Filipi 3 - Biblía Axweesantá Hhohho' ar Mungú 2004

Hotaá ganaa'á' awa ló'

¹ Alhhe'eesaywo gár án ni oo', hhaee'eé', qwalaala/é' baraá Aakoó wa ale, aníng a slaaqaataaká gooiro tidá' naa qaroó dirhúng i gooiím, asma i qoón dirhunge ngiwa inkii/.

² Ti harmagahhe' dír mukduú adór seeaawe, dír sagadiyuuseedár muruú tlákw inslaaslaw, mukdá' slaqo gi tlaquú wa slaá' ar al/utlo.

³ Ala múk taa al/utlín a atén, ar al/utloodár ló'. Qeeruú Mungú atén ti gan'aamiis baraá sluufayrene. Atén tin xirfayeemisaán as Kristo Yesu kilós. Gár hatlá' ar ta haraxuaan i káhh ar tlehhema'aá tawo.

⁴ Tlehhma'aá tawo geera bir bu'uutiyá', aníng gár ni da'ayuumiit i káhh. Umuúqo heewo geera bar tlehhema'aá tawo gin haraxu'utír wa slaa', geera alók aníng i baá/.

⁵ Aníng tina al/uútl bál dakaate, alaá tiwa xwaylúy. Aníng a heé xoorór Israeli, heé tlahhoó Benyamini, aníng a heé Ebrania, tam xwayliitér'eé' a múk Ebrania. Kángw hara'aya ooharo aníng a heé Farisayo.

⁶ Ilakaaharu una ló'wa tleéhh gawaá daanduú hara'aya ooharo, tam múk kríshaanáy nguri slahh'eemiís. Geera barnaxes hotaá ganaa'á' kin slaslaya ar hara'aya boo/eesa, geera alók aníng ti xaslxaansli wásl.

⁷ Ala muruudá' sleémeero aáng naa harafaár tawa slaasláw dir'eene, hám daxta muruudá' u harafadiít tawa /aareema dir'eene as Kristo.

⁸ Ala a muruuwí kiloseká. Mura' sleémeero un harafadiít tawa /aareemaá kilá' asma Kristo Yesu Aakooeé' nguwa xuú', gaarí a gár afhhamít ta muruú hatlá' sleémeero ba/a. Mura' sleémeero una geexáw as inós, mura' sleémeero una harafaár tawa xwaansloó tawo, as kahhó' Kristo nguwa slaw,

⁹ nee niwa haragwaa' dirós i alé. Daxta aníng hotaá ganaa'á' awa naa sláw as hara'aya ngiwa boo/eés, i kahhiyá'. Hotaá ganaa'á' awa ni xuu' a kudá' kilós hee i slay as Yesu Kristo nguwa haratlintií', an kudá' amór Mungú dahhá', as haratlintaao.

¹⁰ Gár án ni leelehhiit a wak kilós. A Kristo nguwa xuu', nee /uuruú waasle/uuwós nguwa slaw, nee niwa haragwaa' baraá slahh'amaayeerós i alé. Nee aníng tawa adór inós baraá gwa'araarose.

¹¹ Aníng masók harahhifo a koóm ar tiwa waaslee/atisi baraá múk aa qaátl wa ale.

Qwaatlo

¹² Aníng a kaahaaká amoodá' ta i qwaatlaan aga i hardáh qaroó alé, slám a kaahaaká gan'amu ugwa qaroó sláw. Ala ilakaaharu un tlehhiít niwa kumiit as niwa hardah nee gadaádá' ngiwa oh, tidaádá' Kristo Yesu isa ateét, qoomár iwa óh.

¹³ Sla'aaruúse aníng adór gadaádá' ngira i hardihiiká a xuú'. Gár án ni tlehhiit a tí kilós, muruudá' naa alií geexáw un gunqareemiís, nee kudá' geeraaeé' i dirií' un i ti'i'iím.

¹⁴ A ló'wa naagamiís as amoodá' ta i qwaatlaan ngiwa i hardah, as slaasláwadá' Mungú isa ateét ar loohír Yesu ngiwa slaw, tidá' niwa hoot gawaá doorí wa ale.

¹⁵ Ateéká' sleémeero awa ganaa'á', gár tiwa hariím a adoorí an inslaslaawaán. Ala kuungá' bar adór hatlá' aga inslasleeré' gawaá umuúqo gaaro, Mungú muruudá' ngu kuungá' i geehhooatis.

¹⁶ Ala atén sleémeero gár tiwa hariím masók an kumiitaán ar digir wakeetingwdá' tara iimu/uumaán.

¹⁷ Hhaee'eé', kuungá' sleémeero adoorí án nir hoot nar hootaak. Asma atén a slaqsaay dirhunge. Kudá' hootá' adór atén nir hootaan ló'wa ga/aawaak.

¹⁸ Asma án kaangwí ngwa qaroó oó' geerií ale daqtá yaariire, ala hám daxta ngun malé inkií/ ooaro ar hhirhheeri, asma múk yaariír adór ir hooti a adór wakuusér gwa'arár Kristo ar gawaá msalaába.

¹⁹ Inooín i loohír i dirii'iyá', tidár baraá qwanoó kaw. Munguúín a gura'. Muruú tir xirfayeemisi a kuduú murér koóm. Muruú ta inslaslay oo baraaká' yaamu kilós.

²⁰ Ala atén a yaamuloouusér gawaá doori. Slám atén Aakoorén Yesu Kristo u daamaaramaán niwa hardihi gawaá doorí wa aleeró, tiwa ba/amisi.

²¹ Inós slaqoorén kuká' hhitiruutá' giri warqees nee tari adór slaqwtós tidár xirfuú koom. Inós adoorí tleehhamooro ga aleesláy. Asma inós /uuru gu kón oo mura' sleémeero nguwa qaasi baraá aleesleemuuwós i alé.