Filipi 4 - Biblía Axweesantá Hhohho' ar Mungú 2004

Gurbu'uungw

¹ Gawaá adoorihe, hhaee'eé' awa sla'aaruúse, án kuungá' nun ló'wa inslasláw. Kuungá' a qwal/uueé' nee slamángw arba/ati, daxta sihhtano hhe'eesé' baraá Aakoowo.

² Aníng Euodia nee Suntike in firiím tiwa haraki/iya', masók muunuú wák ngun koná' baraá Aakoowo.

³ Nee kuúng sleeme, sla'aarusmooeé' oo sagadiyusmo dinkwa nee aníng, án kuúng u firiím, /ameenaasíng alee/iiseek. Asma inooín Ya/abtór hho' ngina sa slaqwiyé' nee aníng, nee Klementiwo, dinkwa nee kudá' hatlá' awa gadiyeé ngaa tleehhiye' nee aníng. Inooín umer'ín kaa gooín baraá kitaábuú slafiingw.

⁴ Qwalaala/é' daqisleém baraá Aakoó wa ale, slám nun malé baw, qwalaala/é'.

⁵ Hhooeemaahúng masók i geehhoouyá' dír muu sleémeerowo. Aako naa nakaá/.

⁶ Ma daawiimitaara' baraá umuúqo gaaro. Ala umuúqo gaaro ar ta sla'a'a Mungú na ádbawaak, kuwa firiiriinda' nee kuwa sluufmisa'.

⁷ Nee wayduú Mungú, kudá' tsaahharo ta aleeslawaanaaká sagalooarene, munerhúng ngi de'en, nee inslawayhúng baraá Kristo Yesuwo.

⁸ Alhhe'eesaywo, hhaee'eé', muruú kuungá' tunduwa hariím inslaslaango a kwí, muruudá' sleémeero oo ló', nee kudá' ilaiwa/amér koóm, muruudá' sleémeero oo gan'amuú koóm, nee kudá' hhohhó', slám muruudá' sleémeero oo sla'atimís nee oo hhooeemaá koóm, nee tlehhemi'iidá' sleémeero awa hhohho' nee awa xirfuú wa hariimá'.

⁹ Muruudá' taa dir'eé' wa intsahhé' nee kudá' taa ilaoté' tleehhaak, tam kudá' taa aandé' nee oo taa axasé' dir'eé' wa ale sleeme. Daqaní Munguú wayduú koóm i dinkwa nee kuungá'.

Sluufaay as qeemu

¹⁰ Aníng aga ló'wa qwalaá/ baraá Aakoowo, asma kuungá' aleesleemu ugwa malé sleeré' daxta, tam aníng iri insleeré' as alee/isaywí ni slaa' naa hanisé', adoodá' aáng ngur hanmaamisa'. Baraá tla/angwihe a kaahaaká án kuungá' ina gunqaresé'. Ala a gár ta koonda' in káhh.

¹¹ Aníng adoorí a kaahaaká as niwa gaa slaa'. Asma aníng umuúqo adooro aga intsaáhh.

¹² Aníng bar aga /aarúw, gár tlaakw i káhh, barnaxes slaasláw iga wa tláhh, gár tlaakw i káhh sleeme. Umuúqo barto án ti amohhoó'. Bar aáx, laqaá bar qwariít, nee tam mura' bira wa tlaáhh, laqaá bira /aarúy, aníng ti amohhoó'.

¹³ Mura' sleémeero u aleesláw baraá kudaádá' aníng i /uurií hanmiisa.

¹⁴ Ala kuungá' adór hhoo' aga tlehhé' ar aníng iwa alee/isé' baraá slahh'amaayer'eé' tihe.

¹⁵ Ala kuungá' múk Filipi, kuungá' kilá' kaangwí u xuá', qoomaadár geeraawo Ya/abtór hho' ngiwa alki/iít, nee yaamaá Makedonia ngiwa geexáw, múk nee aníng aga aldinku'uusaan baraá mura' slaslaango nee hanmisuuwo a kuungá' múk Filipi kiloohúng. Kríshaanoó amór yaamaá hatlae oo adoorí gaa tleehh i kaahh.

¹⁶ Tam qoomár aníng niwa Tesaloníkér i dirii', alee/isaay nguri hubé' qoomaadá' án nguwa slaa', tam a sagaáwa wakeeká.

¹⁷ Kuungá' ma kaahara' gídaabá aníng gár ni leelehhiit a qeemuudá' amorhúng daáhh. Ala gár ni leelehhiit a bu'utuudá' kuungá' ta sleera' asma tlehhemi'iidá' naa aníng i tlehhé'.

¹⁸ /Aymi'iiká' ni gooiim qeemuudá' naa dirhúng wa sláw ngu laqaaqaná'. Nee qeemuuwí ku ló'wa úr. Daxta umuúqo gaaro ar ló'wa bu'uut a koóm, alaá Epafrodito qeemuuhúng nguwa huúw. Qeemuuhúng kudá' naa hanisé' dír geeraá Munguhe a adór ilahhooadá' mooyángw tsuú' koóm, ilahhooadár muruú ta tsu/i tidá' taa ya/án, nee ar Mungú sla'atamis.

¹⁹ Nee Munguúeé' kudá' xirfuú koóm baraá Kristo Yesuwo, tidá' sleémeero kuungá' ta sla'a' ngi haniis ar har qoomoó daqaari'iimarós.

²⁰ Munguúrén nee Baabuúrén i xirfuuti ay alhhe'eesay wasle. Amin.

Intsihhiisantá alhhe'eesaay

²¹ Umuúqo heewo kudá' hhoohhoó' oo Mungú intsihhiisaak, kudá' baraá Kristo Yésú ii dirií'. Hhaeedá' nee aníng dinkwa kuungá' nu intsihhiimisiyá' sleeme.

²² Múk hhohhó' oo Mungú sleémeero kuungá' nu intsihhiimiis, ak alé múk doó waawutmoó múk Roma.

²³ Tsuuqaá Aakoorén Yesu Kristo masók i dinkwa nee kuungá'.