FAARO 31 - Biblía Axweesantá Hhohho' ar Mungú 2004

Slaqwarár hhohho' daanduú múk Midiani

¹ AAKOÓ MUNGÚ ina axweés dír Mose iwa kaahi,

² «Múk Midiani li/ay ti bu' oo muruudá' inooín naa tleehhiyé' dír múk Israeli, aluudae kuúng a kahhút.»

³ Mose muu guri báy, «Muu amohhe'eesaak oo haratláw slaqwaraaro amór múk Midiani li/ay kuwa bui as AAKOÓ MUNGÚ.

⁴ Umuúqo tlahhoó Israeliwo, múk baraá slaqwararií daqáw a kumuú wák.»

⁵ Baraá tla/ángw slaqwaruusér kumér yaariir ar Israeliwo baraá umuúqo tlahhaywo múk kumuú wák kunguna sláy, slaqwaruuse dinkwaaro a kume mibaá nee tsár.

⁶ Mose mukwí kumuú wák oo umuúqo tlahhaay guri ya/aáw baraá slaqwara, dinkwa nee Finehasi garmoó Eleasari, kaahamusmoó Mungú. Inós i xooslár kón ar didá' hhoohhoo', nee tarumbeétár laya kar laqan.

⁷ Tana slaáqw nee múk Midiani, adoodá' AAKOÓ MUNGÚ ngira oó' dír Mose, hhawaate sleémeero kiri tsuú/.

⁸ Baraá múk taa tsu/i oo kooán a waawituú Midiani. Waawitaadá' a kwí: Efi nee Rekemu, nee Suri, nee Huri, nee Reba. Bala'amu garmoó Beori sleeme kuna gaás.

⁹ Múk Israeli /ameenár Midiani nee na/ii kiri haasaáng wa huúw, dinkwa nee hikwa nee bee/aangw nee umuúqo gár ta kona.

¹⁰ Gixsaduuín sleémeero, nee wa/aamér hotaaine, nee xafaywo sleémeero kiri daáhh, kiri daá/ ar asla.

¹¹ Ala muruudá' sleémeero kunguna haasaáng wa ar tláy, muu nee hikwaawo,

¹² kiri huúw amór Mose, nee amór Eleasari kaahamusmoó Mungú, nee amór dinku'uumár múk Israeli sleémeero, tidá' baraá xafáy dirii', baraá xatstá Moabu, gayuú Yordani, didá' nee Yeriko ti ga/aawá'.

Tindiwa baraá slaqwarár wa waátl

¹³ Mose nee kaahamusmoó Mungú Eleasari, nee geeraharuuse sleémeero ar dinku'uumár múk Israeli tana ti'iít baraá xafay'ín wa ale, slaqwaruuse kari al'áy.

¹⁴ Mose ina buúhh amór geeraharuusér slaqwaruuse, tidá' naa baraá slaqwarár wa watl, tidá' slaqwaruusér kume nee ar tsiire gaa geerahat.

¹⁵ Mose giri yaahaás, «/Ameenarí sleémeero ana slafíngwí meerí'i?

¹⁶ Iinslawiimé' adór /ameenarí kángw Bala'amu ngura iiárií qás, múk Israeli nguri al/ayiyé' amoodár Peoriro, AAKOÓ MUNGÚ nguri si'iyé', múk AAKOÓ MUNGÚ tiqtír pu/i guri uhiín.

¹⁷ Gawaá adoorihe, na/aá daaqaay sleémeero tsu/aak, nee umuúqo /ameenír nee hhawaata naa alqatii'i gaasaak.

¹⁸ Ala dasuú nee hhawaate taa alqaatiiká mu tsu/aara', mawaak i hooti as kuungá'.

¹⁹ Umuúqo heé hee gwaa qo gaasi baraá tla/angwhunge, laqaá kudá' tuuár hee gaa kwatiit, i tsee/aá wa iwiwiti ay deelo faanqw, miwa dáh baraá xafi. Bál tám nee bál faanqwe ti hheehhe'ese' kuungá' dinkwa nee mukhúng kudá' naa haasaáng wa hubi'i.

²⁰ Gár hariim a umuúqo tlawuuwo un hheehhe'esá' sleeme, nee umuúqo gár taa tleehhi ar kaahari, nee gár taa qo tleéhh ar se'éngw aara, laqaá ar taa tleehhi ar xa'ano hheehhe'eesaak.»

²¹ Kaahamusmoó Mungú Eleasari, hhawaatedaá xoorór Israeli naa baraá slaqwarár wa ki/iye' giri báy, «Gaarí an dawa oo AAKOÓ MUNGÚ aa hara'ayín dír Mose:

²² Sahaábu nee muqslár peesaaro nee muqslír sirdaa/aat nee muqslaro nee mabaátiro nee tlaa/aá ta harsaásír tlehhahhiti.

²³ Muruudá' sleémeero asla i /akká hhohhoeesaak ar asla, daqaní aa hhoohhooúy. Tam adoorihe muruudá' a hheehhe'eesa ar ma'aydaá hheehhe'eemis. Mura' sleémeero kudá' baraá asltií qaasa ga ya/aamaaká, ku hheehhe'eesi ar ma'aydaá hheehhe'eemis.

²⁴ Bál faanqwe tlabaahúng in hhuntsá', daqaní kuungá' aga hhoohhouuré', daqaní ta datá' baraá xafi.»

Haasaáng kuwa qasmiisi

²⁵ AAKOÓ MUNGÚ Mose guri i axweés iwa kaahi,

²⁶ «Kuúng nee kaahamusmo Eleasari, nee geeraharuusér tlahh'aá Israeli, muruudá' tinda haasaáng wa huúw faaraak, muu nee makaywo.

²⁷ Haasaáng qasisaak baraá bohhaá tsár, boohhár wák ar slaqwaruuseedá' slaqwarár daahh, nee boohhár tsár ar dinku'uumár múk Israeli sleémeero.

²⁸ Dír boohhadár mukdá' slaqwarár dahha, gár wák baraá tsiire kooane paraatleek tawa ar AAKOÓ MUNGÚ. Dír boohhár muko, laqaá hikwa, laqaá daqwaaye, laqaá ar bee/aangw, laqaá ar aara,

²⁹ haniseek dír kaahamusmo Mungú Eleasari tawa ilahhooár AAKOÓ MUNGÚ.

³⁰ Ala dír boohhadá' ta haniisi dír múk Israeli, gár wák baraá mibeeraá kooane an dúx baraá muko, laqaá hikwa, laqaá daqwaaye, laqaá bee/aangw laqaá aara. Daqaní ka hanís dír tlahhoó Laáwi kudá' gadiyuusá' baraá heémár AAKOÓ MUNGÚ wa ale.»

³¹ Mose nee kaahamusmo Mungú Eleasari adoodá' AAKOÓ MUNGÚ ngira hara'ayín kana tleéhh.

³² Slaqwaruuseedá' muruú tinda haasaáng wa huúw a bee/aangw kume tsiire lahhoó' nee mibeeri faanqw nee kooán.

³³ Hikwa a kume mibeeri faanqw nee tsár.

³⁴ Daqwaaye a kume mibeeri lahhoó' nee wák.

³⁵ Nee dasuú nee hhawaate naa alqaati'iiká a kume mibeeri tám nee tsár.

³⁶ Tlaqtá taa haniís dír slaqwaruuseedá', a bee/aangw kume tsiire tám, mibeeri tám nee faanqw nee tsiire kooán.

³⁷ Baraá muruuwihe oo taa dír AAKOÓ MUNGÚ i haniís a bee/aangw tsiire lahhoó' mibeeri faanqw nee kooán.

³⁸ Hikwaá taa haniís dír slaqwaruuse a kume mibeeri tám nee lahhoó'. Baraá hikwakae awa taa dír AAKOÓ MUNGÚ i haniís a mibeeri faanqw nee tsár.

³⁹ Daqwaayér taa haniís dír slaqwaruuse a kume mibeeri tám nee tsiire kooán. Baraá daqwaayeerihe ar taa dír AAKOÓ MUNGÚ i haniís a mibeeri lahhoó' nee wak.

⁴⁰ Nee baraá muko dasuú taa slaqwaruusér i haniís a kume mibaá nee lahhoó', nee baraá kukae awa taa AAKOÓ MUNGÚ i haniís a mibeeri tám nee tsár.

⁴¹ Naagáy Mose muruuwí guri haniís dír kaahamusmo Mungú Eleasari tawa ilahhooár AAKOÓ MUNGÚ, adoodá' AAKOÓ MUNGÚ Mose ngura hara'ayín.

⁴² Tlaqtá boohhadá' taa haniís dír múk Israeli, tidá' Mose aa paraátl dír tooaáng taa slaqwaruuseérí haniisi,

⁴³ a bee/aangw kume tsiire tám nee mibeeri tám nee faanqw nee tsiire kooán,

⁴⁴ nee hikwa a kume mibeeri tám nee lahhoó',

⁴⁵ nee daqwaaye a kume mibeeri tám nee tsiire kooán,

⁴⁶ nee dasuudá' nee hhawaate taa alqatiiká a kume mibaá nee lahhoó'.

⁴⁷ Baraá qoomayduú tlaqi oo taa múk Israélírí haniisi, Mose baraá haasaánguú hikwaá mibeeraá kooane, nee baraá haasaánguú múk mibeeraá kooane, ar wák gana haniís dír tlahhoó Laáwi, kudá' gadiyumaamisá' baraá heémár Mungú wa ale, adoodá' AAKOÓ MUNGÚ ngira hara'ayín.

⁴⁸ Geeraharuusér slaqwaruuse tidár slaqwaruusér kume gaa geerahat, nee ar tsiireero, tana amór Mose káy.

⁴⁹ Mose kuri báy, «Ataá sagadiyuuseerók mukduú slaqwara sleémeero ugwa faaraán, kudá' atén taa geeraharaharaán, naxés tam heé wák oo kaáhh i kaahh.

⁵⁰ Hám daxta umuúqo heewo direne muruuwí nguna huúw tawa ilahhooár AAKOÓ MUNGÚ. Xooslaá sahaábu, nee himtaawe nee bangeélaywo, nee munga'aá baraá ditsa' ta layárár qamina, nee saaqaán nee kwasluuwo, adoodá' umuú heewo ngira sláy. Muruuwí ngun haniisaán as atén tiwa haraki/isárií tleehhi dír geeraá AAKOÓ MUNGUHE.»

⁵¹ Mose nee kaahamusmoó Mungú Eleasari muruudá' sleémeero taa tleéhh ar sahaábu kuna ilaaóh.

⁵² Sahaábu sleémeero oo geeraharuusér slaqwaruusér kume nee ar tsiire aa hanís dír AAKOÓ MUNGÚ a kílo tsiire tsár.

⁵³ Ala umuú slaqwarusmoowo haasaánguuwós guna ar tláy.

⁵⁴ Naagáy, Mose nee kaahamusmoó Mungú Eleasari sahaábudá' taa ilaaóh dír geeraharuuseedár slaqwaruusér kumér wa ale nee ar tsiire, kuri huúw baraá heémár Mungú as tawa gár AAKOÓ MUNGÚ gu inslawtamis daanduú múk Israeliwo.