FAARO 5 - Biblía Axweesantá Hhohho' ar Mungú 2004

Múk ta harmeetin

¹ AAKOÓ MUNGÚ ina axweés dír Mose iwa kaahi,

² «Múk Israeli ádbaweek umuú heewo oo tiqtír tsatmituú koóm ngu hingeesiye' baraá xafay'ín kuduú hotaawo, laqaá heé malalaáhh as tiqtír tsaatu'uuma, nee heé tuua gaa kwatiit.

³ Múk adór kwí tsee/a tay duxe' baraá xafayhunge, hhawaate nee /ameenaaro, as inooín xafay'ín munguwa meetagasiyé', kudá' aníng niwa baraá tla/angw'ín wa hoot.»

⁴ Múk Israeli adoorí gari tleéhh, mukdaádá' kuri duúx tsee/aá xafayduú hota. Adoodá' AAKOÓ MUNGÚ Mose ngwa báy ngina tleehhiyé'.

Hhu'uu'uungw as tlakweema kiwa tleéhh

⁵ Naagáy AAKOÓ MUNGÚ ina axweés dír Mose iwa kaahi,

⁶ «Múk Israeli ádbaweek, hhawaata laqaá /ameeni, barnaxés tlakweemakariya' kaa tleéhh AAKOÓ MUNGÚ guri máy haratlintaooro, heewí aa dakuús.

⁷ Inós gár kuwa hariím aqo tlakweemaawós kudá' aa tleéhh gin hhu'uu'ún, bu'utuú tir tu/i baraá dakuúsarose, a tidá' sleémeero ngiwa ki/isi, nee gár wák baraá muruú kooane gan dook dír heedaádá' aa sa dakuús.

⁸ Barnaxés heedaádá' taa sadakuús, aa gwaá', nee mar'afmoowós oo tseéw i kaahh oo bu'utuudá' gu óh, gimáy bu'utuudá' ku huwi dír AAKOÓ MUNGÚ as tawa oo kaahamusmoó Mungú, inós gwaanda ngu didií doogi as haraki/isa kawa tleehhi as tlakweemaawós.

⁹ Umuúqo ilahhooár hhoohhooe nee qeemuuwo, kudá' hhohhó' kudá' ta huwi amór kaahamusmoó Mungú, ilahhooarí sleémeero tari ar kaahamusmoowí.

¹⁰ Umuú gaa ar hhoohhoo' ar hee aa haniís dír AAKOÓ MUNGÚ, aqo ar kaahamusmo, nee umuú gaa ar hee i haniisi dír kaahamusmo aqo ar kaahamusmoowí sleeme.»

Sakwasleemár /ameenár aa inkihhimuú wasles dír hhawaateeine

¹¹ AAKOÓ MUNGÚ ina axweés dír Mose iwa kaahi,

¹² «Múk Israeli baweek: Barnaxes heeko hareerós aa hhiturút nee aa inkihhimu waslés dír hhawaatuwose,

¹³ nee tari qaát nee hhawaatuú hatlá', hhawaatuwós laqaá tam heé hatlá' oo kaangwí gu xuú' i kaahh, laqaá oo gaa oh, inós taa meetagás.

¹⁴ Barnaxes hhawaatuuwós xure gwaa eér nee da/i gwaa ót daanduú hareerós tidá' taa slasla/aresi tam hareerós taa slasla/areskahe,

¹⁵ naagáy hhawaata hareerós ngi huwi amór kaahamusmo nee ilahhooadá' ta slai adór puuruú angaánoó shayiíri ar gár wák baraá muruú mibaango, ala makawa dí/tí qaás, laqaá mooyángw tsuú', asma tawa ilahhooár balaangw ar hhawaata kudá' hareerós ga xurumiít. Ilahhooár ta haniisi as dakuús kawa tsaahhi.

¹⁶ «Kaahamusmoó Mungú /ameenidá' gay tseewees, nee gari geeraá AAKOÓ MUNGÚ i sihhtis.

¹⁷ Naagáy, ma'aydá' hhohho' giri tsipipi'iis baraá xooslmoó tleei nee teerír yaamu ar didá' hhoohhoo' gari qaas baraá ma'aydá' as ngiwa qarqareesi.

¹⁸ Kaahamusmo /ameenidá' gari dír geeraá AAKOÓ MUNGÚ i sihhtis nee gari saga kiis nee ilahhooadár balaangw tidá' ta haniisi as hhawaatuwós iwa xuruút gari dirós i haniis. Kaahamusmo xooslmooduú ma'aá qarqará' koóm, kudaá lo'o guri oh dakose.

¹⁹ Aluuwo Kaahamusmo /ameenidá' gari lo'ór /aymiis iwa kaahi, ‹Kiíng barnaxes aga qati'iiká nee hhawaatuú hatlá', nee tiri slasla/areská handá' kiíng aqo hhawaatuú koón, lo'o i eeraaká ar ma'ayka' qarqará'.

²⁰ Ala barnaxes kiíng aga tsuwa hhiturút handá' kiíng aqo hhawaatuú koón, tiri slasla/arés as tawa qaté' nee hhawaatuú hatlá' kuduú tsuwa hhawaatuwogeeká.

²¹ Daqaní kaahamusmo /ameenidá' ngi lo'ór /aymisi iwa kaahi: AAKOÓ MUNGÚ i lu'usi nee i slahh'eesi nee i lu'usi baraá tla/ángw mukose, kiíng masók an kampeeri tleehhít nee guruuwók i xir'iti.

²² Ma'aykaá lo'o guruuwók ngu xir'itisiye'.› «/Ameenidá' i o', ‹Amin, Amin.›

²³ «Naagáy kaahamusmoó Mungú lo'oodá' gari gooín baraá kitaábu nee gooidá' gari hamaatl baraá ma'aydá' qarqará'.

²⁴ Inós, /ameenidá' gari wahaas ar ma'aydá' qarqará' kudaá lo'o, ma'aydá' niri dahiyá' baraá guruuwós, nee guruuwós iri tsaat iri buuhh tiqtiro.

²⁵ Naagáy kaahamusmo ilahhooadár balaangw tidá' hhawaatuwós da/i nguwa ohiin gari gawaá dabaá /ameenidá' wa taataahh gari gáwtí tlees as kawa haniisi dír AAKOÓ MUNGÚ gawaá kitángw ilahhooa hanmis.

²⁶ Aluuwo tsa/oó wák oo puurú ilahhooadár inslaslaangw guri taataahh nee guri daa/ gawaá kitángw ilahhooa. Aluuwo /ameenidá' gari ma'aydá' qarqarár wahaas.

²⁷ Ma'aydá' bar ngaa wát, nee barnaxés taa slasla/arés nee aa inkihhimu waslés dír hhawaatuwose, ma'aydaá lo'o ngi slahha'muú úr i huwiyá', slaqwtós iri xir'imít nee guruuwós oo xwayla iri hhitirut. /Ameenirí tari /ameenír lo'o aa /ák baraá tla/ángw muko.

²⁸ Ala barnaxes /ameenidá' taa slasla/areská nee i dakuúsár koondaaká, inós gár ga aw i káhh, nee aqo na/ii gin sleér.

²⁹ «Naagáy gaarí an dabér sakwasleemár da/i, barnaxes /ameeni i hhawaatuú koón, aluuwo iri hhitirút tiri kilós slasla/arés,

³⁰ laqaá barnaxes hhawaata da/i gwaa eér nee iri xuruút daanduú hareerose. /Ameenidá' gan sihhtis dír geeraá AAKOÓ MUNGÚ, nee kaahamusmoó Mungú dabe sleémeero ar hara'ayaarí gari boo/ees adoodá' kar hariím.

³¹ Hhawaatuwós dakuúsár i kon i káhh tam ar niiná, ala /ameeni /atloowós gin tlú' as dakuúsarós.»