FAARO 36 - Biblía Axweesantá Hhohho' ar Mungú 2004

Aalír /ameenár taa duxuút

¹ Geeraharuusér guruú doó Gileadi, garmoó Makiri, garmoó Manase, garmoó Yosefu, tana tláy amór Mose tawa axweesi nee geeraharuusér hatlá' ar tlahh'aá xoorór Israeli.

² Tari oó', «Aakoorén, AAKOÓ MUNGÚ kuúng una báy, ‹Yaamaá múk Israeli qasiseek ar tsawdo, tawa yaamaá inooín ta aali.› AAKOÓ MUNGÚ uri báy, ‹Dasuú hhiyaarén Selofehadi qaweek aalír baabuúine.›

³ Ala inooín birka duxuút nee múk tlahhoó hatlá' oo Israeli, daqaní aalir'ín amór atén gan geexeér, iri warqeér amór tlahhaydá' kay duxuút. Gawaá adoorihe aalír bartarén iri /aaruúr.

⁴ Slám baraá kurkuduú inslaslaango kudá' taa tlaxún kuwa ki/imisi, aalír dasuú Selofehadi, tidá' taa harafaár amór tlahhi'iidá' kay duxuút, ni amoorén i ki/iká, nee múk tlahhayrén aalirí ga baloó slayká.»

⁵ Naagáy Mose hara'ayár amór AAKOÓ MUNGÚ daahh gari oó' dír múk Israeli, guri báy, «Geeraharuusér tlahhoó Yosefu, looeema gina ó'.

⁶ Nee adoorí an adoodá' AAKOÓ MUNGÚ aa hara'ayín daanduú dasuú Selofehadiwo: Ki hhoo' kiwa duxuuti nee umuúqo heé ni slaiia, ala ki duxuuti baraá guruú tlahhoó dooín.

⁷ As kahhó' aalír múk Israeli makawa warqeés amór tlahhoó hatlá', umuúqo heé Israeliwo kaangwí ngu alqaytsiti adór aalirós tar baraá tlahhoó guruú do'ós.

⁸ Umuúqo /ameenír aali gaa sleeri baraá tlahh'aá Israeliwo, aqo kan duux nee heé tlahhaywós, as kahhó' umuúqo heé Israeliwo aalír baabi'ii'ín ngiwa slay.

⁹ Gawaá adoorihe umuúqo tlahhaywo aalir'ín ka warqeesiiká amór tlahhoó hatlá'. Umuúqo tlahhoó Israeliwo aalír guruú dooín gan oh.»

¹⁰ Dasuú doó Selofehadi adoodá' AAKOÓ MUNGÚ ngira hara'ayín dír Mose gina tleehhiyé'.

¹¹ Dasuú doó Selofehadi: Mala, nee Tirsa, nee Hogla, nee Milka nee Noa kina duxuút nee daaqoó hha'aá baabuúín.

¹² Inooín kina duxuút baraá guruú tlahhoó doó Manase garmoó Yosefu, nee aalir'ín aqo baraá guruú tlahhoó doó baabuúín.

¹³ Kaangwí an hara'aya nee dabe tidá' AAKOÓ MUNGÚ aa haniís dír xoorór Israeli ar dákw Mose baraá xatstá Moabu wa ale, bihhaá yaaér Yordani, didá' nee gixsár Yeriko ti ga/aawá'.