FAARO 27 - Biblía Axweesantá Hhohho' ar Mungú 2004

Hariímár /ameena aali ngiwa sleer

¹ Selofehadi garmoó Heferi, garmoó Gileadi, garmoó Makiri, garmoó Manase, garmoó Yosefu i dasuú kón. Umer'ín a tí: Mala nee Noa, nee Hogla, nee Milka nee Tirsa.

² Naagáy dasuuwí tsiyahhaawo tana daqáy amór Mose, tari sihhiít dír geeraá Mose, nee dír geeraá kaahamusmoó Mungú Eleasari, nee dír geeraá geeraharuuse, nee dír geeraá dinku'uumár Israeli sleémeero, didár geeraá heémár Mungú, tari oó',

³ «Baabuúrén ina gwaá' baraá xaanxaay, inós na/oó garma gu konká. Inós i kaahh baraá mukdá' Kora gwaa eehari, kudá' aa burumburiit daanduú AAKOÓ MUNGUHE, inós ina gwaá' as tlakweemaawós kilós.

⁴ Asma milá umuú baabuúrén musku fiits baraá tlahhaywose, as adoodá' na/oó garma nguwa konkáhe? Aalirén haniisang dír tla/ángw hha'aá baabuúrén wa ale.»

⁵ Naagáy Mose kangw'ín kwí guri huúw dír geeraá AAKOÓ MUNGÚ.

⁶ AAKOÓ MUNGÚ iri axweés dír Mose guri báy,

⁷ «Axweesantá dasuú doó Selofehadi i qoón, aalir'ín didár hha'aá baabuúín tiwa qasis, aalír baabuúín haniiseek ngi slaye'.

⁸ Daqaní xoorór Israeli ka beer, hee bira gwaá' naxes na/oó garma gu konká, aalirós ka haniisi dír dasi.

⁹ Barnaxes na/oó dasi gu konká, aalirí ka haniisi dír hhaeewós awa daaqaay.

¹⁰ Nee bar hha'aá daaqaay i kahhiyá', daqaní hha'aá baabá kin aalirí haniis.

¹¹ Barnaxes baabuúwós hhiyoó hhawaata gu konká, daqaní aalirós ka haniisi dír heé guruú dó' i tseéw. Kaangwí an kaahi, nee an dawa dír xoorór Israeliro ar adoodá' anuú AAKOÓ MUNGÚ ngira hara'ayiím.»

Yoshua kwa qaás múk Israeli nguwa geerahari

¹² AAKOÓ MUNGÚ Mose guri báy, «Tsa/ám gawaá dindirmoó tlom'aá ta bay Abarimu, yaamuudá' naa dír xoorór Israelírí haniís xuuxuueek.

¹³ Yaamuká' bira aán kuúng tari kahhút, adoodá' hhiyaawók Aroni ira kahhuút.

¹⁴ Asma kuungá' axweesante'eé' ana sié' baraá xaanxayduú Siniro. Qoomár dinku'uuma sleémeero ar Israeli iwa qununú/ daanduueene, kuungá' hhohhoaarir'eé' aga laqaandi'iiká dír ilaá múk Israeliro, dír ma'aydae.» (Ma'ayká' a kudaá baraá Meribár baraá Kadeshi, tidár baraá xaanxoó Sini).

¹⁵ Mose AAKOÓ MUNGÚ guri firín iwa kaahi,

¹⁶ «Aá AAKOÓ MUNGÚ, kuúng an iimu/úngw slafíngw umuúqo gár slafa. Aníng kuúng u firiím, hee qaaseek oo dinku'uumarók tí ga sagesihhmiít.

¹⁷ Inós inooín gi geeraharahaar bar ta iwiiwiit nee bar ta hi'iimiit. Bar ta slaqwarár áy inós ta geeraharumooín, as kahhó' mukók miwa adór bee/ángw de'eemusmo wásl tleehhiít.»

¹⁸ AAKOÓ MUNGÚ Mose guri báy, «Yoshua garmoó Nuni taataahheek, inós i qeeruú kón baraawose, daqaní ku dákwí qás.

¹⁹ Nee ku húp dír geeraá kaahamusmoó Mungú Eleasari, nee dír geeraá dinku'uuma sleémeero ar Israeli, daqaní kaangwí ku dirós i saayiín, dír geeraaín wa ale.

²⁰ Kuúng inós ku ilaiwá/ dír geeraá múk wa alé, as kahhó' muu inós nguwa ilawawa/i, adoodá' kuúng tura ilaiwaá/, masók múk Israeli sleémeero inós ku iialooeemiis.

²¹ Yoshua, kaahamusmoó Mungú Eleasari guri yaahamiis sla'aarir'eene. Asma Eleasari sla'aarir'eé' ga tsaahh ar loohír tlaa/anoodá' ta bay Urimu. Ar loohír /aymuú Eleasari i slaya, Yoshua nee múk Israeli sleémeero ngin geeraharahaar qoomár bar ta darah, laqaá bar ta ti'imiit.»

²² Mose adoodá' AAKOÓ MUNGÚ aa hara'ayín gari tleéhh. Yoshua guri taataáhh guri sihhtiís dír geeraá kaahamusmoó Mungú Eleasari, dír geeraá dinku'uuma sleémeero ar Israeli.

²³ Dabaawós giri qaás gawaá ságw Yoshua nee guri ilaiwawaá/ adoodá' AAKOÓ MUNGÚ ngura ádbáy.