FAARO 32 - Biblía Axweesantá Hhohho' ar Mungú 2004

Tlahha'aá yaaér Yordaniro bihhaá da/aáw

¹ Múk tlahhoó Reubeni nee oo tlahhoó Gadi a daqaarér hikwa. Inooín kana ár adór yaamaá Yaseri nee Gadi tar yaamaá qawtantá hikwa.

² Tlahhi'iiká' Mose nee kaahamusmoó Mungú Eleasari nee geeraharuusér dinku'uuma, kiri báy,

³ «Gixsaduuká' ta bay Ataroti nee Diboni nee Yaseri, nee Nimra nee Heshboni, nee Eleale, nee Sebamu nee Nebo nee Beoni,

⁴ kuká' AAKOÓ MUNGÚ aa hayóh as múk Israeli, a yaamaá qawtantá hikwaá wa hhoo', ateékaá sagadiyuuseerók hikwa i koomaán.

⁵ Kuúng bar atén taa gurií bá/, yaamuuká' atén i haniisang kiwa aalaan, nee atén miti waarahhasaar gayuú yaaér Yordani.»

⁶ Mose mukuú tlahhoó Gadi nee oo Reubeni giri mu/aywaáts, iri oó', «Xáy a sla'á'a kuungá' tawa diirií meta', nee múk Israeli, hhaeehúng, tawa tlay baraá slaqwara?

⁷ Ahaá waáy, múk Israeli muhar diqay tlaqá' niwa dahiya' baraá yaamuudá' AAKOÓ MUNGÚ aa haniís dir'ín?

⁸ Adoosíng an adoodá' baabi'iihúng naa tleehhiyé' qoomár ngiwa ya/aáw baraá Kadesh-barneár wa ale as yaamuká' ngiwa tsawtsawuusiya'.

⁹ Inooín tana tláy ay baraá xatstá Eshkoli, yaamu kiri ár, ala tindiwa kií/, múk Israeli kuna diqay tsaát as kahhó' matawa dáh baraá yaamuudá' AAKOÓ MUNGÚ aa inooínár slaá'.

¹⁰ AAKOÓ MUNGÚ baalaarihe iri daa/atúy buhhtaawo, lo'o gari /aáy, iri oó',

¹¹ ‹Looeemaawo umuúqo heé naa baraá yaamaá Misrír wa ti'iit, oo kureeraá mibeeri tsár wa oohang oo yaamuudá' naa lo'ór wa /aáy ngiwa haniis dír Abrahamu, nee Isaka nee Yakobo, heé gi ár i kaahh. Asma inooín naa iialooeesi'iiká aníng iwa eehariya'.›

¹² Sleémeero yaamuudá' ngi ariaaká, aqo har Kalebu garmoó Yefune, oo guruú doó Kenisi, nee Yoshua garmoó Nuni, asma inooín nina ló'wa iialooeesiyé' ar inkihhimu AAKOÓ MUNGÚ nguwa eehariya'.

¹³ AAKOÓ MUNGÚ ina daa/atúy buhhtaawo amór múk Israeli, giri baraá xaanxáy wa harweeritamaamís kureeri mibeeri tsiyáhh, qartadá' sleémeero tlakweema gaa tlehh dír geeraawose iri hhaán.

¹⁴ Hamí daxta kuungaá qartá tlakuuse, kitángw baabi'iihúng una eeré', as buhhtaá AAKOÓ MUNGÚ kiwa doga' gawaá daanduú múk Israeli.

¹⁵ Barnaxes aga sié' inós eeharto, inós kuungá' nun baraá xaanxaywí geexáy. Mukwí sleémeero kuri hhaamisá'.»

¹⁶ Naagáy Mose kuri i daqáy, kuri báy, «Áx kuúng ya/aám atén maraá bee/angwrén kiwa tleehhaan, nee gixsadaá na/iirén kiwa diirií tleehhaan.

¹⁷ Ala atén tin amohhe'eesaán xosluurén kiwa oohaan awa tleemuú baraá slaqwara, nee tiwa alkoomaan nee múk Israeli hhaeerén. Atén tari hhayuú geera baraá slaqwaraaro, ay dír ki hardahasaan didár hotaaín. Qoomaarihe na/iirén i baraá gixsadaá taa harweér ar koo/ír gawit, as kahhó' múk ayaawí gi i haratlayká.

¹⁸ Atén a watlanaaká amór marayrén ay dír múk Israeli sleémeero wa/aameedá' ta qasiisi ngi aaliya'.

¹⁹ Atén nee inooín gár ta dinkwárí aalaan i káhh gayuú yaaér Yordaniro, asma atén yaamu iga slawaán gayuuwí wa ale, bihhaá da/aáw awa yaaér Yordani.»

²⁰ Mose giri báy, «Barnaxes adoosíng a tlehhá', hamír kilá' xooslár slaqwara diirír geeraá AAKOÓ MUNGÚ tiwa taatahhe'.

²¹ Umuúqo heé slaqwaraaro xooslaarós ar slaqwara ngi taataahhi, yaaér Yordani ngi geeraá AAKOÓ MUNGÚ wa waaraahhi, an slaqwá' nee wakuuserhúng ay dír AAKOÓ MUNGÚ nuy baalírí haniisi,

²² nee yaamu ngiri hayotá', adoorí bara hhe'esé', ni ki/á', asma daqaní hariímarhúng aga hardahasé' dír geeraá AAKOÓ MUNGUHE nee dír múk Israeli kukaá hhaeehúng. Daqaní AAKOÓ MUNGÚ yaamukaá da/aáw hará' Yordaniro ngi haniis tawa koohúng.

²³ Ala barnaxés kuungá' adoosíng aga tlehhi'iiká, daqaní a AAKOÓ MUNGÚ un tlakweemáy tlehhitá', ala xuaak tlakweemaahúng kwisingá' kuungá' nu slayá'.

²⁴ Gimsé' gixsadaá na/iihúng tleehhaak nee awa bee/angwhunge, ala al'axweesantahúng tidá' boo/eesaak.»

²⁵ Naagáy múk tlahhoó Gadi nee oo Reubeni Mose nguri bayé', «Atén a sagadiyuuseerók adoodá' kuúng taa beér an tleehhaán.

²⁶ Tlaawayrén nee na/iirene, nee bee/angwrene, nee hikwaarene in geexawaán baraá gixsadaá Gileadi.

²⁷ Ala ateékaá sagadiyuuseerók taa amohhe'eesaán slaqwaraaro AAKOÓ MUNGÚ tiwa geerahari. Tay waaraahhaán gayuú yaaér Yordani, nee tay slaqwaán ar adoodá' kuúng ngira ó'.»

²⁸ Naagáy Mose hara'aya gari oó' dír kaahamusmo Eleasari, nee dír Yoshua garmoó Nuni, nee dír geeraharuusér uren ar tlahh'aá múk Israeli.

²⁹ Giri báy, «Barnaxes múk tlahhoó Gadi nee oo Reubeniwo taa waaraáhh gayuú yaaér Yordani, nee kuungane nee bar naa slaqwiyé' AAKOÓ MUNGÚ gaa geerahaár, nee slaqwaraaro bara baaliindé', yaamu ngiri hayoté', daqaní yaamaá Gileadi ki hanisá' tawa aalir'ín.

³⁰ Ala barnaxés waarahhamuú gayuú yaaér Yordani ngu slaiiaaká oo tiwa alkoondá' nee kuungá' nee xosluuín kudaá slaqwaraaro, daqaní yaamu ngi slaye' baraá Kana'anír wa aleeró, dinkwa nee kuungá'.»

³¹ Múk tlahhoó Gadi nee oo Reubeni kuri mu/aywaáts, tari oó', «Ateéká' sagadiyuuseerók adoodá' AAKOÓ MUNGÚ taa báy an tleehhaán.

³² Atén ar geeraharu'uumár AAKOÓ MUNGUHE, an waaraahhaán nee xosluurén awa slaqwaraaro ay yaamaá Kana'ani, ala yaamuurén kukaá da/aáw Yordaniro tinda haniís aqo aalirén.»

³³ Naagáy Mose yaamu giri haniís dír múk tlahhoó Gadi nee oo Reubeni nee tlaqtá tlahhoó Manase garmoó Yosefu, yaamu sleémeero awa waawutmo Sihoni oo Amori nee yaamaá waawutmo Ogu oo Bashani dinkwa nee gixsadaá yaamuudá' ngaa harweeriye'.

³⁴ Múk tlahhoó Gadi gixsaduín kiri tleéhh dír ta bay Diboni, nee Ataroti nee Aroeri,

³⁵ nee Atrot-shofani nee Yaseri nee Yogbeha,

³⁶ nee Bet-nimra nee Bet-harani. Gixsaduuká' a gixsadaá koo/i gawden nee slumaá bee/angw'ín i dayá'.

³⁷ Múk tlahhoó Reubeni gixsaduín kina tleéhh baraá Heshboni, nee Eleale, nee Kiriataimu,

³⁸ nee Nebo, nee Ba'al-meoni (umér gixsaduuká' kana warqeés), nee Sibma. Inooín umér gixsaduudá' naa tleehhiyé' ngina warqeesiyé'.

³⁹ Xwaylár Makiri garmoó Manase tana haratláy ay Gileadi, múk Amori kuri tlatlahhaás, yaamuuín kudá' ta hooti kiri hayóh.

⁴⁰ Gawaá adoorihe, Mose múk guruú doó Makiri, garmoó Manase, guri yaamuudaá Gileadírí haniís, inooín tari yaamuudá' wa hoót.

⁴¹ Yairi, garmoó Manase, yaamaá Gileadi gina i haratláy ayeemoowós giri bahh hayóh, giri umií tsaát, giri báy, Hawot-yairi.

⁴² Heé ta bay Noba ina haratláy baraá yaamaá Kenati nee ayeemoowose, ngiri hayóh, giri umuuwós oo kilá' ar ateét, yaamuudá' giri báy Noba.