FAARO 35 - Biblía Axweesantá Hhohho' ar Mungú 2004

Gixsadaá tlahhoó Laáwi

¹ AAKOÓ MUNGÚ ina axweés dír Mose baraá xatsaá Moabu wa ale, amoodár gayuú yaaér Yordani, tidá' nee Yeriko ti ga/aawá', iwa kaahi,

² «Múk Israeli ádbaweek baraá aalir'ín tidá' ta slaya, múk Laáwi ku qay gixsadaá ta hooti dinkwa nee qawtani sleémeero ar gixsaduudá' gaa harwedi as tawa qawtantá bee/angw'ín.

³ Gixsaduuká' tari kooín, inooín nin baraadá' wa hootiyá', nee qawtanaydá' oo hikwaaín nee oo makay'ín sleémeero awa ta kona.

⁴ Yaamudaá qawtani awa ta hanisa' dír tlahhoó Laáwi, iimír koo/ír gixsaduuín tiwa qoomese' nari saweesiyá' miíta tsiire tsiyáhh nee mibeeri kooán umuúqo barto.

⁵ Gawaá adoorihe yaamudaá qawtani qoomoó uray'ín a miíta tsiire gwaleél umuú bihheero, nee gixsadu ngin harweeriyá', gixsa kari tla/ángwár kees. Yaamuuká' tari qawtanta'ín ar bihhér gixsaduín.

⁶ Gixsadaá ta dír tlahhoó Laáwi hanisa' a dinkwa nee gixsadaá lahhoó' awa tay gogoowi, as heé hee gwa pa/aayór wa gaas iwa baraadií gowi. Gixsadaá hatlá' awa mibeeri tsiyáhh nee tsár ki didií dogá'.

⁷ Gixsadaá ta dír tlahhoó Laáwi hanisa' dinkwaaro a mibeeri tsiyáhh nee dakaát. Gixsaduuká' hanisaak dinkwa nee yaamaá qawtanta'ine.

⁸ Baraá faarór gixsadaá xoorór Israeli aa ali, awa ta haniisi dír tlahhoó Laáwi, masók i alqoná' nee faarór múk tlahhaay. Tlahhoó muu yaariír gixsadaá yaariir kin haniis. Umuúqo tlahhoó muu niiná gixsadaá i haniisi ki niina. Umuúqo tlahhaywo baraá gixsaduuín kudá' taa aali tlahhoó Laáwi kun qáy ar adoodá' gixsaduuín i dirii'iya'.»

Gixsadaá tay gogoowi

⁹ AAKOÓ MUNGÚ ina axweés dír Mose, iwa kaahi,

¹⁰ «Múk Israeli ku beer, qoomár bara waarahhé' yaaér Yordaniro, nee tari daté' yaamaá Kana'ani,

¹¹ daqaní gixsadaá ti gogoowi ki tsawdá' as kuungá', as kahhó' hee bar kuqá' ngwa gaás ar pa/aayo, iwa guwi baraá gixsaduudá'.

¹² Gixsaduuká' an wa/aamér ti gogoowi as hee iwa /uy, as kahhó' heedaádá' kundayra/aát mukuwa gaás nee heedaádá' li/oó bu'utá wa slaá', dír hee ira hardihiiká dír kwasleemár bariise.

¹³ Gixsadaá lahhoó' paraatlaak as tawa dír guwaay.

¹⁴ Baraá gixsadaá lahhooe, awa tám amór gayuú da/aáw oo yaaér Yordani ti wa sleere', nee awa tám masók i baraá yaamaá Kana'ani.

¹⁵ Gixsaduká' lahhooamaawo a dír xoorór Israeli ta i gogoowi dinkwa nee hoomár baraá ayaaín hoota, nee dahaayér deelór niinawe ar nee inooín aldinkwa. Umuúqo heé hee gwaa gaasi ar pa/aayo guwaywós a baraá gixsaduká'.

¹⁶ «Ala bar hee kuqá' ngwa slaáhh ar muqsli iri gwaá', heewí a tsu/utusmo, nee inós gár kuwa hariím a kun gaas.

¹⁷ Umuúqo heewo oo hee gwaa dalaa/ ar tlaa/ano, iri gwaá', heewí a tsu/utusmo, gár inós kuwa hariím a kun gaas.

¹⁸ Barnaxes gár ngura slaáhh a hhara iri gwaá', heewí a tsu/utusmo, nee hariímaro a kun gaas.

¹⁹ Heé guruú doó kudá' taa gaás an heé li/aay gu buú' oo heedaádá' kunday ra/aát nguwa gaasi, bar ta sadoogiye' nee kwí a qo gun gaas.

²⁰ «Tam sleeme hee kuqá' bur ngwa gurúr sií' guri gin/iís, laqaá guri giír, guri geeleéhh ar garka,

²¹ laqaá guna tuú' ar kundaay iri gwaá', naagáy heewí hee gwaa tuu' ar kundaay iri gwaá' a tsu/utusmo, nee gár kuwa hariím aqo kun gaas. Heé guruú doó kudá' taa gaás an heé li/aay gu buú' bir taa sa doogiyé'.

²² «Ala bar hee kuqá' ngwa gin/iís nee baraawose i aahhír konká, laqaá burngwa geeleéhh ar loohír nguwa gigdinká,

²³ laqaá bar hee tlaa/anoó hee gu gaás gwaa tsaxaár ar adór ira tsabinká, inooín gár tar kahhi bir káhh nee heedaádá' aa tsu/uut bar adoodá' ngira tsabinká,

²⁴ naagáy bariise kángw heedaádá' kundayra/aát nee heedádá' li/oó bu'utuú wa slaá' gun tsát, kuduú guruú doó heé taa gaás, adoodá' dabeerí i kat.

²⁵ Bariise heedaádá' gun tú/ gawaá dabaá heedaádá' li/oó bu'utuú wa sla'a, kuduú guruú doó heé taa gaás, nee heé aáng kuri ki/is baraá gixsaadár guwaay, too aáng aa i goów. Baraadá' gin wa hoot ay dír kaahamusmoó Mungú i gwaai kudá' qoomaadae taa tsawaár, kuri iimbalaax ar di/tá hhohho'.

²⁶ Ala barnaxes heewí kundayra/aát digimuú gixsadá' aa i goów gwa sa waaraáhh,

²⁷ nee barnaxes heedaáduú guruú do'dá' taa hee gaás, kooaáng kundayra/aát ngwa sláy tsee/aá gixsadár guway wa ale, aqo gun gaas, daqaní heedaadá' i dakuúsár konká.

²⁸ Asma heewí kundayra/aát aqo in hoot baraá gixsaadár guwáy wa ale, ay dír kaahamusmoodá' úr i gwaai. Ala bar kaahamusmoó úr oo Mungú aa gwaá', heewí kundayra/aát aqo in waatl ayaawós.

²⁹ Kaangwí an kaahi nee dabér kuungá' tar gadiyusa' baraá xwaylarhúng sleémeero dír tawa qo hota'a.

³⁰ «Barnaxes hee hee gwa gaás, heedaádá' aa tsu/uut gár kuwa hariím a gaasa, bar lamabu'uungw daanduwose i deer, ala heé ta gaasi ar lamabu'úngw heé wák i kaahh.

³¹ Heé aa tsu/uut oo kwasleemarós taa gwa'araár i tsaát bar gár hhiintluuwós ngur tu/i ngi hanmiis ma oohara', inós aqo gaasa.

³² Umuúqo heewo oo aa goow baraá gixsadaá tay gogoowi gár hhiintluuwós gu tuu/ ma ya/amara' kawa ota', as iwa ki/i amór do'ós bar kaahamusmoó úr oo Mungú oo qoomaadá' aa gwaaiiká.

³³ Ala barnaxes adoosíng aga tlehhé' yaamuuká' ta hota' iga hhitiindé'. Tseerdu birna ku'uutiyé' yaamu ngi hhitiná' ilahhooár ta haniisi ar yaamaá tawa tsu/uút harihhoó' ngir slaya' i kaahh, aqo heedaádá' aa tsu/uut kun gaas.

³⁴ Yaamuuká' ta hota' mi hhitiimara', kuká' án niwa baraá tla/angwhúng wa hoot, asma anuú AAKOÓ MUNGÚ an hoót baraá tla/ángw múk Israeli wa ale.»