Galatia 1 - Biblía Axweesantá Hhohho' ar Mungú 2004

¹ Anuú Paulo barwaári ngina gooiím. Aníng a ya/abusmo. Aníng múk iga ya/aaw i kaahh, laqaá heé iga ya/abusmoó wa qaas tleehh i kaahh. Ala án heé iga ya/abusmoó wa qaas a Yesu Kristo inósuú kilá'. Slám nee Mungú Baabá, kudá' Yesu Kristo ngwa waaslee/atis baraá múk aa qaátl wa ale.

² Aníng nee hhae sleémeero kudá' diirí diriiá' barwaárí ngina gooiimaán amór múk kríshaanáy sleémeero oo baraá yaamaá Galatia.

³ Mungú Baabá nee Aakoorén Yesu Kristo kuungá' nu tsuuqi nee nu waydií haniisi.

⁴ Aakoorén Yesu Kristo adoodá' Mungú Baabá aa slaá' gana tleéhh, tiri haniís as daanduú tlakweemaarén, as atén tiwa ba/amisi baraá yaamuuká' tlaakwe awa de'emuuká'.

⁵ Inós i xirfuuti ay alhhe'eesay wasle. Amin.

Ya/abtór hho' ar hatlá' i káhh

⁶ Aníng a ló'wa waa/oo/amiím as kuungá'. Asma kuungá' Mungú ugwa geexeeré' ar gaanslaay, kudá' kuungá' naa ateet as gurtleemuú Kristo, nee kuungá' ya/abtór hho' ar hatlá' kari i warqeeré'.

⁷ Ala ya/abtór hho' ar hatlá' i káhh. Mukko kuungá' nu sagaqwaareemiís i deer, oo Ya/abtór hho' ar Kristo ga warqeemiís.

⁸ Ala bar atén laqaá tam malaykamoó gawaá dooraá daáhh barnaxes ya/abtór hho' ar hatlá' nga alki/iít, ar nee tidá' atén naa alki/iitaán ti slaslaawa'aaká, inós ku lu'usi.

⁹ Adoorí ngina ooaán, nee ala hám ngin malé inkií/ ooaro, umuúqo heewo oo ya/abtór hho' ar hatlá' ngaa alki/iit, ar nee tidá' kuungá' taa ilaoté' ti slaslaawa'aaká, inós ku lu'usi.

¹⁰ Kuungá' ka xua', aníng axweesanaywí un axweésa, as muu aníng iwa ya/an, laqaá Mungú? Kuungá' ka xua' aníng gár ni leelehhiit a sla'atisár múko? Án barnaxes tam hamí a kumiít muu nguwa sla'atimis, daqaní aníng a sagadiyusmoó Kristowooká.

Paulo kuwa ya/abusmoó wa qaás

¹¹ Hhaee'eé', aníng gár ni xu'utisár wa slaa' dirhúngií aleeró a tí, Ya/abtoodá' hho' naa dirhúng i alki/iít a gár hee aa iimu/uniká.

¹² Slám aníng ngaa ilaoohiiká dír heé wa ale, nee án heé iga intsaahhatis daanduú Ya/abtoorihe i kaahh. Ala a Yesu Kristo ngina aníng i geehhooatís.

¹³ Án ngi slaá' kuungá' kangw'eé' ugwa axsé', adór nira hoót qoomaadá' án tawa heé diínír Yahudi. Aníng múk kríshaanáy una ló'wa slahha'eemiís, tam guruueé' aa tlayká. Ilakaaharu una tleéhh as ngiwa qwaareesár wa slaa'.

¹⁴ Aníng niri kumiít baraá diinír Yahudiro ta múk yaariír ba/a baraá qartadár tlahhay'eene. Aníng ilakaaharu una ló'wa tleéhh asma uunuudaá baabi'iirén.

¹⁵ Ala Mungú aníng ina tsawaár iimír aníng tiwa laqwaaliiká, iri ateét as gurtleemuuwós, as aníng inós nguwa sagadiyuus.

¹⁶ Garmaawós nguna dir'eénií geehhooatís, as kahhó', aníng Ya/abtór hho' ar daanduuwós ngiwa alki/iit dír múk xoordaá hatlá', qoomaadae aníng heé naa yaahaás i kaahh.

¹⁷ Laqaá tam aga tsa/amiiká Yerusalemu, amór ya/abuuseedá' gadiyeé gaa geerií iimu/uun. Ala ana tláw ay yaamaá Arabia. Aluuwo niri malé kií/ ay Damasko.

¹⁸ Kureeraá tám niwa waarahhiyé', niri tsa/ám Yerusalemu, as nee Kefa tiwa slawaan. Niri dír do'ós wa hoót deelo mibaá nee kooán.

¹⁹ Ala ya/abusmoó hatlá' naa ár i kaahh, aqo har Yakobo kilós, hhiyoó Aako.

²⁰ Ti ni amorhúngií gooiim ar ló' tam geeraá Munguhe.

²¹ Aluuwo ana tláw ay yaamaá Siria nee Kilikia.

²² Ala gitsee/aaeé' kaa ariiká nee múk kríshaanáy oo baraá yaamaá Yudea.

²³ Ala inooín kaa tawó axaás, tawa kaahi, «Heedá' aáng atén taa slahhaeemiis, daxta i Ya/abtór hhó' alki/iit, ar haratlintaaoodá' aáng aa qwaareesár wa slaá'.»

²⁴ Inooín Mungú kuri xirfayeemiís as aníng.