FAARO 28 - Biblía Axweesantá Hhohho' ar Mungú 2004

Ilahhooár daqisleém

¹ AAKOÓ MUNGÚ iri axweés dír Mose iwa kaahi,

² «Múk Israeli adoorí tir hara'ayiin, ku beer, ‹Kuungá' ilahhooar'eé' haniisare' qoomaadá' taa qaasi ar muruú /aymár ta da/a/an ar asla, kudá' slaahhareeriiwós aníng i sla'atamiisá'.›

³ «Ki beer, ilahhooadá' ni dir'eéní hanisa' ar asla a tí, deeloó tsár oo gwaandaawe oo kurkú wák oo xaslxaansli wásl, oo ni hanimisa' umuú baalaaro.

⁴ Deelmoó wák oo gwaanda matlaatleero kun haniis, nee deelmooduú gwaanda oo tsár kun haniis tsiindoowo.

⁵ Umuúqo deelmowo kun alhaniis nee ilahhooár balaangw ar kílór wák ar puuruú natsaatsaá' oo taa aledoók nee liítár wák ar di/i.

⁶ Ilahhooarí ar umuú baala ar ta da/i ar slaahhareeriwós AAKOÓ MUNGÚ ngu sla'atamiisá'. Ilahhooarí dír kawa iimu/ún hanmisuuwo a tloomár Sinai.

⁷ Ilahhooár muruú wahaangw ar ta deelmooduú bee/ír alhaniisi, a liítár wák ar difaái. Ilahhooarír difaáír aa hamat aa tsipipi'ís didá' hhoohhoo' as anuú AAKOÓ MUNGÚ.

⁸ Qoomár tsiindowo deelmoduú tsár un ilahhooár wa hanís dinkwa nee ilahhooár balaangw, nee ilahhooár muruú wahaangw adór tidár matlaatle. Ilahhooarí an dá/ ar asla tawa slaahhareeraá tsuuá' awa AAKOÓ MUNGÚ ngu sla'atamiisá'.

Ilahhooár deelór Sabaáto

⁹ «Ilahhooár ta hanisa' bál deelór Sabaátoro a deeloó tsár oo gwaandaawe oo kurkú wák oo xaslxaansli wásl, nee ilahhooár balaangw oo kílo tsár ar puuruú natsaatsaá' oo taa aleedoók nee di/i, nee ilahhooár muruú wahaangw.

¹⁰ Gaarí an ilahhooár da/a ar ta hanmiisi umuúqo deelór Sabaátoro. Dinkwa nee tihe ilahhooár da/a tidár umuúqo baalaaro, nee ilahhooarós tidár wahaango makawa máy.

Ilahhooár baalár slahhángw /abén birna ti'iít

¹¹ «Umuúqo iimu/úngw slahhaango, AAKOÓ MUNGÚ ilahhooár da/a/aangw ti hanmise', awér tsár ar batlaay, nee gwaanduú wák, nee gwaandaawér ninakw faanqw ar kurkú wák, ar xaslxaansli wasl.

¹² Umuúqo awuuwo kun alhaniis nee ilahhooár balaangw ar kílo tám ar puuruú natsaatsaá' oo taa aleedoók nee di/i. Gwaanda kun alhaniis nee ilahhooár balaangw ar kílo tsár ar puuruú natsaatsaá' oo taa aleedoók nee di/i.

¹³ Umuúqo deelmoó bee/iro kun ilahhooár balángw alhaniis ar kilór wák ar puuruú natsaatsaá' oo taa aleedoók nee di/i. Gaarí an ilahhooár ta da/i ar asla tawa slaahhareeraá tsuuá' awa AAKOÓ MUNGÚ ngu sla'atamiisá'.

¹⁴ Ilahhooár muruú wahaangw ar ta muruuwí alhaniisi a tí: Umuúqo awuuwo kun liíta tsár ar difaáír alhaniis. Nee gwaanda kun liíta wak nee tlaqi ar difaáír alhaniis, nee umuúqo deelmoó bee/iro kun liítár wák ar difaáír alhaniis. Gaarí an ilahhooár da/a/aangw ar umuúqo baalár geera ar slahhaangw baraá kurko.

¹⁵ Slám gurtuú wák un hanisá' dír AAKOÓ MUNGÚ tawa ilahhooár tlakweema hingeesa. Dinkwa nee tihe ilahhooár da/a tidár umuúqo baala nee ilahhooarós tidár wahaango makawa máy.

Deelór ur ar mikaátér taa sluuftisiiká

¹⁶ «Slahhángw geera bál bar mibaá nee tsiyáhh an deelór pasaákuú AAKOÓ MUNGÚ kuwa tlehha'.

¹⁷ Bál mibaá nee kooán ar slahhangduú kilá' a deelór ur ar mikaáteédá' taa sluuftisiiká kawa /aga' ay deelo faanqw.

¹⁸ Bál deelór geera dinku'uumár hhoohhoo' an tlehhá', baalaarihe ma gadiyuusara'.

¹⁹ Ilahhooár da/a an hanisá' dír AAKOÓ MUNGÚ, awér tsár ar batlaay nee gwaanduú wák, nee deeloó faanqw oo gwaandaawe oo kurkú wák, sleémeero masók a muruú xaslxaansli wásl.

²⁰ Umuúqo awuuwo kun ilahhooár balángw alhaniis ar kílo tám ar puuruú natsaatsaá' oo ta aleedoók nee di/i, nee gwaanda kun kílo tsár alhaniis.

²¹ Deelayduú bee/aangw faanqwamawo umuúqo deelmoó bee/i kun kílór wák ar puuruú natsaatsaá' alhaniis.

²² Gurtuú wák un hanisá' tawa ilahhooár tlakweema hingeesa as haraki/isarhúng kawa tleehhi.

²³ Ilahhooarí an hanisá' dinkwa nee tihe ilahhooár tidár umuú matlaatle nee ilahhooarós tidár umuú baala makawa máy.

²⁴ Ilahhooarír adoorí an hanmisá' ay deelo faanqw. Ilahhooár muruú /ayma an da/á' tawa slaahhareeraá AAKOÓ MUNGÚ ngu sla'atamiisá'. Dinkwa nee tihe ilahhooár da/a tidár umuú baala nee ilahhooarós tidár muruú wahaango makawa máy.

²⁵ Bál faanqwe dinku'uumár hhoohhoo' an tlehhá', baalaarihe ma gadiyuusara'.

Ilahhooár deelór ur ar bu'uungw

²⁶ «Baalár bu'úngw geeraawo qoomár kuungá' AAKOÓ MUNGÚ burngwa ilahhooár balángw /abén i hubé', ar deelór ur ar wiikidu, baalaadae dinku'uumár hhoohhoo' ka tlehhá' nee ma gadiyuusara'.

²⁷ Ilahhooár da/a an hanisá' tawa slaahhareeraá tsuuá' awa AAKOÓ MUNGÚ ngu sla'atamiisá'. Gár ta hanisa' a awér tsár ar batlaay, nee gwaanduú wák, nee deeloó gwaandaawe oo faanqw oo kurkú wák.

²⁸ Umuúqo awuuwo kun ilahhooár balángw alhaniis ar kílo tám ar puuruú natsaatsaá' oo taa aleedoók nee di/i, nee gwaanda kun kílo tsár alhaniis.

²⁹ Deelayduú gwaandaawe faanqwamaawo, umuú deelmoowo kun kílór wák ar puuruú natsaatsaá' alhaniis.

³⁰ Gurtuú wák un hanisá' as haraki/isarhúng kawa tleehhi.

³¹ Ilahhooarí an hanisá' dinkwa nee ilahhooar'ín ar muruú wahaangw. Dinkwa nee tihe ilahhooadár da/a nee ilahhooarós tidár muruú wahaango makawa máy. Makayká' masók ki xaslxaansli wasl.