FAARO 6 - Biblía Axweesantá Hhohho' ar Mungú 2004

Adór al'axweesani kar qamaamin

¹ AAKOÓ MUNGÚ Mose guna i axweés iwa kaahi,

² «Múk Israeli kaangwí ti beer: Barnaxes hhawaata laqaá /ameeni al'axweesani kaa oó' ar tiwa paraatli as AAKOÓ MUNGÚ nguwa sagadiyuusi.

³ Heewí difaái mingiwa wáh, laqaá buura, difaáír qarqaar mingiwa wáh, laqaá tam ar ado gaala, mamaá sabiíbu mingiwa /aáy, kudá' naa hamaariye' laqaá tam kudá' kaaharen.

⁴ Qooma sleémeero ar al'axweesantós ngiwa qaás, muruú /aymár mamaá sabiíbu munguwa /aáy, ilmo laqaá tam qaftós.

⁵ «Deelo sleémeero al'axweesani ngiwa qaás ti paraatli, se'eengós munguwa deéqw, ay dír qoomaarós tidá' aa qaás ar al'axweesani dír AAKOÓ MUNGÚ i fak, inós ku hhoohhoó', se'eengós ngu may i tlenuunuy.

⁶ Deelo sleémeero ar tiwa paraátl as AAKOÓ MUNGÚ, inós miwa bihhaá tuuárí tseewúy,

⁷ tam tuuár baabuúwós, laqaá ar aayorós, laqaá ar hhiyaawós, laqaá ar hho'oorós, mingiwa kwatiít, inós mitiwa meetagaás, asma inós taa paraátl as AAKOÓ MUNGÚ.

⁸ Qooma sleémeero ar inós al'axweesani ngiwa qaás, inós taa paraátl as AAKOÓ MUNGÚ.

⁹ «Ala barnaxes hee aa gaanslár gwaá' bihhaá heedá' al'axweesani gaa oo', se'eengós kudá' aa máy as al'axweesani kuri meetagaás, bál faanqw inós bar ku hhohhoees, se'eengós ku deeqwi.

¹⁰ Bál dakaát hhookár tsár, laqaá na/aá hhooka awa tsár ngi huwi dír kaahamusmoó Mungú, dír afkú heémár Mungú.

¹¹ Kaahamusmoó Mungú hhookír wák gan haniis as tawa ilahhooár tlakweema hingeesa, nee hhookír hatlá' gan haniis tawa ilahhooár ta da/i, inós haraki/isa gari tleehh as heedaádá', asma tlakweema gaa tleéhh as tuua ngiwa kwatiít. Baalaarír kilae inós iri ooi, sagw'eé' aa malé hhohhooúy,

¹² nee tari paraatl as AAKOÓ MUNGÚ as deeloorós tidá' al'axweesani ngiwa qaás. Deelór geera ka faariiká asma se'eengós kudá' taa paraátl kwa meetagaás. Inós deelmoó gwaanda oo kurkú wák ngu ilahhooár dakuús hingeesár wa haniisi.

¹³ «Gaarí an dabér heé al'axweesani gaa oo', qoomár deeloorós tidá' tiwa paraátl bira fák. Inós kungu huwi dír afkú heémár Mungú,

¹⁴ nee AAKOÓ MUNGUÚWÓS ngu qeemúy huwi oo deelmoó gwaanda oo kurkú wák oo xaslxaansli wásl as tawa ilahhooár da/a, nee dereemír bee/i ar kurkú wák ar xaslxaansli wasl, as kawa haniisi tawa ilahhooár tlakweema hingeesa, nee gwaanduú xaslxaansli wásl as tawa ilahhooár wayda.

¹⁵ Nee sleeme kikaapamoó mikaátér taa sluuftisiiká nee maandaásoó puuruú natsaatsaá', nee di/i, nee mikaátér daqa ninakw ar taa sliík ar di/i, dinkwa nee ilahhooár balaangw, nee ilahhooár muruú wahaangw.

¹⁶ «Kaahamusmo AAKOÓ MUNGÚ guri muruuwí sleémeero i haniis dinkwa nee ilahhooár tlakweema hingeesa nee ilahhooár da/to.

¹⁷ Gwaanda gun ilahhooár waydú wa gaas dír AAKOÓ MUNGÚ, dinkwa nee kikaapamoó mikaátér taa sluuftisiiká, nee ilahhooár balaangw nee ilahhooár muruú wahaango.

¹⁸ Diirír afkú heémár Munguhe, heedaádá' al'axweesani gaa oo' se'eengós gun didá' wa deeqw nee guri qaas baraá asltadár bihhaá baraay dír kitángw ilahhooár wayda ar muruú ta tsu/i.

¹⁹ «Kaahamusmoó Mungú kwaahhár gwaanduudá' tidá' taa humín gan taataahh, nee mukaatmoó wák oo taa sluuftisiiká, guri baraá katatír wa taataahh, nee mukaatmoó daqa niiná oo taa sluuftisiiká, guri haniis gawaá dabaá heedaádá' al'axweesani gaa oo', alaá sagós kudá' taa hheehhe'eés kuwa deéqw.

²⁰ Aluuwo kaahamusmoó Mungú ilahhooarí gari gáwtí tlees as kawa haniisi dír AAKOÓ MUNGÚ. Muruuwí sleémeero hhohhó' oo kaahamusmoó Mungú dinkwa nee da/eewo, kudá' taa gáwtí tleés nee /aaramoó yaae, kudá' taa ilahhooár wa haniís. Alaá kaangwí sleémeerowo heedaádá' al'axweesani gaa oo' difaái ngiwa wahi i qoón.

²¹ «Gaarí an dabér heedaádá' al'axweesani ga oo' kus hariím, ilahhooarós dír AAKOÓ MUNGUHE masók i alqoná' nee al'axweesantós, nee muruú hatlá' i aleeslay haniisaro. Aqo adoodá' al'axweesantós ngira oó' gan boo/ees, adór dabeedá' kas hariím ar heé taa paraatl as AAKOÓ MUNGÚ.»

Tsuuqaá kaahamuusér Mungú

²² AAKOÓ MUNGÚ ina axweés dír Mose, iwa kaahi,

²³ «Aroni nee daaqaywós ki beer, ‹Adoorí an adór múk Israeli kur tsuuquunda'!

²⁴ AAKOÓ MUNGÚ nu tsuuqi nee nu xun,

²⁵ AAKOÓ MUNGÚ nu i qayti ar hhooeemaawós nee nu gurtlay.

²⁶ AAKOÓ MUNGÚ nuwa hhooay nee nu waydií haniisi.›

²⁷ «Adoorí an adór umuueé' kur oa' dír múk Israeliwo, aníng inooín ngiri tsuúq.»