FAARO 4 - Biblía Axweesantá Hhohho' ar Mungú 2004

Gadiyér múk tlahhoó Laáwi oo guruú doó Kohati

¹ AAKOÓ MUNGÚ Mose nee Aroni gina i axweés, iwa kaahi,

² «Múk tlahhoó Laáwi oo guruú doó Kohati dimbé faareek ar adoodá' gur'ér maraá baabi'ii'ín i diri'.

³ Hhawaate sleémeero faareek iimír awa kureeri mibeeri tám wa oohang ay awa kureeri mibeeri kooán, kudá' handá' hariimá' baraá gadiyeérír heémár Munguhe.

⁴ Gaarí an gadiyér daaqoó Kohati, daanduú xooslaarí ló'wa hhohhoe.

⁵ «Qoomár bar lotá', Aroni nee daaqaywós ta dahi baraá heéma, nee inqwaaridá' dír geeraá sandakmoó alqado ka aweerisi, nee ngi sandakmoodár tuuntuukiye'.

⁶ Aluuwo ku daanda untsuusi ar kaahartá natsaatsaa' ar leei nee ar inqwaarír sirboo/. Xaaidá' kur loohisi ki daahasi baraá dungáywós.

⁷ «Daanduú meésár mikaátér Mungú ku untsuusi ar inqwaarír sirboo/, nee sahaánaay ku gawaadií qaasi, nee isangaoó ta mooyaángwí qamin, nee búklaaywo nee tsukumi'iiwo as ilahhooár muruú wahaangw. Umuúqo baalaaro masók gawaá daanduú meésaro mikaáte i deer.

⁸ Naagáy, xooslaarí sleémeero ka tuuntuuki ar inqwaarír daa/aat, nee kaahartá natsaatsaa' ar leei ka daanduuwós wa tuuntuuki. Aluuwo daqaní xaa'aá loohiso ki qaasi as loohiso.

⁹ «Inooín inqwaarír sirboo/ ka kitángw tsaa'asoórár tuuntuuki nee tsaa'asoorose, nee makaásaywós, nee iimpe nee xoosla sleémeero tidá' taa dí/tár qamaamin.

¹⁰ Muruuwí sleémeero ku dinkwaárí qaasi, baraá guruú kaahartá natsaatsaa' ar leei, nee ki qaasi gawaá xaaidaá loohiso.

¹¹ «Aluuwo inqwaarír sirboo/ ka tuuntuuki ar kitángw ilahhooa kuduú sahaábu, nee ku tuuntuuki ar kaahartá natsaatsaa' ar leei, aluuwo xaaidaá loohiso ki dahaasi baraá dungáydá'.

¹² Xoosla sleémeero kar tlay tidá' tar gadiyumaamisi didá' hhoohhoó' wa ale, nee ka tseegi baraá inqwaarír sirboo/ nee ka tuuntuuki ar kaahartá natsaatsaa' ar leei, daqaní ka qaasi gawaá xaaidaá loohiso.

¹³ Da/ara ka hingeesi gawaá kitángw ilahhooaro nee inqwaarír sirdaa/aat ka gawaá daandudií hhafi.

¹⁴ Xosluudá' tar gadiyumaamisi didár kitángw ilahhooaro sleémeero ka qaasi gawaá daanduuwós. Muruú ta mooyángw tsuú' i da/a/an, nee muqslár sihhnaá kooma nee hhaansi'i nee búklaaywo. Aluuwo gawaawose kaahartá natsaatsaa' ar leei ka hhafi, nee xaa'aá loohiso ki dahaasi.

¹⁵ Ala Aroni nee daaqaywós didá' hhoohhoo' birnga hhe'eesiyé' tuuntuukaro dinkwa nee xoosla sleémeerowo, nee qoomár birta amohhe'eesiyé' aai iimu/uumaaro, múk guruú doó Kohati tindi hardihi as heéma kawa gagaari. Ala inooín xooslár hhohho' makawa kwatiít, as matawa qaátl. Gaarí an gadiyér múk guruú doó Kohati qoomár barta heémár Mungú loohatimis.

¹⁶ «Eleasari garmoó kaahamusmo Aroni, di/tá tsaa'aso gan amohhe'eemiis, nee mooyángw tsuú', nee ilahhooár balaangw oo umuú daqi nee di/tá tar iimbalaxan, nee umuúqo gár taa paraatli ar baraá heémadá' nee didá' hhoohhoo' nee xosluuwose.»

¹⁷ Naagáy AAKOÓ MUNGÚ Mose nee Aroni gina i axweés, iwa kaahi,

¹⁸ «Múk guruú doó Kohati mukuwa hhaamiís baraá tla/ángw múk tlahhoó Laáwiwo.

¹⁹ Adoorí an adór inooín kir alee/is as kahhó' niwa slafiya', mindiwa qatliyé' as niwa tseewuyé' dír xosluudá' ló'wa hhohho'. Aroni nee daaqaywós ta dahi umuú heewo ku gadiyeérós i qasiisi nee xooslaarós ar i loohisi.

²⁰ Ala xwaylár Kohati miwa baloó dát tam adór niiná nee tari xooslár xuxu'úngw áy, adoorí birnga tleehhiyé' ta qaatl.»

Gadiyér múk tlahhoó Laáwi oo guruú doó Gershoni

²¹ AAKOÓ MUNGÚ Mose guna i axweés iwa kaahi,

²² «Múk guruú doó Gershoni faareek ar adoodá' gur'ér maraá baabi'ii'ín i diri'.

²³ Hhawaate sleémeero faareek iimír awa kureeri mibeeri tám awa oohang ay awa kureeri mibeeri kooán, kudá' hariimá' baraá gadiyeérír heémár Munguhe.

²⁴ Gadiyér múk guruú doó Gershoni a tí nee huwár i loohisiia:

²⁵ Inooín tuuntuukumár didá' hhoohhoo' ngin loohisiyá' nee tuuntuukumár heémár Mungú, nee kaahartá natsaatsaa' ar leei, tidá' taa daanduudár tuuntuúk, nee inqwaarír afkú heémár Mungú.

²⁶ Nee inqwaarudá' ta tarereín nee him'er'ine, kudá' taa afeenírár harweér nee didá' hhoohhooe, nee kitángw ilahhooa, nee inqwaaruú ta tarereín dír afkú dahma, nee xoosla sleémeero ar tar gadiyumaamisi. Inooín gadiyér'ín an muruú adór kwí.

²⁷ Aroni nee daaqaywós an múk gadiyér múk guruú doó Gershoni ga hara'ayiyiím daanduú muruudá' sleémeero ta loohisi nee gadiyeé sleémeero ar ta tlehhiiti. Muruudá' hariím lohisor'ine qoomeemeseek.

²⁸ Gaarí an gadiyeedaá hhay Gershoni i tlehhiitiya' dír heémaadár Munguhe. Inooín kin geerahaar nee Itamari, garmoó Aroni kaahamusmoó Mungú.

Gadiyér múk tlahhoó Laáwi oo guruú doó Merari

²⁹ «Múk guruú doó Merari faareek sleeme ar adór gur'ér maraá baabi'ii'ín i diri'.

³⁰ Hhawaate sleémeero faareek iimír awa kureeri mibeeri tám wa oohang nee ay awa kureeri mibeeri kooán, kudá' hariimá' baraá gadiyeérír heémár Munguhe.

³¹ Gadiyér'ín sleémeero a tí: Nahhtá heémár Mungú ngin loohisiyá', nee waqasuuwo, nee uheemiiwo, nee yukmáy'ine.

³² nee uheemaá afeeni nga harweeriye' bihhe sleémeerowo, nee yukmáy'ine, nee kika'aarose, nee him'eerose, dinkwa nee xoosla sleémeero nee xoslaá tar gadiyuusi sleémeero. Kuúng inooín ki xooslár loohisoórí qoomeemés ar adoodá' inooín i dirii'iya'.

³³ Gaarí an gadiyeedaá hhay Merari i tlehhiitiya' baraá guruú heémaadár Munguhe. Inooín kin geerahaar nee Itamari, garmoó Aroni kaahamusmoó Mungú.»

Faarór tlahhoó Laáwi

³⁴ Naagáy, Mose nee Aroni nee geeraharuusér dinku'uumadá' muu sleémeero kuri faár oo guruú doó Kohati, ar adoodá' gur'ér maraá baabi'ii'ín i diri'.

³⁵ Muu sleémeero kuna faár iimír múk kureeri mibeeri tám wa oohang ay awa kureeri mibeeri kooán, umuúqo heewo oo hariím baraá gadiyeérír heémár Munguhe.

³⁶ Faaror'ín ar adoodá' gur'ér maray'ín i diria a muu kume tsár nee tsiire faanqw nee mibeeri kooán.

³⁷ Gaarí an faarór hhay Kohati, kudá' naa dír heémár Mungú wa gadiyusiye', kudá' taa faár nee Mose nee Aroni ar adoodá' AAKOÓ MUNGÚ Mose ngura hara'ayín.

³⁸ Faarór hhay Gershoni ar adoodá' gur'ér maraá baabi'ii'ín i diria,

³⁹ iimír awa kureeri mibeeri tám wa oohang ay awa kureeri mibeeri kooán, kudá' hariimá' gadiyeérír heémár Munguhe,

⁴⁰ faaror'ín ar adoodá' gur'ér maray'ín i diria a kume tsár nee tsiire lahhoó' nee mibeeri tám.

⁴¹ Gaarí an faarór hhay Gershoni kudá' naa dír heémár Mungú wa gadiyuusiye', kudá' taa faár nee Mose nee Aroni ar adoodá' AAKOÓ MUNGÚ Mose ngura hara'ayín.

⁴² Faarór hhay Merari ar adoodá' gur'ér maraá baabi'ii'ín i diria,

⁴³ iimír awa kureeri mibeeri tám wa oohang ay awa kureeri mibeeri kooán, kudá' hariimá' gadiyeérír heémár Munguhe,

⁴⁴ faaror'ín ar adoodá' gur'ér maray'ín i diria a kume tám nee tsiire tsár.

⁴⁵ Gaarí an faarór hhay Merari kudá' naa dír heémár Mungú wa gadiyuusiye', kudá' taa faár nee Mose nee Aroni, ar adoodá' AAKOÓ MUNGÚ Mose ngura hara'ayín.

⁴⁶ Gawaá adoorihe, múk tlahhoó Laáwi oo taa gooín nee Mose, nee Aroni nee geeraharuusér múk Israeliwo, ar adoodá' gur'ér maraá baabi'ii'ín i diria,

⁴⁷ iimír awa kureeri mibeeri tám wa oohang ay awa kureeri mibeeri kooán, kudá' handá' hariimá' gadiyeede nee gadiyér huwa loohiso ar heémár Mungú.

⁴⁸ Inooín dinkwaaro a kume dakaát nee tsiire kooán nee mibeeri dakaát.

⁴⁹ Umuú heewo kuna gadiyeédí sláy ar i tleehhi nee loohisór heémár Mungú ar adoodá' AAKOÓ MUNGÚ Mose ngura hara'ayín.