FAARO 29 - Biblía Axweesantá Hhohho' ar Mungú 2004

Ilahhooár deelór ur ar kurkú /abén

¹ «Slahhángw faanqw bál bar wak, dinku'uumár hhoohhoo' ka tlehhá', baalaarihe ma gadiyuusara'. Tarumbeéta baalaarihe an ufhhá'.

² Ilahhooár da/a an hanisá' tawa slaahhareeraá tsuuá' awa AAKOÓ MUNGÚ ngu sla'atamiisá'. Gár ta hanisa' a awuú wák oo batlitamo nee gwaanduú wák, nee deeloó gwaandaawe faanqw oo kurkú wák, kuká' sleémeero masók ki xaslxaansli wasl.

³ Ilahhooár balaangw an hanisá' ar puuruú natsaatsaá' oo taa aledoók nee di/i, awu kun kílo tám alhaniis, gwaanda kun kílo tsár alhaniis,

⁴ nee deelayduú gwaandaawe faanqwamaawo, umuúqo deelmoowo kun kílór wák alhaniis.

⁵ Sleeme gurtuú wák un hanisá' tawa ilahhooár tlakweema hingeesa as haraki/isarhúng kawa tleehhi.

⁶ Ilahhooarí an hanisá' dinkwa nee ilahhooár da/a ar slahhángw /abén, nee ilahhooarós ar balaango, nee ilahhooadár da/a tidár umuú baala, nee ilahhooarós ar balaango, nee ilahhooár muruú wahaangw, ilahhooarí ka da/á' as tawa slaahhareeraá tsuuá' awa AAKOÓ MUNGÚ ngu sla'atamiisá'. Adoorí ka tleehhi ar adoodá' dabe i diri'.

Ilahhooár baalár haraki/isa kawa tleehhi

⁷ «Slahhángw faanqw bál bar mibaangw an baalár hhoohhoo' dirhunge. Baalaadae kuungá' an gwaawindá' nee ma gadiyuusara'.

⁸ AAKOÓ MUNGÚ un ilahhooár dá/tí hanisá', tawa slaahhareeraá tsuuá' awa inós ngu sla'atimiisá'. Awuú wák oo batlitamo nee gwaanduú wák nee deeloó gwaandaawe faanqw oo kurkú wák. Sleémeero masók ki xaslxaansli wasl.

⁹ Ilahhooár balaangw an hanisá' ar puuruú natsaatsaá' oo ta aleedoók nee di/i, awu kun kílo tám alhaniis, gwaanda kun kílo tsár alhaniis.

¹⁰ Nee deelayduú gwaandaawe faanqwamaawo umuú deelmoowo kun kílo wák alhaniis.

¹¹ Gurtuú wák un hanisá' tawa ilahhooár tlakweema hingeesa dinkwa nee ilahhooadár tlakweema hingeesa as haraki/isarhúng, dinkwa nee ilahhooár da/a tidár umuú baala, nee ilahhooarós ar balaangw nee ilahhooarós ar muruú wahaangw.

Ilahhooár deelór ur ar isleeri

¹² «Slahhángw faanqw bál bar mibaá nee kooán, dinku'uumár hhoohhoo' ka tlehhá'. Baalaarihe ma gadiyuusara'. Deeloorí ur an AAKOÓ MUNGÚ i tlehhá' ay deelo faanqw.

¹³ Ilahhooár da/a an hanisá' tawa slaahhareeraá tsuuá' awa AAKOÓ MUNGÚ ngu sla'atimiisá', muruú ta hanisa' a kwí: Awér batlaay mibaá nee tám, nee gwaandaawe tsár, nee deeloó gwaandaawe mibaá nee tsiyáhh oo kurkú wák. Sleémeero masók ki xaslxaansli wasl.

¹⁴ Ilahhooár balaangw an hanisá' ar puuruú natsaatsaá' oo taa aledoók nee di/i, baraá aweedá' mibaá nee tame umuúqo awuuwo un kílo tám alhanisá' nee umuúqo gwaanduwo un kílo tsár alhanisá'.

¹⁵ Nee baraá gwaandaawedá' mibaá nee tsiyahhe umuúqo gwaanduwo un kílór wák alhanisá'.

¹⁶ Nee gurtuú wák un hanisá' tawa ilahhooár tlakweema hingeesa. Dinkwa nee tihe ilahhooár da/a tidár umuú baala nee ilahhooarós ar balaango, nee ilahhooarós ar muruú wahaango makawa máy.

¹⁷ «Bál tsare muruú ta ilahhooár wa hanisa' a kwí: Awér batlaay mibaá nee tsár, nee gwaandaawe tsár, nee deeloó gwaandaawe mibaá nee tsiyáhh, oo kurkú wák, masók ki xaslxaansli wasl,

¹⁸ dinkwa nee ilahhooár balaangw nee ar muruú wahaango, an aweedá' alhanisá', nee gwaandaaweero nee deeláyduú gwaandaawe, adoodá' hariímár faaror'ín i diri'.

¹⁹ Sleeme gurtuú wák un hanisá' tawa ilahhooár tlakweema hingeesa. Dinkwa nee tihe ilahhooadár da/a tidár umuú baala nee ilahhooarós ar balaango, nee ilahhooarós ar muruú wahaango makawa máy.

²⁰ «Bál tame muruú ta ilahhooár wa hanisa' a kwí: Awe mibaá nee wak, nee gwaandaawe tsár, nee deeloó gwaandaawe oo mibaá nee tsiyáhh oo kurkú wák, masók ki xaslxaansli wasl.

²¹ Dinkwa nee ilahhooár balaangw nee ar muruú wahaangw an aweedá' alhanisá', nee gwaandaaweero, nee deelayduú bee/aango adoodá' hariímár faaror'ín i diri'.

²² Sleeme gurtuú wák un hanisá' tawa ilahhooár tlakweema hingeesa. Dinkwa nee tihe ilahhooár da/a tidá' umuú baala, nee ilahhooarós ar balaango nee ilahhooarós ar muruú wahaango makawa máy.

²³ «Bál tsiyahhe muruú ta ilahhooár wa hanisa' a kwí: Awe mibaangw nee gwaandaawe tsár, nee deeloó gwaandaawe oo mibaá nee tsiyáhh, oo kurkú wák, masók ki xaslxaansli wasl.

²⁴ Dinkwa nee ilahhooár balaangw, nee ar muruú wahaangw an aweedá' alhanisá', nee gwaandaaweero, nee deelayduú gwaandaawe adoodá' hariímár faaror'ín i diri'.

²⁵ Sleeme gurtuú wák un hanisá' tawa ilahhooár tlakweema hingeesa. Dinkwa nee tihe ilahhooadár da/a tidár umuú baala, nee ilahhooarós ar balaango nee ilahhooarós ar muruú wahaango makawa máy.

²⁶ «Bál kooane muruú ta ilahhooár wa hanisa' a kwí: Awe gwaleél, nee gwaandaawe tsár, nee deeloó gwaandaawe mibaá nee tsiyáhh oo kurkú wák, masók ki xaslxaansli wasl,

²⁷ dinkwa nee ilahhooár balaangw, nee ar muruú wahaango an aweedá' alhanisá' nee gwaandaaweero nee deelayduú gwaandaawe adoodá' hariímár faaror'ín i diri'.

²⁸ Sleeme gurtuú wák un hanisá' tawa ilahhooár tlakweema hingeesa. Dinkwa nee tihe ilahhooadár da/a tidár umuú baala, nee ilahhooarós ar balaango nee ilahhooarós ar muruú wahaango makawa máy.

²⁹ «Bál lahhooe muruú ta ilahhooár wa hanisa' a kwí: Awe dakaát nee gwaandaawe tsár, nee deeloó gwaandaawe mibaá nee tsiyáhh oo kurkú wák, masók ki xaslxaansli wasl.

³⁰ Dinkwa nee ilahhooár balaangw, nee ar muruú wahaango an aweedá' alhanisá', nee gwaandaawedá' nee deeláyduú gwaandaawe adoodá' hariímár faaror'ín i diri'.

³¹ Sleeme gurtuú wák un hanisá', tawa ilahhooár tlakweema hingeesa. Dinkwa nee tihe ilahhooadár da/a tidár umuú baala, nee ilahhooarós ar balaangw, nee ilahhooarós ar muruú wahaango makawa máy.

³² «Bál faanqwe muruú ta ilahhooár wa hanisa' a kwí: Awe faanqw, nee gwaandaawe tsár, nee deeloó gwaandaawe mibaá nee tsiyáhh oo kurkú wák, masók ki xaslxaansli wasl.

³³ Dinkwa nee ilahhooár balaangw nee ar muruú wahaangw an aweedá' alhanisá' nee gwaandaawedá' nee deeláyduú gwaandaaweero adoodá' hariímár faarorín i diri'.

³⁴ Sleeme gurtuú wák un hanisá' tawa ilahhooár tlakweema hingeesa. Dinkwa nee tihe ilahhooadár da/a tidár umuú baala, nee ilahhooarós ar balaango nee ilahhooarós ar muruú wahaango makawa máy.

³⁵ «Bál dakaate ti burumbude', dinku'uumár hhoohhoo' ka tlehhá'. Baalaarihe ma gadiyuusara'.

³⁶ Ilahhooár da/a an hanisá' kuwa da/a' ar asla tawa slaahhareeraá tsuuá' awa AAKOÓ MUNGÚ ngu sla'atamiisá. Muruú ta hanisa' a kwí: Awuú wák, nee gwaanduú wák, nee deeloó gwaandaawe oo faanqw oo kurkú wák, masók ki xaslxaansli wasl.

³⁷ Dinkwa nee ilahhooár balaangw, nee ar muruú wahaangw an awuudá' alhanisá' nee gwaanduudá' nee deelayduú gwaandaawe, adoodá' hariímár faaror'ín i diri'.

³⁸ Sleeme gurtuú wák un hanisá' tawa ilahhooár tlakweema hingeesa. Dinkwa nee tihe ilahhooadár da/a tidár umuú baala, nee ilahhooarhúng tidár balaango nee ilahhooarós ar muruú wahaango makawa máy.

³⁹ «Ilahhooarí sleémeero an hanisá' dír AAKOÓ MUNGÚ baraá deelorhúng tidá' uren taa hara'ayini. Dinkwa nee tihe ilahhooarhúng tidár al'axweesanto, nee ilahhooarhúng tidár sla'aariro, nee ilahhooarhúng tidár muruú da/a, nee ilahhooarhúng tidár balaango, nee ilahhooarhúng tidár muruú wahaango, nee ilahhooarhúng tidár wayduwo, ma mawaar.»

⁴⁰ Naagáy Mose muruudá' sleémeero AAKOÓ MUNGÚ aa dirósí hara'ayín guri oó' dír múk Israeli.