FAARO 25 - Biblía Axweesantá Hhohho' ar Mungú 2004

Múk Israeli nee Ba'ali oo Peori

¹ Múk Israeli qoomár tawa baraá Shitimúr i dirii'i, hhawaate niri fuqtá ayé' amór /ameenár Moabu.

² /Ameenarír Moabu múk Israeli guna dah'ís tawa dinku'uusi ilahhooár muruú ta tsu/i ngiwa hanmiisiya' dír munguaá hatlá', múk Israeli muruú /aymaadá' kuri /aáy nee munguiidá' ngiri sluufmisiyé'.

³ Adoorí an adór múk Israeli ira haragwaá' dír Ba'ali oo Peori, AAKOÓ MUNGÚ iri daa/atúy buhhtaawo amór múk Israeli.

⁴ AAKOÓ MUNGÚ Mose guri báy, «Geeraharuusér Israeli sleémeero ar tlaweek, ki tarereiín tlaatla/ángw alé dír geeraaeé', as kahhó' muner'eé' iwa tsauur daanduú múk Israeliwo.»

⁵ Mose ga/aawuusér Israeli gari báy, «Umuúqo heewo baraá tla/angwhunge oo aa daqay amór Ba'ali oo Peori gaasaak.»

⁶ Qoomaarír kilae heeko wák oo Israeli /ameenír wák ar múk Midiani ngina huúw dír do'ós. Qoomaarihe Mose nee boo/oó múk Israeli ta dír afkú heémár Mungú i dirii' ta tsuunqumiis.

⁷ Naagáy Finehasi garmoó Eleasari garmoó Aroni, kaahamusmoó Mungú, adoorí ngiwa ár, ina tláy baraá tla/ángw boo/aydá' wa ale, ar lawaalarós,

⁸ nee heé aáng oo Israeli guri aluúwaá eehár ay baraá heéma, tsaraawo giri gur'e dinkwárí muút ar lawaala, hhawaatuduú Israeli nee /ameenidae. Tiqtidár pu/i ar múk Israeli gwa hhaamiis iri fák.

⁹ Múk tiqtidár pu/i aa hhaamís a kume mibeeri tsár nee tsiyáhh.

¹⁰ AAKOÓ MUNGÚ Mose guri i axweés iwa kaahi,

¹¹ «Finehasi garmoó Eleasari, garmoó Aroni, kaahamusmoó Mungú, buhhtaaeé' gaa har óh dír múk Israeliwo. Baraá tla/angwhunge a inós kilós oo sla'aari aa tliwí/ adór aníng wa ale. An gár múk Israeli sleémeero ngusa hhaamisiiká buhhtaeene.

¹² Gawaá adoorihe inós baweek, ‹Aníng alqadór wayda a tleéhh dirósí ale.

¹³ Án alqadoorí an tleéhh nee inós nee xwaylarós adór tar kaahamuusér Mungú ay kureeraá kureér, asma inós sla'aari nguna tliwí/ daanduú Munguúwose, múk Israeli guri haraki/isár i tleéhh.› »

¹⁴ Heedaáduú Israeli nee /ameenidár Midiani taa al tsuú/, umuú hhawatuudá' a Simri garmoó Salu, geeraharusmoó guruú doó wák baraá tlahhoó Simeoniwo.

¹⁵ Umuú /ameenirír Midiani taa gaás ku bay Kosbi dasír Suri. Suri a geeraharusmoó tlahhayko baraá múk Midianiro.

¹⁶ AAKOÓ MUNGÚ Mose guri báy,

¹⁷ «Múk Midiani hayloórí leehheek nee ki hhaamís.

¹⁸ Asma inooín kuungá' nuna hayloórí leehhiyé' ar al/ayma, tunduri baál al/aymaro baraá kangwduú Peoriro, nee baraá kángw Kosbiro, dasír geeraharusmoó Midiani, tidá' taa gaás qoomár tiqtír pu/i niwa ti'ít baraá yaamaá Peoriro.»