FAARO 23 - Biblía Axweesantá Hhohho' ar Mungú 2004

¹ Bala'amu Balaki guri báy, «Kiteerieé' awa faanqw awa ilahhooa ngiwa hanmiis tleehhang, daqaní awér faanqw ngi húp, nee gwaandaawér faanqwe.»

² Balaki adoodá' kwaa báy nee Bala'amu gari tleéhh. Naagáy umuúqo kitángw ilahhooaro awuú wák nee gwaanduú wák kina didá' wa haniís.

³ Bala'amu Balaki guri báy, «Sihhiít dír ilahhooarók tír da/a, án a tláw, doóqa aníng nee AAKOÓ MUNGÚ ti doogaán. Gár naaqo dir'eéní laqani án ngi oó'.» Naagáy Bala'amu kilós iri tsa/án gawaá ságw tlooma.

⁴ Mungú nee Bala'amu tiri doogiyé'. Bala'amu iri oó', «Kiteeraá faanqw awa ta ilahhooár wa hanmiisi iga tleéhh, nee ilahhooa aga aga haniís umuúqo dír kitángw naa tleehhi, awuú wák nee gwaanduú wák ina haniís.»

⁵ AAKOÓ MUNGÚ axweesani gari oó' dír Bala'amu ar i ooár ay dír Balaki.

⁶ Bala'amu iri kií/ amór Balaki, iwa hardáh Balaki i sihhmiit dír ilahhooarós tidár da/tá wa ale, dinkwa nee geeraharuusér Moabu.

⁷ Bala'amu aarirós tí gari oó', iwa kaahi, «Balaki ina leéhh ay yaamaá Aramu, waawutmoó Moabu ina leéhh iimír tlom'aá da/aáw, iwa kaahi, ‹Qwaláng múk Yakobo lu'usek as daanduueé', qwaláng múk Israeli tli/isek!›

⁸ Heé Mungú aa lu'usiiká adór ngur lu'us a adoomá? Heé AAKOÓ MUNGÚ aa tli/isiiká adór ngur tli/is a adoomá?

⁹ Asma aníng inooín ina iimír gawaá sagér tla/ú wa ár, inooín ina gawaá sagér gongoamaá wa ár. Xoorór kilós hoot, xoorór ti harafaditaaká tawa alqon nee xoordaá hatlá'.

¹⁰ Heé amaaqawár doó Yakobo farooro ga aleesláw a heemá, laqaá heé tlaqtá niina ar múk Israeli faaroorós ngi oó' a heemá? Masók aníng an gwaá' ar gwa'arár heé ganaá', alhhe'eesay'eé' masók a adór kooín.»

¹¹ Balaki Bala'amu guri báy, «Gaarí a milá naa dir'eé' tléhh? Aníng kuúng una ateét as wakuuser'eé' kawa lu'us, ga/aaweek kuúng inooín ina tsúq.»

¹² Bala'amu Balaki guri báy, «Aníng gár tiwa hariím a axweesantadá' AAKOÓ MUNGÚ iga báy an oó'.»

Aaru'uumár tsár ar Bala'amu

¹³ Balaki Bala'amu guri báy, «Qwaláng ay amór hatlá' amoodae i bahh aán ala a sleémeerowooká. Daqaní inooín ki lu'ús as aníng.»

¹⁴ Naagáy Bala'amu kuri huúw nee Balaki ay baraá qamaá Sofimu gawaá ságw tloomár Pisga. Gawaadae kiteeraá ilahhooa awa faanqw gina tleéhh, dír umuúqo kitaango awuú wák nee gwaanduwo gina haniís.

¹⁵ Bala'amu iri oó' dír Balaki, «Kuúng meét dír ilahhooarók tír da/a, aníng an tláw amór gayuuqá' as nee AAKOÓ MUNGÚ tiwa doogaan.»

¹⁶ AAKOÓ MUNGÚ nee Bala'amu tari slayé', inós axweesani gari oó' dír Bala'amu ar i ooár ay dír Balaki.

¹⁷ Naagáy Bala'amu iri kií/, Balaki guri didií áy, aa sihhiít dír bihhaá ilahhooarós tidár da/a, ta dinkwa nee geeraharuuse sleémeero ar Moabu. Balaki iri oó', «AAKOÓ MUNGÚ gár ugwa báy a milá?»

¹⁸ Bala'amu aarirós tí gari oó', iwa kaahi, «Tlawáng Balaki, iia qaaseek! Aá garmoó Sipori, aníng iiárií qaasáng.

¹⁹ Mungú lama ga adór heéwaá tsatiiká, laqaá i adór heéwaá gwadiidinká. Xáy al'axweesani ga oói gadaádá' gari boo/eesiiká? Gaa ga oói gadaádá' gari tleehhiiká?

²⁰ Qaytsiít gár aníng taa báy a inooín in tsuúq, inós gina tsuúq, aníng warqeesaro i aleeslawaaká.

²¹ Mungú tlakweema dír múk Yakobowo gaa ariiká, tam tlií/ gaa ariiká dír múk Israeliwo. AAKOÓ MUNGÚ, Munguúín i dinkwa nee inooín. Inós baraá tla/angw'ine kun sabaraa/ adór waawutmoó wa ale.

²² Munguúdá' gaa leehh baraá Misri, gin aleslaaqw ar /uuruuwós oo adór kuquú saree/a.

²³ Ar looeemawo múk Yakobo da/aluuse gu baqká, tam qwaslaare sleeme múk Israeli gu aleesleeraaká. Hamí daxta muu iri ooi daanduú múk Israeliwo, ‹Qayté' waa/oo/amór Mungú aa tleéhh!›

²⁴ Qaytsité'! Múk Israeli taa sihhiít adór dirángw /ameeni, taa sihhiít adór dirángw yaqaamba. Kudá' qatuú tawo gu ya/amaaká bar gaa ngaa oohiiká baraá slakatuuwose, nee bar tseerér gár aa óh ngaa nunuuiiká.»

²⁵ Balaki Bala'amu guri báy, «Maweek daxta, mi lu'usaar tam mi tsuuqaar ló'!»

²⁶ Ala Bala'amu Balaki guri báy, «Xáy ugwa bawiikáhe gár AAKOÓ MUNGÚ naa aníng báy an tidá' hariim ngiwa tleehh.»

Aaru'uumár tám ar Bala'amu

²⁷ Aluuwo Balaki iri oó' dír Bala'amu, «Qwaláng, u huúw amór hatlá', dooqa Mungú i ya/án amoodae mukwí ku lu'ús as daanduueé'.»

²⁸ Naagáy, Balaki Bala'amu guri ar tláy ay gawaá ságw tloomár Peori, tidá' nee xaanxaay ti ga/aawá'.

²⁹ Bala'amu iri oó' dír Balaki, «Kiteeraá faanqw awa ilahhooa tleehheek, nee awér faanqw ka amohhe'és, nee gwaandaawér faanqwe as aníng.»

³⁰ Balaki adoodá' kwaa báy nee Bala'amu gari tleéhh, awu nee gwaanduwo giri haniís umuúqo dír kitángw ilahhooaro.