FAARO 34 - Biblía Axweesantá Hhohho' ar Mungú 2004

Digeemaá yaamu

¹ AAKOÓ MUNGÚ ina axweés dír Mose iwa kaahi,

² «Múk Israeli hara'ayimeek ku beer, qoomár bara daté' baraá yaamaá Kana'ani, yaamuudá' ni kuungií haniis kiwa ala', digeemaá ayeemoodá' a adoorí:

³ Yaamuuhúng bihhaá basko xaanxoó Sini ngun bahh haraoohiyá', niri hardihiyá' digmuú yaamaá Edomu. Digmuú yaamuuhúng oo bihhaá basa, bihhaá da/aawe dír niwa tlay a afkú Tlawtá Diwi.

⁴ Digmuuhúng iri baskú xuu', bihhaá basa awa tloomár Akrabimu, iri waaraahh ar Sini, ay bihhaá basa awa Kadesh-barnea, iri kumiit ay Hasar-adari, iri hardah Asmoni.

⁵ Digmuuhúng birna Asmonír wa tláy iri warqáy, iri yaaér Misrír xuu', yaaeedár Misri gan eehar, iri dalaa/ ay Tlawtá Tla/aangw.

⁶ «Digmuuhúng oo bihhaá /uwa a Tlawtá Tla/aangw, gaarí an digmuuhúng bihhaá /uwaawo.

⁷ «Digmuuhúng bihhaá /iiko a adoorí: Dír Tlawtá Tla/aangw wa tleemu alhooresmo ku qasá' ay tloomár Hori.

⁸ Tloomár Hori wa tleemu alhooresmo kuri qasá' ay waarahhmuú Hamati, nee iri kumiit ay Sedadi,

⁹ nee iri waaraahh ay Sifroni iri alhhe'eesuut Hasar-enani. Adoorí an adór digmuuhúng i dirii'i bihhaá /iiko.

¹⁰ «Digmuuhúng bihhaá da/aawe alhooresmo un qasá' iimír Hasar-enani ay Shefamu.

¹¹ Shefamu ngin wa tláy nari báskwí ti'iit ay Ribla, bihhaá da/aáw aa Aini, digmuuwí in tlaatláy baraay ay /etángw da/aáw oo tlawtá Kinereti.

¹² Aluuwo iri /eet yaaér Yordani gari alkón iri alhhe'eesuut tlawtá Diwi. Gaarí an digeemaá yaamuuhúng ngaa harweeriye'.»

¹³ Naagáy Mose múk Israeli guri i axweés, guri báy, «Gaarí an yaamuudá' ta ala' ar tsawdo, yaamuuká' an kudá' AAKOÓ MUNGÚ aa oó' ngiwa haniisi dír tlahhi'iidá' gwaleél nee tlaqi.

¹⁴ Múk tlahhoó Reubeni nee gur'ér maraá baabi'ii'ine nee tlahhoó Gadi nee gur'ér maraá baabi'ii'ine nee tlaqtá tlahhoó Manasewo yaamaá aalir'ín kaa sláy.

¹⁵ Tlahhi'iiká' tsár nee tlaqtí yaamuuín awa aali kina sláy gayuú da/aáw oo yaaér Yordani, kudá' nee Yeriko ti ga/aawá' amoodá' tsee/amá niwa ti'imiiti.»

Geeraharuusér qasmisuú yaamu gu sagesihhiit

¹⁶ AAKOÓ MUNGÚ in axweés dír Mose iwa kaahi,

¹⁷ «Gaarí an umér múk yaamu gi qasmiís dír muu as kiwa aali: Kaahamusmo Eleasari nee Yoshua garmoó Nuni.

¹⁸ Umuúqo tlahhaywo geeraharusmoó wák huweek as yaamu kiwa qasmiisi tawa aalirhúng.

¹⁹ Umer'ín a tí: Baraá tlahhoó Yudawo a Kalebu garmoó Yefune.

²⁰ Baraá tlahhoó Simeonwo, a Shemueli garmoó Amihudi.

²¹ Baraá tlahhoó Benyaminiwo a Elidadi garmoó Kisloni.

²² Baraá tlahhoó Daniwo, a Buki garmoó Yogli.

²³ Baraá guruú doó Yosefuwo, tlahhoó Manase, geraharusmo a Hanieli garmoó Efodi.

²⁴ Baraá guruú doó Yosefuwo tlahhoó Efraimu, geeraharusmo a Kemueli garmoó Shiftani.

²⁵ Baraá tlahhoó Sebuluniwo geeraharusmo a Elisafani garmoó Parnaki.

²⁶ Baraá tlahhoó Isakariwo geeraharusmo a Paltieli garmoó Asani.

²⁷ Baraá tlahhoó Asheriwo geeraharusmo a Ahihudi garmoó Shelomi.

²⁸ Baraá tlahhoó Naftaliwo geeraharusmo a Pedaheli garmo Amihudi.

²⁹ «Mukwí an kudá' AAKOÓ MUNGÚ aa hara'ayín yaamaá Kana'ani ngiwa qasiisiya' dír múk Israeli tawa aalir'ín.»