FAARO 30 - Biblía Axweesantá Hhohho' ar Mungú 2004

Dabér al'axweesani

¹ Aluuwo Mose geeraharuusér tlahh'aá Israeli gari báy, «Kaangwí AAKOÓ MUNGÚ nguna hara'ayín:

² Hee barnaxes al'axweesani gaa oó' dír AAKOÓ MUNGÚ, laqaá bar lo'o gana /aáy ar al'axweesani ngiwa tseék, inós gár kuwa hariím a al'axweesantadá' gan boo/ees ar adór al'axweesantadá' afkose aa káh.

³ «Dasír doó baabuúwós i kaahh bar al'axweesantós ar tseegamo gaa qás dír AAKOÓ MUNGÚ,

⁴ nee bar baabuúwós al'axweesantí gaa axaás, laqaá al'axweesantós tidá' tira tsék, nee inós gár ngaa báy i káhh, daqaní al'axweesantá dasiidá' i adoodá' i káhh.

⁵ Ala bar baabuúwós al'axweesantí gaa axaás, gari sií', daqaní al'axweesantí i gawaá daanduú dasiiriheeká. AAKOÓ MUNGÚ inós gan gurtláy asma baabuúwós kangós kwí guna sií'.

⁶ «Slám bar dasiirí aa duuxór eér alaá al'axweesantós ngiwa qás, laqaá al'axweesani gana ó' ala taa alqaytiiká tari kilós ilá/,

⁷ aluuwo hhawaatuuwós kaangwí guri axaás, ala gwaa si'iiká, al'axweesantós tí aa ó' i adoodií káhh, nee al'axweesantós tí aa tsék i adoodií káhh.

⁸ Ala bar hhawaatuwós kaangwí gwaa axaás guri sií', daqaní al'axweesantí hareerós aa tawo ó' aa alqaytsitká, hhawaatuudá' gan warqees, inós AAKOÓ MUNGÚ gan gurtláy.

⁹ «Ala al'axweesantá tseegamo, laqaá umuúqo al'axweesanto ar /ameenír kwaalo'o aa qás, laqaá aa ó', laqaá tam /ameenír hhawaatuuwós aa sií' bar al'axweesantós gaa ó', laqaá gaa qás, al'axweesantí i adoodií káhh.

¹⁰ «/Ameenír taa duúx bar al'axweesani gaa qás, laqaá al'axweesani birnga tsék ar lo'o,

¹¹ nee hhawaatuuwós kaangwí gwaa axaás guri alxasliít, daqaní al'axweesantós tidá' sleémeero aa qás i adoodií káhh. Umuúqo al'axweesantá aa tsegi i adoodií káhh.

¹² Ala hhawaatuuwós bar kangós kwí ngwa axaás guri warqeés, laqaá guri sií', daqaní tam geera inós al'axweesantós ngi boo/eesár wa sla'a, laqaá gadaádá' aa al'axweesantá wa tsék, daxta ga boo/eská asma hhawaatuuwós gaa warqeés, nee AAKOÓ MUNGÚ inósadá' gan gurtlay.

¹³ Hhawaatuwós ga aleesláy al'axweesantí ngiwa ya/an, laqaá ngiwa si'i al'axweesantí sleémeero aa tsék.

¹⁴ Ala barnaxés hhawaatuuwós gár i kaahi i káhh baalaadár kilá' al'axweesantadá' hareerós aa ó', laqaá aa tsék ngiwa axaás, naagáy daqaní hhawaatudá' al'axweesantadá' gaa ya/án, asma gár aa oó' i káhh.

¹⁵ Ala bar kaangwí gwaa axaás alaá deelór niinawe guri sií' nee guri warqeés, naagáy daqaní dakuúsadár hareerós i gawaá daanduuwós.»

¹⁶ Kaangwí an kaahidá' AAKOÓ MUNGÚ aa hara'ayín dír Mose daanduú hhawaata nee hareerós, nee baabá nee dasiirós qoomár kawa niiná iwa doó baabuúwós i kahh.