki/iít?

¹⁷ Mukqaáqá' gár i slai masók kuungá' tundun uuruux amor'ínií alé, ala gár adoorí kas slai ar hhoo' i káhh. Gár inooín ta slai masók kuungá' tundun paraatl dir'eene as inooín kuungá' kiwa eehada'.

¹⁸ A gár hhoo' muu kuungá' nuwa sa daawimiiti, tam qoomár aníng niwa kaahh, barnaxes a baraá muruú hhó'.

¹⁹ Laqwalor'eé', aníng a ló'wa slahhahhaá' as kuungá' nuwa malé laqwaal, ay dír Kristo i geehhoouy baraahúng wa ale.

²⁰ Gár án ni slaa' masók án a dinkwa nee kuungá' hamí, as axweesante'eé' ngiwa warqees ar adór hatlá'. Án kuungá' adór nu laaq a xuaaká.

Slaqsoó Hagari nee Sara

²¹ Kuungaásingá' awa hara'ayár sla'á' nuwa sa waawuti'ii'iin, án kuungá' nu yaahaás, kuungá' hara'aya gár i kat aga axasí'i?

²² Asma kaa gooín Abrahamu daaqaay ngu kon a tsár. Garmoó wák oo /ameenidár lawaalo'o nee oo hatlá' oo /ameenidár lawaalo'oorooká.

²³ Ala na/ayduú /ameenír lawaalo'o kuna laqwaál ar adoodár na/aá hatlá' kir laqwalaalin, ala na/ayduú /ameenír lawaalo'oorooká kuna laqwaál asma al'axweesantá Mungú tidá' aa geerií oó'.

²⁴ Muruuwí aa tleehharuut a slaqsaay. Asma /ameenaarí tsár a adór alqadaá tsár. Ar wák amór ni dahh a amór tloomár Sinai, nee na/aá i laqwaliin a lawaale. Tí an Hagari.

²⁵ Asma Hagari a adór tloomár Sinai, tidár baraá yaamaá Arabiárí dirii'. Inós a slaqás nee gixsár Yerusalemu, tír hamí. Asma inós nee na/iiwose i baraá lawaali'iimárí dirii'iyá'.

²⁶ Ala /ameenidár hatlá' an adór gixsár Yerusalemu tidár gawaá doorí dirii'. Inós an lawaalo'oorooká, nee an aayoorén.

²⁷ Asma kaa gooín, «Kiíng qwalaá/, kiídár kampeeri, kiídá' aga laqwaliká, tseé' ar afór ur, qwalaá/, kiídá' slahha'amaayér xwayla gaa tsaqiká. Asma na/aá /ameenidá' hhawaatuú koomaaká ki yaariir, ta tidá' hhawaatuú kooma.»

²⁸ Hám daxta, kuungá' hhaee'eé', kuungá' a adór Isaka, asma kuungá' a na/aá Mungú as al'axweesantós tidá' aa geerií oó'.

²⁹ Qoomaadae kudá' taa laqwaál ar /uuruú Qeeruú Mungú kuna slahh'eemiís nee kudá' taa laqwaál adór na/aá hatlá' wa ale. Nee adoorí an adoodá' tam hamí tleehharuut.

³⁰ Ala Gooi gár i kat a milá? I kat, «/Ameenirí ar lawaalo'o nee garmaawose guuseek. Asma garmoó lawaalo'o daqaari'iima ngi al'aaliaaká nee garmaaduú /ameenidár lawaalo'oorooká.»

³¹ Gawaá adoorihe, hhaee'eé', atén a na/aá /ameenidár lawaalo'oorooká.