FAARO 22 - Biblía Axweesantá Hhohho' ar Mungú 2004

Waawutmoó Moabu Bala'amu nguwa ateét

¹ Xoorór Israeli aai giri malé iimu/uún, xafay'ín guri síhh baraá xatstá Moabu, bihhaá da/aáw awa yaaér Yordani, didá' nee Yeriko ti ga/aawá'.

² Waawutmoó ta bay Balaki garmoó Sipori, mura' sleémeero guna axaás oo múk Israeli aa tleéhh dír xoorór Amori.

³ Balaki nee múk Moabu tari dandeemo feehhamiít daeero. As amaqawár yaariir ar xoorór Israeli kawa ár tari amoqwaár.

⁴ Naagáy xoorór Moabu bariisér Midiani gari beér, «Amaqawár yaariir tí ar xoorór Israeli deelór niina bira gwá' umuú gaaro ga hhaamís iisaapayrén kwihe, adoodá' hikwa gitsór baraá qamu ngir farkakina'.» Nee qoomaarihe Balaki garmoó Sipori a waawutmoó yaamaá Moabu.

⁵ Balaki ya/abuuse gari ya/aáw amór Bala'amu, garmoó Beori, amór yaamaá Petori, iisapoó yaaér Eufrate, amór yaamaá Amawi. Bala'amu kuri báy, «Xoororka Misrír daahh yaamu gina al'ót, slám yaamuueé' ki hayohár wa slaa'.

⁶ Kuúng qwaláng hamí, mukwí lu'usek daanduueé' wa ale, asma a múk /uuremaá koóm. Dooqa i aleesláw ngiwa baa/, ngiri guús mindiwa dahiyé' baraá ayaeene. Asma aníng a xuú' heé kuúng ta tsúq kwaa tsuúq, bura lu'ús kwaa lu'ús.»

⁷ Naagáy geeraharuusér Moabu nee ar múk Midiani tari tláy, tari amór Bala'amuú káy, i peésár bu'utuú qwaslaarmoó koná'. Tawa hardáh ya/abtór Balaki kari oó'.

⁸ Bala'amu giri báy, «Deelaré' xweeraakae, daqaní aníng gár AAKOÓ MUNGÚ i slai ngi oó'.» Bariisér Moabu nee Bala'amu tari deél.

⁹ Mungú Bala'amu guri harati'iít guri yaahaás, «Muksíng nee kuúng dinkwa a ín heemá?»

¹⁰ Bala'amu Mungú guri mu/aywaáts, «Balaki garmoó Sipori aníng ina i ya/abín, i kaahi,

¹¹ ‹Xoororka Misrír daahh, ayaarén gwa al'ót.› Balaki ina firín ngiwa lu'us as kahhó' iwa baalin qoomár bar ta slaaqw. »

¹² Mungú Bala'amu guri báy, «Miti alkoomara' nee muksíng, tam mukdá' sleeme mu lu'usar, asma mukdá' kwaa tsuúq.»

¹³ Matlaatleero Bala'amu niwa tláy, geeraharuuseedár Balaki gari báy, «Kuungá' watlé' ayaahúng, asma AAKOÓ MUNGÚ aa ya/anká aníng nee kuungá' tiwa alkoomaan.»

¹⁴ Gawaá adoorihe geeraharuuseedár Moabu tari tláy, tari kií/ amór Balaki, kuri báy, «Bala'amu aa sií' nee atén tiwa alkoomaan.»

¹⁵ Kár, Balaki geeraharuusér yaariir, ar uren tidár geera ba/a, gari ya/aáw.

¹⁶ Geeraharuuseerí iri hardát dír Bala'amu, tari oó', «Balaki garmoó Sipori i kaahi, ‹Ma ya/aamaar tuwa ilaa/i nee garka, tam hardahamuú amor'eé' kuri meér.

¹⁷ Gám aníng kuúng u iwa/a/aát nee u baloó qiitlaaká, umuuqo gár ta sla'a ar ni firiin ngi haniís. Qwaláng mukwí daanduueé' wa lu'usek.› »

¹⁸ Ala Bala'amu geeraharuusér Balaki gari báy, «Tam Balaki do'ós oo peésár wa haáts nee sahaábuwo ngu haniisi, aníng a qiitlaaká hara'ayár AAKOÓ Munguúeé' ngiwa wa/akuut, i hariindaaká gár niina ngiwa /aarees laqaá tamar ur.

¹⁹ Ala na'asé', xweeraakae diirií deelare' adór mukhúng kudá' wa ale, as aníng ngiwa xuu' kangwdá' AAKOÓ MUNGÚ i malé bay.»

²⁰ Naagáy, Mungú Bala'amu guri harati'iít xweeraawo guri báy, «As mukwí kuúng uwa ateetár áy, daqáw ti alkoonde' nee inooín, ala gár ta tlehh a tidá' naa kuúng báw kilós.»

²¹ Bala'amu iwa tláy matlaatleero, daqwaywós guri amohhe'eés, tari altláy nee geeraharuuseedá'.

Bala'amu nee daqwaywós

²² Mungú iri qa/iít buhhtawo asma Bala'amu iwa daqáy, as adoorí malaykamoó AAKOÓ MUNGÚ iri saga awín loohirí ale, as nguwa ilaa/i. Qoomaarihe Bala'amu i gawaá daanduú daqwaywós ti koná' nee sagadiyuuseerós ar tsár.

²³ Naagáy daqwaay malaykamooduú AAKOÓ MUNGÚ guri ár aa sihhiít baraá loohi, paánga gaa duúx baraá tlakwaywose, gaa dákwí óh. Daqwaay iri paásl baraá loohidae. Bala'amu daqwaydá' guri slaáhh as nguwa ki/isi baraá loohi.

²⁴ Kár malaykamooduú AAKOÓ MUNGÚ iri geerií hi'iít, iri sihhiít dír loohi kawa iiraákw, baraá tla/eeraá qamaá sabiíbu, nee bihhe tsaraawo a gee/aawe.

²⁵ Daqwaydá' malaykamooduú AAKOÓ MUNGÚ nguwa ár, tina amór gee/áy kón, yaaér Bala'amu gari gawaá gee/áy minqiís. Gawaá adoorihe Bala'amu daqwaydá' guri malé slaáhh.

²⁶ Kár malaykamo iri malé amór geeraá áy, iri sihhiít dír loohi kawa iiraákw, waarahhamu i kaahh bihhaá doó /iyayhe tam bihhaá doó basayhe.

²⁷ Daqoó aáng malaykamooduú AAKOÓ MUNGÚ nguwa ár, iri yaamií qaát, Bala'amu i gawaá daqwaay. Bala'amu iri qa/iít buhhtaawo, daqwaay guri slaáhh ar hhartós.

²⁸ AAKOÓ MUNGÚ daqwaydá' guri afkú axweesántí haniís, Bala'amu guri báy, «Gár naa tlakweés a milá iwa sláhh ay ki/ima tám?»

²⁹ Bala'amu daqwaydá' guri báy, «Kuúng aníng iga niqís! Geeraawo masók paánga an koóm dakwe'eene, geeraawo hamír kilá' un gaás!»

³⁰ Daqwaydá' Bala'amu guri báy, «Xáy aníng a daqwaywogekáhe, kudá' ta daanda aaeer uwa loohamamiis daqiisleém baraá hotaawoge ay laarí? Xáy adoorí ngaa baloó dirógií tleéhhi?» Bala'amu guri mu/aywaáts, iri oó', «Aasla'áy.»

³¹ AAKOÓ MUNGÚ ilaá Bala'amu giri gweér, inós malaykamoó AAKOÓ MUNGÚ guri ár, aa sihhiít baraá loohi, paánga gaa duúx baraá tlakwaywose, gaa dákwií óh. Bala'amu iri xupuú', iri gurúr qaát yaamu.

³² Malaykamoó AAKOÓ MUNGÚ Bala'amu guri báy, «Ahaá waáy, daqwaywók musa sláhh ay ki/ima tám. Aníng nina hardáh as kuúng uwa ilaa/, asma loohirók ka tlaakw dír geeraeene.

³³ Daqwaywók aníng ina ár ay ki/ima tám. Iri papaásl baraá loohiro sagaáwa tám, paslmuwós kudá' a adór aníng ir kwirhhimiiti. Geera bar daqwaydá' aa pasliiká aníng kuúng ugwa gaás, daqwaay nguri slafíngwí máw.»

³⁴ Bala'amu malaykamoó AAKOÓ MUNGÚ guri báy, «Tlakweema iga tleéhh, asma aga xuiiká adór kuúng tara sihhít baraá loohi as aníng iwa ila/. Adoorí bar kuúng a sla'aká, hamí mawa kumiít aaiwo, a kií/ amór do'.»

³⁵ Ala malaykamoó AAKOÓ MUNGÚ Bala'amu guri báy, «Tláw nee mukwí, ala gár ta o' a tidá' kilós ugwa báw.» Naagáy, Bala'amu tari alkumiít aaiwo dinkwa nee geeraharuusér Balaki.

Balaki Bala'amu nguwa dahi'ís

³⁶ Balaki kaangwí nguwa axaás adór Bala'amu nir hi'iít, iri tláy nguwa al'ay amór gixsár Ari, gixsár tseew afaá yaaér Arnoni, tidár digima nee yaamaá Moabu.

³⁷ Balaki iri oó' dír Bala'amu, «Waáy, misinda gaanslár hardatká' uwa ateét? Ahaá ana ói, ilaiwa/amér ni aníngí tleehhi i deéro?»

³⁸ Bala'amu Balaki guri báy, «Hamí án naa hardáh! Xáy aníng aleesleemu u koóma oo umuú gaaro ngiwa oo'? Umuú gaaro ar Mungú ni ooi an tidá' hariim ngiwa oo'.»

³⁹ Naagáy, Bala'amu nee Balaki niri altlayé' tari hardáh baraá gixsár Kiriat-husoti.

⁴⁰ Amoodae Balaki awe nee bee/aango giri ilahhooár wa tsuú/, fu'unaay giri qasmiís dír Bala'amu nee dír geeraharuuseedá' nee inós ti alkoomá'.

Aaru'uumár geera ar Bala'amu

⁴¹ Matloowose Balaki Bala'amu guri ar tsa/án ay amór Bamot-ba'ali, amoodae Bala'amu múk Israeli guri bahh ár.