Filipi 1 - Biblía Axweesantá Hhohho' ar Mungú 2004

¹ Anuú Paulo nee Timoteo, sagadiyuusér Kristo Yesu, barwaárí ngina gooiimaán amór múk hhohhó' oo Mungú sleémeero oo baraá Kristo Yesu kuduú baraá Filipír i dirií', dinkwa nee geeraharuuser'ín nee sagadiyuusér múk kríshaanáy.

² Mungú Baabuúrén nee Aako Yesu Kristo kuungá' nu tsuuqi nee nu waydií haniisi.

Firór Paulo as múk Filipi

³ Án Munguúeé' un sluufmiís umuúqo qoomár barnaxes kuungá' naa insláw.

⁴ Qoomár barnaxes a firiiriím, án kuungá' sleémeero nun aleefiraariím ar qwala/.

⁵ Asma kuungá' aga dinku'uusé' nee aníng Ya/abtór hho' alki/ituuwo iimír bál geera nee tam ay laarí sleeme.

⁶ Gár án ni haratlintatii' a tí, kudá' gadiyér hhoo' gaa iimu/un baraá munerhunge, inós gadiyeédá' ga alhhe'ees ay bál deelór Kristo nay xeer.

⁷ A gár hariím dir'eene adoorí ngiwa inslaslaw daanduuhunge, asma kuungá' a baraá muunaáeé' dir'á'. Asma kuungá' sleémeero tsuuqaá Mungú iga sleeré' adór aníng wa ale qoomár aníng tiwa tseék, nee tam qoomár Ya/abtór hho' ngiwa aleekal/aám nee looeemaawós ngiwa laqaqaám.

⁸ Mungú ga xuu' adór án kuungá' sleémeero nur artá wa slaá', asma nuwa ló'wa slaa' ar sla'aaridár amór Kristo Yésú daahh.

⁹ Gár aníng kuungá' nuwa aleefiriiriim a tí, sla'aarirhúng i kumit iwa ló'wa doogiigiin dinkwa nee xu'uti nee dahar sleémeerowo,

¹⁰ as kahhó' kuungá' gár hhoó' tsawaararo kawa aleesleera'. Daqaní kuungá' a múk taa hhoohhooeés nee oo xaslxaanslír koomaaká bál deeloodár Kristo birna hardát.

¹¹ Nee kuungá' tundu hatsiis gan'amuwo, kudá' Kristo i tlehhiiti baraá munerhúng wa ale, as ilaiwa/amér Mungú nee xirfuuwós.

Hotaangw an Kristo

¹² Hhaee'eé', gár ni slaa', kuungá' masók an xuá' adór slahh'amaayeedá' sleémeero aníng naa sláw Ya/abtór hho' ngira ila/iká, ala gana alee/ís tsiyaayaaxaro.

¹³ Asma aníng tina tseék as Kristo, nee adoorí aa xu'utít dír askaári nee muu sleémeero oo diirí dirií'.

¹⁴ Nee tseegamor'eé' hha'aá yaariir awa kríshaanáy gaa haratlintaao gawdés baraá Aakoowo, tari uraaráy baraá pihh'uumaaro as Ya/abtór hho' kawa alki/iiti ar dae wasle.

¹⁵ Muu bahh'alé i deer oo kángw iidíguú Kristo gu alki/iít as da/i nee gila, ala tam adoorihe awa hatlá' i dayá' sleeme awa kángw Kristo ngu alki/iitá' ar muunuú hhoó'.

¹⁶ Kuká' kaangwí ngun alki/iitiyá' as sla'aari, asma ka xuu' aníng tina qaás as Ya/abtór hho' ngiwa aleekal/aam.

¹⁷ Ala kudaá hatlá' kángw Kristo ngwa alki/iti'iiká ar muunuú hhoó', ala as fola. Inooín ka xui a slahh'amaayer'eé' kan dook baraá tseegamooro.

¹⁸ Ala a gaarooká. Aníng a qwalalaá/, asma kángw Kristo kuqo alki/iit umuúqo loohiro, barnaxes ar muunuú tlaákw laqaá ar muunuú hhoó'. Nee slám aníng a kumiít qwal/amaayeero,

¹⁹ asma aníng a xuú' alhhe'eesaywo án ti gweer, as án kuungá' iwa aleefiriiriinda' nee as Qeeruú Yesu Kristo aníng iwa alee/iimisi.

²⁰ Gár án ni harahhiif a tí, aníng a baloó muruutaaká baraá umuúqo gaaro. Asma umuúqo gaaro ar án ni slaw xirfuú Kristo gu laqaán ar geehhooeema dír muu sleémeerowo, adoodá' Kristo kura xirfayeés aáng, nee tam hamí sleeme kuqo xirfayees, as muruudá' án ni slaw barnaxes ar slafingw'eé' laqaá ar gwa'arar'eé'.

²¹ Asma dir'eene slafiingw an Kristo, nee gwa'ara gár ak hhoo' ngi húp.

²² Ala án bar kumiít hotaango, pa/aangw u koóm oo gadiyeérí ngiwa alkoom tlehhtuuwo. Gawaá adoorihe ar ni tsawaar a xuaaká, slafiingw nee gwa'araro.

²³ Aníng a baraá waatsaraárí dirií'. Aníng a ló'wa slaá' niwa tlaw, niwa hotángw aw amór Kristo, asma adoorí a tsiní kángw kilá' wa ale.

²⁴ Ala aníng niwa kumiit slafiingo a gár afhhamít ak alé as kuungá'.

²⁵ Aníng kaangwí u xuú'. Gawaá adoorihe a xuú' adór aníng nir kumiít slafiingo, dinkwa nee kuungá' sleémeero as kuungá' nuwa alee/iis, nee qwal/uuhúng nguwa dook baraá haratlintaaooro.

²⁶ Aníng binda amorhúng i hardáh malé alé, pa/ángw yaariír daqaní u koondá' oo Kristo Yesu kuwa xirfayeemisa' as aníng.

²⁷ Daxta gár afhhamít a kuungá' masók an hotá' ar adoodá' Ya/abtór Kristo kawa hariím. Án barnaxes naa hardáh amorhúng, laqaá barnaxes naa hardihiiká, gár án ni slaa' masók an axaás adór kuungá' tara sihhitano hhe'esé' baraá haratlintaaoro ar wakleeli'iimár baraá Qeeru, nee haratlintaaór Ya/abtór hho' kawa aleeslaqwa' ar muunuú wák.

²⁸ Wakuuserhúng ma da'ayuumitaara' baraá umuúqo gaaro. Kuungá' bar pihh'uumár koondá', gaarí a laya dir'ine ar inooín iwa qwaariya'. Ala dirhunge a laya adór kuungá' tar ba/aandá'. Nee layaarí amór i dahh a amór Mungú inósuú kilá'.

²⁹ Kuungá' qeemu ugwa sleeré' oo Kristo kuwa haratlintié'. Ala a har qeemuuwí kiloseeká, ala tunduna slahh'eemiís sleeme as inós.

³⁰ Asma kuungá' sleeme a slaqwá' baraá slaqwaraarí aníng ni slaqwa. Kuungá' aáng aníng iga aandé', niwa slaáqw, nee hamí aga axasé' adór aníng nir kumiít slaqwaraarihe.