FAARO 20 - Biblía Axweesantá Hhohho' ar Mungú 2004

Ma'aá Meriba

¹ Dinku'uuma sleémeero ar Israeli tana hardáh baraá xaanxoó Sini qoomár tawa slahhángw geera, nee xafay'ín nguri tleehhiyé' baraá Kadeshi. Didár Kadeshiro Miriamu iri amoodií gwá', nee kari didií foól.

² Didá' xafay'ín nguy tleehhiyé' a yaamaá ma'aá kooma'aaká. Gawaá adoorihe, muu sleémeero iri burumburiít dír Mose nee Aroni.

³ Sleémeero Mose guna i giliné' tawa kaahi, «Geeraawo bar ana alqatlaán nee hhaeerén dír heémaadár AAKOÓ MUNGÚ a tsiní!

⁴ Ahaá waáy, gár ateéká xoorór AAKOÓ MUNGÚ tisa baraá xaanxaywí hubé'? Xáy tina baraakií hubí'i as nee hikwaarén tawa baraakií qatlaan?

⁵ Nee ahaá waáy, gár tisa yaamaá Misrír wa duxé', tari yaamaá slasla/aar awa adór kuká' i hubé'? Balángw /ayma i kaahh, /aantsí i káhh, sabiíbu i kaahh, komamaanga i káhh. Tam ma'aá wahaangw i kahhiyá'.»

⁶ Mose nee Aroni tari tláy tla/ángw múk wa ale, tari xupuú' dír afkú heémaadár Mungú. Naagáy xirfuú AAKOÓ MUNGÚ iri geehhooúy,

⁷ AAKOÓ MUNGÚ iri axweés dír Mose, guri báy,

⁸ «Hhartók tidá' taataahheek, kuúng nee hhiyaawók Aroni, muu sleémeero ku burumbudá'. Daqaní dír ilaaín wa kilae tlaa/adá' ka beer ma'aywók duuxang, tlaa/a ma'aay gi dúx, as muu sleémeero nee hikwaaine ngiwa slaya'.»

⁹ Mose iri tláy, hhartadá' gari taataáhh dír geeraá AAKOÓ MUNGÚ wa ale, adoodár kilá' kura hara'ayín.

¹⁰ Naagáy Mose nee Aroni dinku'uuma sleémeero kari burumbuúr dír geeraá tlaa/a, nee Mose iri oó', «Kuungá' dee/aanuúse, iia qaasaak, xáy ma'aay ngi duuxána gawaá tlaa/arí wa ale?»

¹¹ Naagáy Mose dakós guri gáwtí tleés, tlaa/a gari sagaáwa tsár wa slaáhh ar hhartós. Ma'aá yaariir niri wa/iyé', muu nee hikwaine niri wahiyé'.

¹² Ala AAKOÓ MUNGÚ Mose nee Aroni giri báy, «Asma kuungá' aníng iga haratlinti'ii'iiká laqaá hhohhoaarir'eé' aga laqaandi'iiká dír geeraá múk Israeli sleémeero, daxta kuungá' mukwí u dahasa'aaká baraá yaamuudá' naa lo'ór wa /aáy ngiwa inooín i haniis.»

¹³ Gaarí an ma'aá Meriba, didá' múk Israeli iwa qununuú/ dír AAKOÓ MUNGÚ, nee inós tiri dir'ín i laqán ar hhohhoaarirós baraá tla/angw'ine.

Waawutmoó Edomu iwa sií' xoorór Israeli iwa waarahh

¹⁴ Mose muu guna amór Kadeshír wa ya/aáw ay dír waawutmoó yaamaá Edomu, guri báy, «Hhiyaawók Israeli i kaahi, ‹Kuúng a xú' slahh'amuudá' taa slawaán.

¹⁵ Adoodá' baabi'iirén tara yaamaá Misrír káy, amoodae tari hotaatín de'emaá yaariire, nee adoodá' baabi'iirén kira slahh'eemiís nee múk Misri, atén sleeme tiri slahh'eemisiyé'.

¹⁶ AAKOÓ MUNGÚ atén kuri i /aa/amimaán, inós /aa/eerén giri axaás, malaykamoowós nguri ya/aáw as tiwa duuxi baraá yaamaá Misrír wa ale. Ala hamí daxta a diirír Kadeshír i diriaán, gixsár dír digmuú yaamuuwógí dirii'.

¹⁷ Na'amaamís atén a waarahaán ar baraá yaamuuwók, qamu i adarahanaaká, tam qamaá sabiíbu, laqaá ma'aá baraá hhaleeri i wahanaaká. Atén loohiidá' ur ar waawutmo an eeharaán, nee tari kumiitaán a baloó bihhaá doó /iyáy warqawanaaká, laqaá awa doó basáy, ay dír tay waarahhaan baraá yaamuuwoge.› »

¹⁸ Ala waawutmoó Edomu giri mu/aywaáts, «Aasla'áy! A waarahha'aaká ar baraá yaamuueé', gám bara waarahhamú eér un i haraatlawaán ar paánga.»

¹⁹ Múk Israeli iri oó', «Atén loohidá' ur an oohaán, gám barnaxés atén nee hikwaarene, ma'aywók iga wahaán ngi buaán. Atén gár ta fiririimaan a pa/ángw waarahhama kilós, atén an waaraahhaán ar ya'aarén, gám gár hatlá' a sla'aanaaká.»

²⁰ Ala waawutmoó Edomu ina naagiís, iwa kaahi, «Atén a baloó ya/amanaaká.» Naxés slaqwaruusér /uuruú koom ar Edomu iri hardát as iwa slaqw.

²¹ Naagáy múk Edomu tari sií' múk Israeli tawa waaraahhi ar baraá digeemi'ín. Múk Israeli tari warqáy, loohír hatlá' kari óh.

Gwa'arár Aroni

²² Múk Israeli sleémeero tari tláy baraá Kadeshír wa ale, tari hardáh dír tloomár Hori.

²³ Naagáy didár tloomár Horiro, tidár dír digimuú Edomúr i dirii', AAKOÓ MUNGÚ Mose nee Aroni giri báy,

²⁴ «Aroni i gwaa', i dahiiká baraá yaamuudá' ni dír múk Israelírí haniis, asma kuungá' tsaraawo hara'ayar'eé' ana sié' baraá Meribaro.

²⁵ Tláw, Aroni nee garmaawós Eleasari taataahhang, ngi húp gawaá tloomár Hori.

²⁶ Aluuwo tlabaadaá gadiyeé awa Aroni ki dúx nee ki tsiitís ar garmaawós Eleasari. Aroni i gwaa' gawaá tloomarír kilá'.»

²⁷ Mose adoodá' kura hara'ayín nee AAKOÓ MUNGÚ gay tleéhh. Inooín tamaawo tari tsa/án gawaá tlooma dír geeraá muu sleémeero wa ale.

²⁸ Naagáy Mose Aroni guri tlaba' duúx, garmaawós Eleasari guri tsiitiís. Nee Aroni iri gwaá' gawaá tloomadár kilá'. Naagáy Mose nee Eleasari tari aweér gawaá tloomár wa ale.

²⁹ Muu sleémeero ngiwa axaás adór Aroni ira gwaá', tari tsuunqumiís deelo mibeeri tám.