Filipi 2 - Biblía Axweesantá Hhohho' ar Mungú 2004

Kristo kuwa niinaweés nee kuwa ureés

¹ Slafingwhúng baraá Kristoowo i /uuruú huwahúwi? Sla'aarirós nu gurkwa/amísa? Dinku'uumár baraá Qeeru i deéro? Hhooa nee gurtleemu i koondá'a?

² Ala bar adoosíng, muunuú wák koomaak, as qwal/uueé' iwa boo/i. Kuungá' kiloohúng ti sla'aslae', dinku'uumár baraá qeeru koomaak, nee umuúqo daqto ti axweesanaay axamise'.

³ Umuúqo gaaro ma tlehhiitara' ar fola, laqaá ar daara/aangw. Ala masók umuúqo heewo tin kilós niinaweemiis.

⁴ Muruú múk hatlá' i slai na leelehhiitaak, ala a muruudá' kuungá' ta sla'a' kiloseeká.

⁵ Kuungá' masók muunuú adór kuduú Kristo Yesu un koondá'.

⁶ Inós iimír iimu/uungo tlehhemuuwós a adór kuquú Mungú. Inós nee Mungú i qoná'. Ala inós ina ya/án qoomtidá' nee Mungú tawa qon ngiwa geexay.

⁷ Baraá sla'aarirose uraydá' tawa adór Mungú guri geexáy, iri adór lawaalmo tleehhiít. Iri hee tleehhiít adór atén wa ale; Iri geehhooúy ar slaqsoó hee.

⁸ Tiri kilós niinaweés, iri hoót ar ilaiwa/ame ay gwa'araarós, eeít, gwa'araadár gawaá msalaába.

⁹ Gawaá adoorihe gaarí an gár Mungú ngusa gáwtí tsa/aasa hhe'eés, nee guri umuudá' úr i haniís, umuudá' ume sleémeero ga baá/.

¹⁰ Asma muu sleémeero umuuwí ngu i tumbarara'ati, mukdá' gawaá doorií dirií' laqaá mukdá' baraá yaamií dirií' nee tam kuduú baraá gi'i.

¹¹ Nee umuúqo heewo i ooi, «Yesu Kristo a Aako,» as Mungú Baabá kuwa xirfayeesi.

Kuungá' a gwa/aateema

¹² Sla'aaruuser'eé', án qoomár niwa dirhúng i dirii', kuungá' axweesante'eé' ana iialooeemisé' umuúqo daqto, ala a qoomár aníng niwa dawaaká kilós. Gawaá adoorihe gadiyuusé' ar dae nee daaraxaay, as ba/amarhúng kawa boo/esa'.

¹³ Asma Mungú in baraahúng wa gadiyuus. Inós kuungá' nu alee/iis as sla'aarirós kawa tlehha' nee gadiyér hhoo' kawa tlehha'.

¹⁴ Umuúqo gaaro bar tlehhitá', ma tlehhitaara' ar qununu/aay nee tlaampa'aamis.

¹⁵ Kuungá' masók an na/aá Mungú awa xaslxaansli wasl nee dakuús wasl, kuungá' masók baraá tla/ángw qartí tlaakwe tundun geehhoó' tawa adór tsatse/uú gawaá doorí dirií',

¹⁶ asma kuungá' Ya/abtór hho' ar slafiingw an alki/itá' dir'ín i alé. Gawaá adoorihe kuungá' a xirfuueé' bál deeloodár Kristoowo, asma aníng aga tawó ti'ii'imiiká, laqaá aga tawó daawiimitiiká gadiyeede.

¹⁷ Ala haratlintaaorhúng a ilahhooár án ni hanmiis dír geeraá Mungú i alé. Bar adór garka tseerer'eé' iwa ku'uta gawaá daanduú ilahhooarí, aníng a qwalaá/ sleeme. Slám qwal/uueé' kwí ngway qasiís dirhúng i alé.

¹⁸ Qwalaala/é' kuungá' sleeme, qwalaala/é' dinkwa nee aníng.

Timoteo nee Epafradito

¹⁹ Án harahhifo a koóm baraá Aako Yesuwo Timoteo nguwa amorhúngií ya/aaw ar gaanslaay, as muunaáeé' iwa qwalaa/i kangwhúng bura axaás.

²⁰ Heé hatlá' i kaahh oo nee aníng ti kangw slawá', slám heé hatlá' i kaahh oo kuungá' nu sa daawiimiít adór inós wa ale.

²¹ Awa hatlá' sleémeero a muruuín kilós ngun leelehhitiyá' ala a gadiyér Yesu Kristoowooká.

²² Ala kuungá' Timoteo u xuá' adór kur inkihhím. Inós nee aníng gadiyér Ya/abtór hho' an altlehhahhitaán, adór baabá nee garmaawós.

²³ Kwí án ngun amorhúngií ya/aawár wa slaá' ar gaanslaay, barnaxes adór kwasleemar'eé' aga xuú'.

²⁴ Nee aníng haraxu'uti a koóm sleeme baraá Aakoowo, ar anuú kilá' deeloorí tseewe niwa amorhúngií hardah.

²⁵ Án ngi slaá' sleeme i qoón hhiyaarén Epafrodito nguwa amorhúngií ya/aaw. Inós nee aníng aga algadiyuusaán, slám inós a slaqwarusmoó wák dinkwa nee aníng. Inós kuungá' nguna ya/abé' amor'eé' alé as aníng iwa sagadiyuusi, nee tidá' án ni slaa' ngiwa hanmiisi.

²⁶ Inós kuungá' sleémeero nuna ló'wa inslasláy, iri ló'wa daawiimiít as kuungá', asma kuungá' adór inós ira tiíq aga axasé'.

²⁷ Ar ló', inós aa ló'wa tiíq, afkú bohoongw ngun wa kií/. Ala Mungú inós guri gurtláy. Tam aníng sleeme Mungú ina gurtláy, as gurhaamir'eé' miwa doogiín.

²⁸ Gawaá adoorihe ilakaaharu una ló'wa tleéhh inós nguwa ya/aaw amorhúngií alé, as kuungá' tawa qwal/a' bura aandé', nee slám as gurhaamir'eé' iwa /aaruur.

²⁹ Gawaá adoorihe, inós ilaoohaak ar qwal/uú yaariír, adór hhiyoó baraá Aako. Múk adór inós ilaiwawa/aak.

³⁰ Asma inós ina dáh baraá tsaxwa, iri nakaá/ gwa'araaro as gadiyér Kristo, as aníng iwa alee/iisi, alee/isaydá' kuungá' taa harslaaqaté'.