Galatia 2 - Biblía Axweesantá Hhohho' ar Mungú 2004

Paulo nee Ya/abuusér hatlá'

¹ Kureeraá mibaá nee tsiyáhh niwa waarahhiyé', aníng niri malé tsa/aám ay Yerusalemu dinkwa nee Barnaba. Nee Tito sleeme tiri alkoomaán.

² Aníng ana daqáw asma Mungú daqeemuueé' kwí nguna geehhooatís. Dinkwa ana tleehhaán nee geeraharuusér múk kríshaanáy kiloorén. Ya/abtór hho' tidá' ni dír múk xoordaá hatlá' i alki/aa/iit, ngari dir'íní alki/iít. Aníng ana xu'utír wa slaá' áx, gadiyér'eé' tidá' naa tleéhh, nee tí ni tleehh, a tawóro laqaá a adoomá.

³ Ala Tito kudá' nee aníng dinkwa, inós tam heé Yunaniro, kwa harakeesiiká al/utlooro.

⁴ Ala hhaeekaariya' lamuuse nina qawti dahiye' baraá dinkwaadá', as amohhooaadá' atén ta koomaan baraá Kristo Yesuwo ngiwa tsee/aarina' as kahhó' atén tiwa ki/isiya' baraá lawaali'iima.

⁵ Ala atén adoodá' inooín i slaiya' aga ya/aamaniiká tam adór niina. Atén gár taa sla'aán a looeemaá Ya/abtór hho' masók in kumiitiyá' dirhúng wa ale.

⁶ Ala mukdá' tawa kaahi a geeraharuuse, inooín gár hatlá' taa doók i káhh gawaá tidá' aníng naa intsaahhatimisi. Ala inooín tam i uroó kon'a a gaarooká dir'eene, asma Mungú i uroó heé fadiitiiká.

⁷ Ala inooín kari tsaáhh adór Mungú aníng ira aleesleemií haniís oo Ya/abtór hho' ngiwa alki/iit dír mukdá' taa al/utliikahe, adoodá' Petro sleeme ngura aleesleemií haniís oo Ya/abtór hho' ngiwa alki/iiti dír mukdá' taa al/utli.

⁸ Asma Aakoodá' Petro gwa aleesleemií haniis tawa Ya/abusmoó mukdá' taa al/utlín, an kudá' aníng iga aleesleemií haniis sleeme, tawa ya/abusmoó múk xoordaá hatlá'.

⁹ Yakobo nee Kefa nee Yohane inooín a uheemaá múk kríshaanáy. Inooín aleesleemuudá' taa aníng i haniís nee Mungú, kuri tsaáhh. Gawaá adoorihe aníng nee Barnaba tiri /uye leehhiyé', as tawa múk gadiyuús dinkwa nee inooín. Tari al'axweesaán aníng nee Barnaba tawa tlawaan amór múk xoordaá hatlá', nee inooín amór múk Yahudi.

¹⁰ Ala gár wák kilós ngina ooiyé', iwa kaahiya', «Múk narkuute alee/iimisaak.» Nee gaarí a gár án ni tlehhaahhiit ló'wa ale.

Paulo i baraá Antiokiár wa Petró iigahhamiit

¹¹ Kefa niwa hardáh Antiokiár i alé, aníng nguri iigahhamiít dír geeraá múk wa ale, asma tlehhimi'iiwós nguwa sakwasleemuutiyé'.

¹² Inós nee múk xoordaá hatlá' tana al/ayín, mukko niri hardáh oo tinda ya/aáw nee Yakobo Yerusalemúr wa ale. Mukdá' niwa hardáh, Petro tiri paraátl dír mukduú xoordaá hatlae, dír /ayma gari geexáy, asma i múk Yahúdír da'ayumiit, kudá' káh, múk xoordaá hatlá' ku al/utlin.

¹³ Múk Yahudi oo didaádá' i dirií' tiri paraátl, hhaahhafingwduú Petro kuri eehár, tam Barnaba sleeme hhaahhafingw'ín kudá' guri eehár.

¹⁴ Aníng adór tlehhmi'ii'ín nee looeemaá Ya/abtór hho' tir slaslay'aaká ngiwa tsaáhh, Petro nguri iigahhaát dír geeraá muu sleémeeró wa ale, nguri báw, «Kuúng a heé Yahudi, kuúng an hót tawa adór heé xoordaá hatlá', a adór heé Yahudirooká. Ala kuúng adór múk xoordu kur harakeemis a adoomá, ar tawa hooti adór múk Yahudír aleeró.»

An ba/amán ar haratlintaao

¹⁵ Ar ló', atén a múk Yahudi laqwalamko, a múk xoordaá hatlaeeká, kuduú tlakuuse.

¹⁶ Ala atén a xuaán adór hee kur gan'amií harafaariiká as hara'aya ngiwa eehár, ala hee kun gan'amií harafaar as Yesu Kristo nguwa haratlintií'. Atén sleeme Kristo Yesu una haratlintiiaán as tiwa gan'amií harafaari, as Kristo kuwa haratlintiiaán, ala as tlehhema'aá hara'ayaarooká. Asma heé ta gan'amií harafaari as hara'aya ngiwa eehár i kaahh.»

¹⁷ Atén awa kilá' Kristo una haratlintiaán as tiwa gan'amií harafaari. Ala bar aga araán adór atén tara dakuusaán, nee adór atén tar ba/amanaaká bar hara'aya aga eeharaniiká, daxta an ooána atén Kristo tina qwaareés? Aasla'áy, a adooriheeká.

¹⁸ Ala barnaxes aníng geera tidá' aáng naa sií' aga malé inkií/ tlehhmuuwo as kahhó' tiwa gan'amií harafaari alók a tlakusmo.

¹⁹ Asma aníng hara'aya iga qaroó gás. Gawaá adoorihe amór hara'aya eeharto aníng a heé aa gwaa', as kahhó' niwa slaaf dír Munguhe. Aníng taa qaroó alkikií' nee Kristo gawaá msalaába.

²⁰ Aníng daxta a slafaaká, ala Kristo in slaaf baraaeé' wa ale. Slafiingwí nir hoot baraaká' yaamuwo a kudá' nir hoot baraá haratlintaaór Garmoó Mungú nguwa haratlintii'. Asma inós aníng ina slaá', slafiingós guri haniís as aníng.

²¹ Aníng gurtleemuú Mungú u siaasiiaaká. Ala barnaxes hee ku gan'amií harafadiit as hara'aya ngiwa óh, daqaní Kristo ina tawo gwaá'.