FAARO 21 - Biblía Axweesantá Hhohho' ar Mungú 2004

Múk Kana'ani kuwa baál

¹ Waawutmooko wák oo múk Kana'ani oo Aradi oo amór Negebúr hoót, gana axaás adór múk Israeli ir hi'iít ar loohír Atarimu, giri i haraatláy, muu bahh'ale guri hayóh.

² Nee múk Israeli al'axweesani gana oó' dír AAKOÓ MUNGÚ tawa kaahi, «Barnaxes mukwí ngu hanís gawaá dabaarén i ale, daqaní atén gixsaduuká' aqo in hhaamisaán.»

³ AAKOÓ MUNGÚ firor'ín gari axaás, múk Kana'ani nguri baaliyé'. Múk Israeli múk Kana'ani guri hhaamiís dinkwa nee gixsaduuine. Gawaá adoorihe didaadá' kari bay Horma.

Dayshamoó muqslír sirdaa/aat

⁴ Múk Israeli tari dír tloomár Horír wa tláy, loohír tlawtá Shamu kari óh as yaamaá Edomu kiwa harweeri. Ala baraá loohiro muu iri diqaay tsatmiít.

⁵ Naagáy qununu/aay ngway iimu/uné' daanduú Mungú nee Mosewo, tawa kaahi, «Ahaá waáy gár tisa duxé' baraá yaamaá Misrír wa ale, nee gár tas qatlaan baraá xaanxaywí ale? Baraakae muruú /ayma i kaahh, tam ma'aay i kahhiyá', nee atén muruú /aymaarí tlií/ taa xinaaór ar faák.»

⁶ AAKOÓ MUNGÚ dayshér qarkú koom gari huúw baraá tla/ángw múkwí ale, múk yaariír oo Israeli kuri kikiíhh nee tari qaátl.

⁷ Naagáy, muu iri tláy amór Mose, nguri bayé', «Tlakweema iga tleehhaán qoomár AAKOÓ MUNGÚ nee kuunge nuwa i qununu/aán. AAKOÓ MUNGÚ firiimang daysheerí ngi hingeesi.» Gawaá adoorihe Mose muu guri aleefirín.

⁸ Naagáy AAKOÓ MUNGÚ Mose guri bay, «Dayshamoó muqslír sirdaa/aat tleehheek, ku qás gawaá ságw xa'anoó tlerantleér. Umuúqo heé taa kiíhh nee dayshamo, nee dayshamoduú muqslír sirdaa/aat nguri i qaytsiít, in hhooáy.»

⁹ Naagáy Mose dayshamoó muqslír sirdaa/aat guri tleéhh, guri qaás gawaá xa'anoó tlerantleér. Umuú heé taa qo kihhi nee dayshamo, nee dayshamoduú muqslír sirdaa/aat guri i qaytsiít, in hhooáy.

Tawa tloomár Horír wa tláy ay xatstá Moabu

¹⁰ Xoorór Israeli tana kumiít aaiwo, nee xafay'ín nguri tleehhiyé' dír ta bay Oboti.

¹¹ Tari Obotír wa tláy ay Iye-abarimu, baraá xaanxoó bihhaá da/aáw oo digimuú Moabu, xafay'ín nguri didií tleehhiyé'.

¹² Tana didá' wa tláy xafay'ín kuri tleéhh baraá xatstá Seredi.

¹³ Tana male didá' wa tláy, xafay'ín kuri tleéhh bihhaá /iya awa yaaér Arnoni, tidá' baraá yaamaá Amorír daahh, iri waaraáhh baraá xaanxaay. Yaaér Arnoni an digimuú múk Moabu nee múk Amori.

¹⁴ Kaangwí an gár axweesantí kasa gooín baraá kitaábuú slaqwarár AAKOÓ MUNGÚ, tí kah, «Gixsár Hebu tidár yaamaá Sufa nee xatsoowo. Yaaér Arnoni

¹⁵ nee /etángw xatso tari hardát ay gixsár Ari, nee tari kumiít ay amór digimuú yaamaá Moabu.»

¹⁶ Imiír amoodá' wa tleemu múk Israeli iri kumiít aaiwo ay Be'eri, dír hhalangwdá' AAKOÓ MUNGÚ Mose nguwa báy, «Muu dinkwaárí burumbureek, aníng i ma'aay haniís.»

¹⁷ Diirihe múk Israeli daa'aangw guri óh, «Aá hhálaangw, kutli duuxang, Ii daa'aak!

¹⁸ Hhalángw taa foól nee múk urén, hhalángw taa foól ló'wa ale nee geeraharuusér uren, ar hhadooín awa waawuti'iima nee qadiisay'ín.» Tana baraá xaanxáy wa tláy dír ta bay Matana,

¹⁹ tari Matanár wa tláy ay Nahalieli, tari Nahalieli wa tláy ay Bamoti,

²⁰ tari Bamoti wa tláy ay xatstá dah baraá yaamaá Moabu, dír tsitsinír tloomár Pisga, tidá' baraá xaanxoó ga/áw.

Xoorór Israeli waawutmo Sihoni nee Ogu kiwa baál

²¹ Xoorór Israeli afoorí kana ya/aáw dír waawutmo Sihoni oo Amori tawa kaahi,

²² «Na'amaamís, ti pa/ángw waarahhmaáwí sleer baraá yaamuuwoge, atén a bihhií paslaanaaká tawa dahaan baraá qamu, laqaá qamaá sabiíbu, laqaá ma'aá baraá hhaleeri i wahanaaká. Atén a waaraahhaán ar loohír ur ar waawutmo ay dír tay ti'iitaan baraá yaamuuwoge.»

²³ Ala Sihoni múk Israeli iwa waaraahhi ar baraá yaamuuwós gwaa ya/aniiká. Mukós guna burumbuúr, iri tláy ay Yahasa, tidár baraá xaanxaay, as xoorór Israeli ngiwa i haraatlay.

²⁴ Ala múk Israeli inós nguri gaasiyé' ar paángár xaraasl, yaamuuwós ngiri hayoohiyé', iimír yaaér Arnonír wa tleemu ay yaaér Yaboki, ay yaamaá múk Amoni. Qoomaadae digimuú yaamaá Amoni ku ló'wa xún.

²⁵ Xoorór Israeli gixsaduuká' sleémeero ngiri hayoohiyé', inooín tari baraá gixsadaá múk Amorír wa hoót, gixsár Heshboni nee ayeemaá isaapaydá'.

²⁶ Heshboni qoomaadae a gixsár waawutmo Sihoni oo xoorór Amori, kudá' aáng geeraawo taa slaaqw nee waawutmoó xoorór Moabu, yaamuuwós sleémeero giri hayóh ay digimuú yaaér Arnoni.

²⁷ Gaarí an gár /ayluuserhúng isa adoorír dá', «Qwalaasé' Heshboni nee ta tleehhitá' gixsár Sihoni ka tlehhá' nee ka gawdesá'.

²⁸ Asma asla nina Heshbonír wa ti'ít tsángw asla nina gixsár Sihonír wa sihhiít. Gixsár Ari ar Moabu gari /aáy tlom'aá yaaér Arnoni giri hhaamiís.

²⁹ Kuungá' xoorór Moabu, tsaxwaahúng, kuungasíng munguú Kemoshi ngu haratlintatiá' tundu hhaamiis! Na/iihúng awa daaqaay gin tlatlahhaas, dasuuhúng ugwa meeré' kuwa haasaáng wa ar tlay, ay amór Sihoni, waawutmoó Amori.

³⁰ Ala Hamí daxta xwaylar'ín kaa hhaamiís, iimír Heshbonír wa tleemu ay Diboni, iimír Nashimúr wa tleemu ay Nofa, isaapoó Medeba.»

³¹ Naagáy xoorór Israeli iri hót baraá yaamaá múk Amori wa ale.

³² Aluuwo Mose muu guri ya/aáw as gixsár Yaseri ngiwa tsawtsawusár aya', ngiri hayohiyé' dinkwa nee ayeemaá isaapaydá', múk Amori oo baraadá' hoót kuri guús.

³³ Múk Israeli tari warqáy, loohír Bashanír kaw kari óh. Waawutmo Ogu oo Bashani nee slaqwaruseerós tindiri haraatláy amór Edrei.

³⁴ Ala AAKOÓ MUNGÚ Mose guri báy, «Mu da'ayumiitaar, asma ngwaa gawaá dabaawók i haniís, dinkwa nee mukós sleémeerowo, nee yaamuuwós sleémeerowo. Adoodár Sihoni waawutmoó Amori kuduú Heshboni kway tléhh, inós ti tlehh.»

³⁵ Naagáy xoorór Israeli Ogu guri gás, nee daaqaywós nee mukós sleémeero, tam heé taa máy gaasaro i kaahh tumu wák. Naagáy yaamuuwós ngiri hayoohiyé'.