FAARO 9 - Biblía Axweesantá Hhohho' ar Mungú 2004

Pasaákuú tsár

¹ Qoomár slahhángw geera oo kurkú tsár iimír múk Israeli niwa baraá yaamaá Misrír wa ti'iít, AAKOÓ MUNGÚ ina axweés nee Mose, baraá xaanxoó Sinaír wa ale, guri báy,

² «Múk Israeli deelór ur ar pasaáka ngi tleehhiye' qoomaadá' taa qoomeesi.

³ Bál slahhaangwí bar mibaá nee tsiyáhh, qoomár tsiindowo adoorí ngi tleehhiye' ar adór kaahi nee dabe sleémeero i diri'.»

⁴ Gawaá adoorihe Mose múk Israeli guri ádbáy deelór ur ar Pasaáka kawa tleehhi.

⁵ Naagáy deelór ur ar Pasaáka tsiindoowo ngiri tleehhiyé', bál mibaá nee tsiyáhh ar slahhángw geera, baraá xaanxoó Sinaír wa ale. Múk Israeli adoodá' sleémeero AAKOÓ MUNGÚ Mose ngura hara'ayín ngina tleehhiyé'.

⁶ Ala muu bahh'alé i deer oo deeloodár Pasaáka tleehharo gaa harslaaqaat, asma inooín tuua kaa kwatiít, tari meetagwaá'. Inooín tari dír Mose nee Aroni káy,

⁷ kiri báy, «Atén taa meetagaasaán asma tuua aga kwatiitaán. Ala gár atén AAKOÓ MUNGÚ ilahhooa haniisaro tis il/an a milá qoomaadá' hariím taa qaasi dír múk Israeliwo?»

⁸ Mose giri báy, «Lakiité' ay dír hara'ayár AAKOÓ MUNGÚ ngay axaas daanduuhunge.»

⁹ AAKOÓ MUNGÚ Mose guna i axweés iwa kaahi,

¹⁰ «Umuúqo heewo dirhunge, laqaá dír na/iihunge, barnaxes taa meetagaás as tuua ngiwa kwatiít, laqaá bir baraá aaií dirii', ala inós deelór ur ar pasaákuú AAKOÓ MUNGÚ ga tleehhamór wa slaa',

¹¹ heé adoorí slahhángw tsár bar mibaá nee tsiyáhh qoomár tsiindoowo deelór ur ar Pasaáka ngi /ayi, dinkwa nee mikaátér taa sluuftisiiká nee naanuú qarqaár.

¹² Muruú /aymaadá' miwa meét ay matlaatle, tam fartós makawa geeqáy. Dabér Pasaáka sleémeero ka oohi ar adoodá' i diri',

¹³ ala barnaxés hee kuqo hhoohhoó' nee i baraá aaií diri'iiká, deelór Pasaáka gaa oohiiká as adoodá' AAKOÓ MUNGÚ nguwa ilahhooárí hanisiiká qoomaadá' hariima, i hariín kuwa slahha'eesi as daanduú tlakweemaawós.

¹⁴ «Barnaxes hoomoó ayaahúng hoót gaa slaá' deelór ur ar pasaáká ngiwa tleehhi dír AAKOÓ MUNGÚ, inós sleeme kaahi nee dabe sleémeero ar Pasaáka ngi oohi. Dabe nee kaahiro sleémeero kin eehar, barnaxes an hoomo laqaá yaamuloousmo.»

Huunkír asla

¹⁵ Baalaadá' heémár lamabu'uungw kawa kikií', huunki heéma gari tuuntúk, iimír tsiindó wa tleemu ay matlaatle i gawaadá' wa gwa/át adór asla.

¹⁶ Adoorí an adór umuú deelooro aa tleehharut, huunki tlaatla/aango heéma gana tuuntúk, nee xweeraawo huunkidá' in gwa/át adór asla.

¹⁷ Umuúqo daqto huunkidá' bira gáwtí tleér gawaá heémaro aluuwo múk Israeli xafay'ín kuri fee/, didá' huunkidá' i sihhít xafay'ín kun didií siihh.

¹⁸ Múk Israeli tan loh ar hara'ayár AAKOÓ MUNGÚ nee xafay'ín ngun tleehhiyá' ar hara'ayár AAKOÓ MUNGÚ. Qooma sleémeero ar huunkidá' iwa gawaá daanduú heémaadá', muu in baraá xafay'ín wa hoot.

¹⁹ Tam huunkidá' bira kumít iwiiwituuwo gawaá daanduú heémaro deelór yaariire, múk Israeli aqo AAKOÓ MUNGÚ nguna ilaiwawa/iyé', aqo tan didá' wa hoot.

²⁰ Daqtakaaro huunkidá' in gawaá daanduú heémár hhoohhoó' wa iwiiwít deelór niinawe, nee umuú daqto múk Israeli tan baraá xafay'ín wa hoot nee tan loh ar hara'ayár AAKOÓ MUNGÚ.

²¹ Daqtakaaro huunkidá' ina iwiiwít gawaá daanduú heémaadá' wa ale tsiindo wa oohang ay matlaatle kilós, nee qoomár bira gáwtí tleér matlaatleero, inooín sleeme aai aqo kin iimu/ún. Laqaá tam bira iwít gawaá heéma tlatla/aangw nee xweera, inooín aqo tan tláy huunki bira sa tleér.

²² Laqaá tam handá' a deelo tsár, laqaá slahhaangw, laqaá tam deelór yaariire qooma sleémeero ar huunkidá' iwa gawaá daanduú heémaadá' i diri' múk Israeli taa loohiika, aqo tan didá' wa hoot. Ala qoomár bira sangw tleér inooín aqo tan tláy sleeme.

²³ Múk Israeli xafay'ín nguna tleehhiyé' ar hara'ayár AAKOÓ MUNGÚ, nee tana lóh ar hara'ayár AAKOÓ MUNGÚ, ar adoodá' Mose kura hara'ayín.