Galatia 3 - Biblía Axweesantá Hhohho' ar Mungú 2004

Dabe laqaá haratlintaao

¹ Kuungaá múk Galatia a daktanár kilá'. Heé kuungá' naa da/arin a heemá? Adór Yesu Kristo kura kikií' kuungá' aga axasé' ar adór geehhoo'.

² Aníng gár wák a xu'utír wa slaá', kuungá' Qeeru una ilaaoti'i as hara'aya kawa eehadé', laqaá as Ya/abtór hho' kawa axasé' nee kari haratlintié'?

³ Kuungá' masa adoorír daktu'uté'? Kuungá' slafíngw /abén una iimu/uundé' ar baraá Qeeru. Ahaá daxta mas alhhe'eemisuú sla'a' ar baraá /uuremoohúng?

⁴ Tidá' sleémeero ar taa sleeré' daxta gár i hup i káhha dirhunge? Aasla'áy, aníng ngi slaá' i kahhká.

⁵ Mungú Qeeruú hhoohhoó' ngun hanmiis amorhúng i alé, nee muruú waa/oo/amo nguwa tla/angwhúng wa tlehhiiti. Kuungá' ka xua' adoorí gan tlehhiíti as kuungá' hara'aya kawa eehadé'? Ala adoorí gan tlehhiítiíke as kuungá' Ya/abtór hho' kawa axasé' nee kari haratlintié'?

⁶ Daanduú Abrahamuwo Gooi i kat, «Mungú guna haratlintií', gawaá adoorihe kuri gan'amií harafaár.»

⁷ Gawaá daanduú axweesantihe kuungá' a tsahhá' asma múk aa haratlintii' an xwaylár Abrahamu.

⁸ Gooi gana geerií aán adór Mungú múk xoordu ngur gan'amií harafaari as haratlintaaor'ín. Ya/abtoorí hho' Gooi gaa geerií alki/ít Abrahamu nguwa beér, «Baraawoge xoordu sleémeero ki tsuuq.»

⁹ Gawaá adoorihe mukdá' aa haratlintii' kun tsuuq dinkwa nee Abrahamudá' aa haratlintii'.

¹⁰ Ala kudá' sleémeero tlehhma'aá hara'aya ngaa i tlintii'iye' kaa lu'ús. Asma Gooi i kat, «Heé tidá' sleémeero taa gooín baraá kitaábuú hara'ayár Mosewo ga alqaytsimitaaká nee ga iialooeemisaaká ku lu'usi.»

¹¹ A gár geehhoo' adór hee kur gan'amií harafaariiká dír geeraá Munguhe ar loohír hara'aya. Asma kaa gooín, «Heé gan'amuú koóm, slafiingw gu kón as haratlintaao.»

¹² Ala hara'aya kángw haratlintaao gu katká. Ala hara'aya gár i kat a tí, «Heedaádá' hara'aya sleémeero gaa oh, slafiingw gun sláy as tlehhemi'iiwós.»

¹³ Kristo atén tina tuú/ baraá lo'oodár hara'ayaaro, qoomár lo'oorén tidá' inósuú kilá' ngiwa gagaár. Asma kaa gooín, «Umuúqo heewo oo taa gawaá xa'anií kikií' kwaa lu'ús.»

¹⁴ Kristo adoorí gana tleéhh, as kahhó' tsuuqaadá' Mungú aa al'axweés dír Abrahamu, xoordu ngiwa i hardihiya' ar loohír Kristo Yesu. Nee sleeme adoorí gana tleéhh as kahhó' atén Qeeruú hhoohhoó' kudá' Mungú naa dirén i al'axweés, kuwa slawaan ar loohír haratlintaao.

Dabe nee al'axweesani

¹⁵ Hháe, án slaqsoó wák ngun oó' oo baraá slafingwrén oo umuúqo daqisleém. Múk tsár bira al'axweés, heé al'axweesantadá' ga sií' laqaá ga warqeés i kaahh.

¹⁶ Ala Mungú al'axweesantós gana oó' dír Abrahamu nee oo wák baraá xwaylarose. Al'axweesantí i katká, «dír xwaylarós.» Gawaá adoorihe a dír múk yaariireeká. Ala al'axweesantí gár i kat a «dír oo wák baraá xwaylarose.» An heé wák, nee heewí an Kristo.

¹⁷ Gár án ni kah a tí, «Alqado kaa qaroó tleéhh iimír aáng wa ale nee Mungú. Hara'aya niri hardát alaá kureeraá tsiire tsiyáhh nee mibeeri tám. Ala gawaá adoorihe hara'ayaarí alqadoodá' warqeesaro ga aleesleeraaká, nee tam al'axweesantadá' ngiwa hinges, tidá' taa qaroó geerií oó'.»

¹⁸ Atén aali an slawaán as Mungú al'axweesantós ngiwa boo/eés. Ala a slawanaaka as hara'aya kawa eeharaharaán. Asma Mungú aali gana amór Abrahamú i haniís, as ngiwa dirósí al'axweés.

¹⁹ Ala gár hara'aya kingisa haniís a milá? Hara'aya kingina doók daanduú al'axweesantadí alé as dakuús ngiwa laqaan, nee iwa kumit ay dír Kristo i hardihi. Inós an oo wák baraá xwaylár Abrahamu oo al'axweesantadá' gaa slay. Mungú hara'ayaarí gana haniís dír malayke. Malayke gari hanís dír muu.

²⁰ Ala har'ohusmo barnaxes i deer, inós a har'ohusmoó heé wakeeká, ala Mungú inós a wak.

Gár dabe kasa qaás

²¹ Daxta bar adoorí, an ooána hara'ayár Mungú nee al'axweesantá Mungú ti slaslay'aaká? Aasla'áy, a adooriheeká. Ala geera barnaxes hara'ayár aleesleemuú koom kinga haniís, ar muu gu slafíngw i haniis, geera alók muu gan'amu gu sláy as hara'aya ngiwa óh.

²² Gooi ngaa geehhooés alki/ituuwo adór tlakweema nira baaliné' dír muu sleémeerowo. Adoorí kana geehhooeés as kahhó' mukdá' Yesu Kristo gwa haratlintii', aalidá' taa al'axweés kawa slay.

²³ Qoomár haratlintaao niwa hardatiká, atén a baraá tseegamór hara'ayár i diriiaán, ay dír haratlintaaoodá' hardah i geehhoouur.

²⁴ Gawaá adoorihe hara'aya direne a adór geeraharusmo oo atén ti geeraharahaár amór Kristo i alé, as kahhó' atén tiwa gan'ámií harafaari ar loohír haratlintaao.

²⁵ Ala hamí haratlintaao naa hardát, nee atén ti malé geeraharahariiká nee geeraharusmoodá'.

²⁶ Asma kuungá' sleémeero a na/aá Mungú asma Yesu Kristo ugwa haratlintié'.

²⁷ Asma kuungaásingá' sleémeero awa taa haragaás nee Kristo ar loohír baatiísmo, kuungá' Kristo ugwa tsité' adór inqwaarír wa ale.

²⁸ Ala daxta gár dimbé i káhh dír heé Yahudi nee heé Yunaniro. Laqaá tam dír heé lawaalmo nee heé lawaalmowooká. Nee slám gár dimbé i káhh sleeme dír hhawaata nee /ameeniro, asma kuungá' sleémeero a adór heé wák baraá Kristo Yesuwo.

²⁹ Ala kuungá' bar múk Kristo, kuungá' a xwaylár Abrahamu sleeme. Gawaá adoorihe aalidá' ar Mungú a toohúng asma al'axweesantadá'.