FAARO 24 - Biblía Axweesantá Hhohho' ar Mungú 2004

¹ Naagáy Bala'amu gari tsaáhh adór AAKOÓ MUNGÚ ngira slaá' múk Israeli nguwa tsuuqi, gawaá adoorihe Bala'amu aa ki/iiká amór qwaslaare iwa isaá artá ay, ala ina qaytsiít baraá xaanxaay.

² Bala'amu iwa qaytsiít amór múk Israeli, xafay'ín ngwa tleehhiyé' ar tlahhi'i. Qeeruú Mungú Bala'amu guri hatsiís.

³ Bala'amu aarirós tí gari oó', iwa kaahi, «Aariirí ar Bala'amu garmoó Beori, aarír heé ilaawós taa qaytsitís.

⁴ A aarír heé axweesantá Mungú ga axamiís, heedá' iigu'utuú Mungú Aleesleemusmo gu araa'ár, kudá' aa tumbarara'aat ala i xumiis.

⁵ Kuungaá múk Yakobo, xáy heemaduuhúng i hhohhoaa'ayá' a adoomá? Nee dír hotangwhúng sleeme kuungaá múk Israeli.

⁶ A adór xatstá naa/ari ar ma'aay ni wa/maamina', a adór qaymór afaá yaae, a adór /ayór ta bay udi, ar AAKOÓ MUNGÚ aa dahaás, a adór sahhtár taa dahaás afaá yaae.

⁷ Ma'aá bu'uutá' awa /ooma'aaká kin sláy, dahaasingw'ín ma'aá yaariir gi sláy. Waawutmooín ku úr ta Agagiwo, nee waawuti'iimarós iri kángw kilá' wa iia tleeruúr.

⁸ Munguúdá' gaa leehh baraá Misri, gin aleslaaqw ar /uuruuwós oo adór kuquú saree/a. Xoordudaá wakuuseerós gin qororo'oos, faduuín gin giqáy, inooín giri tlaquut ar maheeriwós.

⁹ Ina xupuú' iri yaamií qaát adór diraangw, a adór dirángw /ameeni, heé gu qiítl gwarangwarto? Umuúqo heé kuungá' naa tsuuq ku tsuuqi, umuúqo heé kuungá' naa lu'us ku lu'usi.»

¹⁰ Balaki iri qa/iít buhhtaawo amór Bala'amu, tsa/aá daba' giri slaáhh buhhtaawo, iri oó', «Án kuúng una ateét as wakuuser'eé' kawa lu'us, ala ga/aaweek kuúng ina tsúq ay sagaáwa tám!

¹¹ Hamí, tláw gwagoów amoorók ar ta xu'! Geera ana slaá' uwa qaw ar muruú yaariír, ala AAKOÓ MUNGÚ qeemuwí ngwa kuúngár slaiiká, gwaa /itín diroge!»

¹² Bala'amu iri oó' dír Balaki, «Xáy án kaangw ngwa ooikáhe dír ya/abuuseerók tidá' naa amor'eé' ya/áp,

¹³ niwa oó', ‹Tam do'ók oo peésár wa haáts nee sahaábuwo ngu hanisa, axweesantá AAKOÓ MUNGÚ a qiitlaaká waa/akuutaro, gár hatlá' ngiwa tleehh, ar hhoo' laqaá ar tlaakw ar sagw'eé' kilós.› Niri oó', ‹Tidá' AAKOÓ MUNGÚ ni ooi an tidá' ni oo'.› »

Aaru'uumár alhhe'eesáy ar Bala'amu

¹⁴ «Aníng hamí an kií/ amór muk'eé', ala dír nira tlawiiká, muruú mukdá' i tleehhi dír mukók baraá de'emaá hi'iita'a ngu oó'.»

¹⁵ Naagáy Bala'amu aarirós tí gari oó', iwa kaahi, «Aariirí ar Bala'amu garmoó Beori, aarír heé ilaawós taa qaytsitís.

¹⁶ A aarír heé axweesantá Mungú ga axamiís, nee xu'utír kudá' gáwtí dirií' gari tsaáhh, heedá' iigu'utuú Munguú Aleesleemusmo gu araa'ár, kudá' aa tumbarara'aat ala i xumiis.

¹⁷ Kudá' hardáh u ga/áw, ala a hamiheeká, una ár ala ku tseeweeká. Baraá xwaylár Yakobowo tsatsee/i ni ti'ít, waawutmo ni tla/ángw múk Israelír wa ti'iit, ar hhartós tidár waawuti'iimaro múk Moabu gun baal, xwaylár Seti sleémeero gari qororo'oos.

¹⁸ Inós múk Edomu guri sawaawuti'ín, wakuuseerós tidár Seiri tari tós, múk Israeli baalír ur gari sláy.

¹⁹ Heeko baraá xwaylár Yakobowo i waawuti'ín, inós múk aa meet baraá gixsaaro gun qororo'oos.»

²⁰ Aluuwo Bala'amu múk Amaleki guri i qaytsiít, aarirós tí gari oó', «Amaleki a xoorór /uuruú koom ta xoordaá hatlá' sleémeerowo, ala alhhe'eesaywo kin hhaamiis ay alhhe'eesay wasle.»

²¹ Aluuwo Bala'amu iri qaytsiít amór múk Keni, aarirós tí gari oó', «Kuungaá múk Keni hotangwhúng ku amohhoó' adór doó tsir/i oo gawaá ságw tlaa/a.

²² Ala kuungaá múk Keni tundu qororo'oos ar asla, tundu haasaáng wa haahuwi ay xaylá nee múk Ashuru.»

²³ Bala'amu aari gari malé oó', «Tsaxwaaín! Heé hoót a heemá qoomár bar Mungú adoorí gaa tleéhh?

²⁴ Miringér Kitimúr daahh in hardát, Ashuru nee Eberi kin i haratláy. Ala múk Kitimu sleeme kuri hhaamiis ay alhhe'eesay wasle.»

²⁵ Naagáy Bala'amu iri tláy iri waátl amór do'ós, Balaki sleeme iri tláy.