FAARO 8 - Biblía Axweesantá Hhohho' ar Mungú 2004

Tsaa'aso qamiingw

¹ AAKOÓ MUNGÚ Mose guna i axweés iwa kaahi,

² «Aroni ádbaweek qoomár bir tsaa'asoodá' faánqw qamín gawaá kitángw tsaa'aso, ngi qoomeesi as iwa gwa/at amór geeraá kitangwdá'.»

³ Aroni kaangwí guri iialooeés, tsaa'asoodá' gari qaás, iri gwa/át amór geeraá kitaangw ar adoodá' AAKOÓ MUNGÚ Mose ngura hara'ayín.

⁴ Adoorí an adór kitangwduú tsaa'aso kura tleéhh nee heé sahaábu kwahhooro gu xuú'. Iimír baráy wa tleemu ay dír /ayoorós kana tleéhh nee heé kwahho ga xuú', ar adór slaqsaydá' AAKOÓ MUNGÚ aa laqán dír Mose.

Múk tlahhoó Laáwi kuwa hheehhe'eés nee kuwa paraátl

⁵ AAKOÓ MUNGÚ ina axweés dír Mose, iwa kaahi,

⁶ «Múk Laáwi paraatleek baraá tlaa/ángw xoorór Israeliwo, nee ki hheehhe'és.

⁷ Adoorí an adór kir hheehhe'es: Ma'aá kir hheehhe'es ti tsipipi'is, nee slaqooín ngi deeqwiye' ar deeqwa, nee tlabaaín ngi hhuuntsiye' ti adoorír hheehhe'eesiye'.

⁸ Naagáy awuú wák oo batlitamo dinkwa nee ilahhooár balaango tidár puuruú natsaatsaá' oo taa aleedoók nee di/i, ngu huwiye', nee kuúng awuú hatlá' oo batlitamo ngu húp as tawa ilahhooár tlakweema hingeesa.

⁹ Aluuwo múk Israeli sleémeero ku burumbút nee múk tlahhoó Laáwi ku húp geeraá heémár Mungú.

¹⁰ Qoomár múk Laáwi burngwa dír geeraaeé' húp, múk Israeli daqaní dabaaín ki qaasi gawaá múk tlahhoó Laáwi,

¹¹ aluuwo Aroni múk tlahhoó Laáwi ngu dír geeraaeé' huwi tawa ilahhooár ta haniisi dír Mungú ar múk Israeli as kahhó' AAKOÓ MUNGÚ nguwa sagadiyuusiya'.

¹² Naagáy múk Laáwi dabaaín ngi qaasiye' gawaá sagér aweedá', awu wák oo ilahhooár tlakweema hingeesa, nee awu hatlá' oo ilahhooár da/a, as múk Laáwi kuwa haraki/isár i tleehhi.

¹³ «Naagáy múk Laáwi ku húp dír Aroni nee daaqaywós nee dír geeraaeé' ilahhooár ta haniisi dír AAKOÓ MUNGÚ.

¹⁴ Adoorí an adór múk tlahhoó Laáwi kur paratl baraá tla/ángw múk Israeliwo, nee múk Laáwi tari kwe'eé'.

¹⁵ Alaá múk Laáwi bura hhe'és hheehhe'eesaro, nee bira dír geeraaeé' qás tawa ilahhooár ta haniisi dír Mungú daqaní ni baraá heémár Mungú i dahiye' as niwa gadiyuusiya'.

¹⁶ Mukwí kungwa dir'eé' i haniís tawa kwe'eé' oo kilá', kitángw na/aá baris sleémeero awa múk Israeli.

¹⁷ Asma na/aá baris sleémeero awa múk Israeli a kwe'eé', na/aá muu nee awa makaywo, asma baldá' na/aá baris sleémeero awa múk Misri ngiwa tsuú/, inooín ina paraátl as tawa kwe'eé'.

¹⁸ Ala aníng múk tlahhoó Laáwi ugwa óh kitángw na/aá baris sleémeero awa múk Israelír wa ale.

¹⁹ Nee aníng múk tlahhoó Laáwi ngwa qeemuú wa haniís dír Aroni nee daaqaywós baraá tla/ángw múk Israeliwo, as niwa baraá heémár Mungú wa gadiyuusiya' nee haraki/isa ngiwa tleehhiya' as múk Israeli, as kahhó' tiqtír tlakw múk Israeli munguwa eér, as niwa tseewuyé' didá' hhoohhoo'.»

²⁰ Gawaá adoorihe Mose, Aroni nee dinku'uuma sleémeero ar múk Israeli múk Laáwi kuri paraátl ar adoodá' AAKOÓ MUNGÚ Mose ngura hara'ayín.

²¹ Múk Laáwi tlakweemaaín ngiri hheehhe'eesiyé' nee tlabaaín ngina hhuntsiyé', inooín Aroni giri haniís tawa ilahhooár ta haniisi dír geeraá AAKOÓ MUNGÚ. Sleeme Aroni haraki/isa gari tleéhh as inooín ngiwa hheehhe'eesi.

²² Alaá kaangwihe múk Laáwi iri dáh nee tari gadiyuús baraá heémár Mungú wa ale, kina geerahaár nee Aroni nee daaqaywós ar adoodá' AAKOÓ MUNGÚ Mose ngura hara'ayín.

²³ AAKOÓ MUNGÚ ina axweés dír Mose iwa kaahi,

²⁴ «Umuú heewo oo tlahhoó Laáwi oo kureeriiwós mibeeri tsár nee kooán ngaa aye' nee oo gaa baa/, gadiyeé ngi iimu/un baraá heémár Munguhe,

²⁵ nee kureeriiwós bar mibeeri kooán ngaa ayé' baraá gadiyeede i watli.

²⁶ Alaá gadiyeede bira waátl, inós hhaeewós kudaá tlahhoó Laáwi ngi alee/iimisi qoomár bir gadiyuusiyá' baraá heémár Munguhe, ala inós gadiyeé mingiwa kilós tleéhh. Adoorí an adór gadiyér múk tlahhoó Laáwi kar qoomeemes.»