FAARO 3 - Biblía Axweesantá Hhohho' ar Mungú 2004

Daaqoó Aroni

¹ Mukwí an xwaylár Aroni nee Mose qoomár AAKOÓ MUNGÚ iwa axweés nee Mose gawaá tloomár Sinaír wa ale.

² Umér daaqoó Aroni a tí: Nadabu a garmaawós oo baris, nee Abihu, nee Eleasari nee Itamari.

³ Mukwí kuna paraátl nee kuri iimbalaáx ar di/i, asma tawa kaahamuusér Mungú.

⁴ Ala Nadabu nee Abihu nina qatliyé' dír geeraá AAKOÓ MUNGÚ, qoomár AAKOÓ MUNGÚ nguwa baraá xaanxoó Sináír wa ilahhooár mooyángw tsuú i da/iyé' ar asltá hhoohhooeeká. Inooín na/aá naa laqwaaliyé' i kahhiyá', gawaá adoorihe Eleasari nee Itamari gadiyér kaahamusi'iimár Mungú ngina tleehhiyé' iimír qoomár Aroni baabuúín iwa slafi.

Tlahhoó Laáwi kuwa tsawaár as kaahamuusér Mungú ngiwa sagadiyuusiya'

⁵ Aluuwo AAKOÓ MUNGÚ Mose guna i axweés iwa kaahi,

⁶ «Múk tlahhoó Laáwi diirí tseeweesang, ki dír geera kaahamusmo Aroni i sihhtís as inós nguwa sagadiyuusiya'.

⁷ Inooín ta gadiyusi kitángw Aroni wa ale as dinku'uuma sleémeero baraá heémár Mungú didaádá' hhoohhoo'.

⁸ Inooín xoosla sleémeero ar heémár Mungú ngin xuná' nee ngin amohhe'emisiyá'. Inooín múk Israeli ngun alee/imisiyá' qoomár muu bir gadiyuus didá' hhoohhoó' wa alé.

⁹ Múk tlahhoó Laáwi ku hanís dír Aroni nee xwaylarós tidár kaahamuusér Mungú, mukwí kunguna duúx baraá tla/ángw múk Israeliro as muu nguwa sagadiyuusiya'.

¹⁰ Aroni nee daaqaywós tsawaareek as gadiyer'ín tidár kahamuusi'iima ngiwa boo/eesiya', ala barnaxés heé hatlá' aa tseewúy bihhaadií ale, ku gasá'.»

¹¹ AAKOÓ MUNGÚ Mose guna i axweés, iwa kaahi,

¹² «Ga/aaweek hamí múk tlahhoó Laáwi ugwa tsawaár tla/ángw múk Israeli sleémeero, kitángw na/oó baris oo umuú do'o baraá múk Israeliwo. Múk tlahhoó Laáwi a kwe'eé',

¹³ asma na/oó baris baraá Israeliwo a kwe'eé'. Qoomár na/aá baris ngiwa tsuú/ sleémeero awa múk Misri, aníng na/aá barís ina paraátl baraá Israeliwo, umuú na/oó baris oo hee laqaá oo makiito'oro. Inooín a kwe'eé'. Aníng an AAKOÓ MUNGÚ.»

Múk tlahhoó Laáwi kuwa faár

¹⁴ Aluuwo AAKOÓ MUNGÚ Mose guna i axweés qoomár iwa baraá xaanxoó Sinaír i dirii'i, iwa kaahi,

¹⁵ «Múk tlahhoó Laáwi faareek adoodá' tlahhay'ín nee maray'ine i dirii'iya', hhawaate sleémeero iimír na/oó slahhángw wák wa oohang ay kudá' uren.»

¹⁶ Naagáy Mose giri faár ar adoodá' AAKOÓ MUNGÚ ngura ádbáy.

¹⁷ Daaqoó Laáwi a kwí: Gershoni nee Kohati, nee Merari.

¹⁸ Umér daaqoó Gershoni ar adoodá' gur'ér dooín i diria a tí: Libni nee Shimei.

¹⁹ Umér daaqoó Kohati ar adoodá' gur'ér dooín i diria a tí: Amramu nee Ishari, nee Hebroni, nee Usieli.

²⁰ Umér daaqoó Merari ar adoodá' gur'ér dooín i diria a tí: Mahli nee Mushi. Gaarí an tlahhoó Laáwi adoodá' gur'ér maray'ín i diria.

²¹ Múk guruú doó Gershoni an xwaylár Libni nee Shimei, mukwí an oo guruú doó Gershoni.

²² Hhawaate sleémeero kina faár iimír na/oó slahhángw wák wa oohang ay kudá' uren, dinkwaaro a hhawaate kume faanqw nee tsiire kooán.

²³ Múk guruú doó Gershoni, xafay'ín ngu tleehhiye' bihhaá /uwa, alaá heémaadá' hhoohhoo',

²⁴ nee Eliasafu garmoó Laeli an geeraharusmoó múk guruú doó Gershoni.

²⁵ Gadiyér daaqoó Gershoni a heémár hhoohhoo' amohhe'eemis, heémaadá' dinkwa nee tuuntukumaarose, nee inqwaaridár afkú heémár Mungú,

²⁶ nee inqwaruudá' taa tarereín tla/ángw heémadá' hhoohhoo' nee kitángw ilahhooa, nee inqwaaridár dír afkú dahmaá afeeni, nee him'eerose. Gadiyeérí sleémeero a inooín ngin tleehhiyá'.

²⁷ Múk guruú doó Kohati an xwaylár Amramu nee Ishari, nee Hebroni, nee Usieli. Inooín an awa guruú doó Kohati.

²⁸ Hhawaate sleémeero kina faár iimír na/oó slahhángw wák wa oohang ay kudá' uren, dinkwaaro a kume dakaát nee tsiire lahhoó'. Inooín didá' hhoohhoo' ngin wa gadiyuusiyá'.

²⁹ Múk guruú doó Kohati xafay'ín ngu tleehhiye' bihhaá basa awa didá' hhoohhoo',

³⁰ nee Elisafani, garmoó Usieli an geeraharusmoó guruú doó Kohati.

³¹ Gadiyér'ín an sandakmoó alqado amohhe'eemis, nee meésa, nee kitángw tsaa'aso kay qamaamin, nee kitángw ilahhooa nee xoosladár didá' hhoohhoo' ar tar gadiyuusi nee kaahamuuse, nee inqwaruú tarereiingw. Gadiyeduuká' sleémeero inooín ngin tlehhiitiyá'.

³² Nee Eleasari garmoó Aroni, kaahamusmoó Mungú kuna qaás tawa geeraharusmoó múk urén baraá tlahhoó Laáwiwo, nee sagesihhtusmoó múk gadiyuús didá' hhoohhoó' wa ale.

³³ Múk guruú doó Merari a xwaylár Mahli nee ar Mushi, inooín awa guruú doó Merari.

³⁴ Hhawaate sleémeero kina faár iimír na/oó slahhángw wák wa oohang ay kudá' urene, dinkwaaro a kume lahhoó' nee tsiire tsár.

³⁵ Geeraharusmoó guruú doó Merari a Surieli garmoó Abihaili. Inooín xafay'ín nguna tleehhiyé' bihhaá /iya awa heémaadá' hhoohhoo'.

³⁶ Gadiyér'ín a peehhoó heémaadá' hhoohhoo' amohhe'eemis, nee waqas, nee uheemi, nee yukmi'iidaá uheemiwo, nee xoslu sleémeero awa heémaadá' kara óh, gadiyeé sleémeero ar peehhoó heémaarí hhoohhoo' a inooín ngin tlehhiitiyá'.

³⁷ Inooín sleeme uheemidá' afeeni kara harweér ngina amohhe'eemisiyé' nee yukumáydae, nee kika'aaro, nee hhutlemiiwose.

³⁸ Mose nee Aroni nee daaqay'ine kina slaá' xafay'ín nguwa tleehhiya' dír geeraá heémaadá' hhoohhoo' bihhaá da/aáw wa ale, amoodá' tsee/amá iwa ti'imiiti. Gadiyér'ín dír kawa tleehhi a didaádá' hhoohhoo', nee umuúqo gár tleehhamór sla'a as xoorór Israeli. Barnaxés heé hatlá' aa tseewúy bihhaadá' aqo kun gaas.

³⁹ Tlahhoó Laáwi dinkwaaro ar adoodá' maray'ín i diri'iia, hhawaate sleémeero iimír na/oó slahhángw wák wa oohang, ar adór Mose nee Aroni ngira faarii'i, adoodá' AAKOÓ MUNGÚ ngira ádbáy, faaror'ín a kume mibeeri tsár nee tsár.

Kitángw daaqoó baris kuna óh nee tlahhoó Laáwi

⁴⁰ Naagáy AAKOÓ MUNGÚ Mose guri báy, «Na/aá baris awa daaqaay sleémeero awa múk Israeli iimír slahhángw wák wa oohang nee awa ngaa ba/iye' faareek ar umer'ín.

⁴¹ Kuúng múk Laáwi paraatleek as anuú AAKOÓ MUNGÚ kitángw na/aá baris sleémeero awa xoorór Israeli, nee sleeme hikwaaín paraatleek as aníng kitángw na/aá barisuú wa alé awa hikwaá múk Israeli.»

⁴² Naagáy Mose na/aá baris sleémeero awa múk Israeli gina faár adoodá' AAKOÓ MUNGÚ ngira oó'.

⁴³ Na/aá baris sleémeero awa daaqaay adoodá' kira faari ar umer'ín, iimír na/oó slahhángw wák wa oohang nee awa ngaa ba/iye', inooín a kume mibeerí tsár nee tsár nee tsiire tsár nee mibeeri faanqw nee tám.

⁴⁴ AAKOÓ MUNGÚ iri axweés nee Mose iwa kaahi,

⁴⁵ «Hamí daxta múk Laáwi sleémeero paraatleek as tawa muk'eé' kitángw na/aá baris awa múk Israélír wa ale. Nee sleeme hikwaá múk Laáwi sleémeero paraatleek kitángw tsa/eetaá baris awa hikwaá múk Israélír wa ale. Aníng an AAKOÓ MUNGÚ.

⁴⁶ Na/aá baris awa daaqaay awa múk Israeli kudaá tsiire tsár nee mibeeraá faanqw nee tám, as kiwa tu/i, kudá' handá' faarór hhawaataá múk Laáwi ba/a.

⁴⁷ Shekeéli kooán ooheek daanduú umuúqo heewo ar qoomoó didaádá' hhoohhoo', tidá' handá' alqoomá' nee gadaádá' ta bay geéra mibeeri tsár,

⁴⁸ nee peésaarí ar tu/utá mukdá' aa harwaaraahh ka hanís dír Aroni nee daaqaywós.»

⁴⁹ Gawaá adoorihe Mose peésaadár tu/utá mukdá' aa harwaaraahh dír faarór múk tlahhoó Laáwiwo gari burumbuúr.

⁵⁰ Peésaadá' gana ilaaóh dír na/aá baris awa Israeli, peésa dinkwaaro a shekeéli kumuú wák tsiire tám nee mibeeri lahhoó' nee kooán, ar qoomoó didaádá' hhoohhoo'.

⁵¹ Mose peésaadá' mukdá' kura tuú/ gari haniís dír Aroni nee daaqaywós, adoodá' axweesantá AAKOÓ MUNGÚ i diri', nee ar adoodá' AAKOÓ MUNGÚ Mose ngura hara'ayín.