FAARO 2 - Biblía Axweesantá Hhohho' ar Mungú 2004

Adór tlahhi'i kira qoomeemeés dír xafaywo

¹ AAKOÓ MUNGÚ Mose nee Aroni gina i axweés, giri báy,

² «Múk Israeli xafay'ín ngu tleehhiye', umuú hee i hooti didá' bendeérarós kay sihhtís tawa layár tlahhay'ín, xafay'ín ngu tleehhiye' as heémár Mungú ngiwa harweeriya'.

³ «Múk xafay'ín gu tleéhh bihhaá da/aáw amoodá' tsee/aamá niwa ti'imiiti, a bohhudaá dír bendeérár tlahhoó Yuda. Geeraharusmoó tlahhoó Yuda a Nashoni garmoó Aminadabu.

⁴ Boohharós adoodá' kara faari a hhawaate kume mibeeri faanqw nee tsiyáhh nee tsiire lahhoó'.

⁵ Múk xafay'ín gu tleéhh alaá tlahhoó Yuda a tlahhoó Isakari. Geeraharusmoó tlahhoó Isakari a Netaneli garmoó Suari.

⁶ Boohharós adoodá' kara faari, a hhawaate kume mibeeri kooán nee tsiyáhh nee tsiire tsiyáhh.

⁷ Naagáy tlahhoó aluudá' gi haár tay oo Sebuluni. Geeraharusmoó tlahhoó Sebuluni a Eliabu garmoó Heloni.

⁸ Boohharós adoodá' kara faari a hhawaate kume mibeeri kooán nee faanqw nee tsiire tsiyáhh.

⁹ Faarór múk dír xaftá Yuda ar adoodá' bohhuuín i diri'iia, dinkwaaro a kume tsiiruú wák mibeeri dakaát nee lahhoó' nee tsiire tsiyáhh. Mukwí an oo hháw geera tleemuú baraá aaiwo.

¹⁰ «Múk xafay'ín gu tleéhh bihhaá basa a bohhuudá' dír bendeérár tlahhoó Reubeni. Geeraharusmoó tlahhoó Reubeni a Elisuri garmoó Shedeuri.

¹¹ Boohharós adoodá' kara faari a hhawaate kume mibeeri tsiyáhh nee lahhoó' nee tsiire kooán.

¹² Múk xafay'ín gu tleéhh alaá tlahhoó Reubeni a tlahhoó Simeon. Geeraharusmoó tlahhoó Simeon a Shelumieli garmoó Suri-shadai.

¹³ Boohharós adoodá' kara faari a hhawaate kume mibeeri kooán nee gwaleél, nee tsiire tám.

¹⁴ Naagáy tlahhoó aluudá' tay Gadi. Geeraharusmoó tlahhoó Gadi a Eliasafu garmoó Reueli.

¹⁵ Boohharós adoodá' kara faari a hhawaate kume mibeeri tsiyáhh nee kooán nee tsiire lahhoó' nee mibeeri kooán.

¹⁶ Faarór múk dír xaftá Reubeni adoodá' bohhuuín i diri'iia, dinkwaaro a kume tsiiruú wák nee mibeeri kooán nee wak, nee tsiire tsiyáhh nee mibeeri kooán. Mukwí an oo hháw tsár tleemuú baraá aaiiwo.

¹⁷ «Naagáy aluuwo xafoó tlahhoó Laáwi i baraá tla/ángw xafaay sleémeero, inooín heémadár Mungú ngin loohisiyá', umuú boohharo baraá aaiiwo aqo bendeérár tlahhay'ín kan eeharaahar.

¹⁸ «Múk xafay'ín gu tleéhh bihhaá /uwa a bohhuudaá dír bendeérár tlahhoó Efraimu. Geeraharusmoó tlahhoó Efraimu a Elishama garmoó Amihudi.

¹⁹ Boohharós adoodá' kara faari a hhawaate kume mibeeri tsiyáhh nee tsiire kooán.

²⁰ Múk xafay'ín gu tleéhh alaá tlahhoó Efraimu a tlahhoó Manase. Geeraharusmoó tlahhoó Manase a Gamalieli garmoó Pedasuri.

²¹ Boohharós adoodá' kara faari a hhawaate kume mibeeri tám nee tsár, nee tsiire tsár.

²² Naagáy tlahhoó aluudá' gi haár a Benyamini. Geeraharusmoó tlahhoó Benyamini a Abidani garmoó Gideoni.

²³ Boohharós adoodá' kara faari a hhawaate kume mibeeri tám nee kooán, nee tsiire tsiyáhh.

²⁴ Faarór múk dír xaftá Efraimu ar adoodá' bohhuuín i diri'iia, dinkwaaro a kume tsiiruú wák nee dakaát, nee tsiiruú wák. Mukwí an oo hháw tám tleemuú baraá aaiiwo.

²⁵ Múk xafay'ín gu tleéhh bihhaá /iya a bohhuudaá dír bendeérár tlahhoó Dani. Geeraharusmoó tlahhoó Dani a Ahieseri garmoó Amishadai.

²⁶ Boohharós adoodá' kara faari a hhawaate kume mibeeri lahhoó' nee tsiire faanqw.

²⁷ Múk xafay'ín gu tleéhh alaá tlahhoó Dani a tlahhoó Asheri. Geeraharusmoó tlahhoó Asheri a Pagieli garmoó Okrani.

²⁸ Boohharós adoodá' kara faari a hhawaate kume mibeeri tsiyáhh nee wak nee tsiire kooán.

²⁹ Naagáy, tlahhoó aluudá' gi haár tay oo Naftali. Geeraharusmoó tlahhoó Naftali a Ahira garmoó Enani.

³⁰ Boohharós adoodá' kara faari a hhawaate kume mibeeri kooán nee tám, nee tsiire tsiyáhh.

³¹ Faarór múk dír xaftá Dani ar adoodá' bohhuuín i diri'iia, dinkwaaro a kume tsiiruú wák nee mibeeri kooán nee faanqw nee tsiire lahhoó'. Mukwí an oo hháw alhhe'eesáy tleemuú baraá aaiiwo.»

³² Mukwí an mukduú Israeli taa faár adoodá' tlahhi'ii'ín i dirii'iya' baraá xafay'ine nee bohhuuine. Inooín sleémeerowo a kume tsiire lahhoó' nee tám, nee tsiire kooán nee mibeeri kooán.

³³ Ala múk Laáwi kwa harafariiká dinkwa nee múk Israeli ar adoodá' AAKOÓ MUNGÚ Mose ngura hara'ayín.

³⁴ Múk Israeli adoodá' AAKOÓ MUNGÚ Mose ngwa báy gana tleéhh. Xafay'ín nguna tleehhiyé', wa/angwduú bendeéraduuín kay sihhín, nee tana hi'iimiít umuú hee nee mukós ar adoodá' tlahh'i'ín i dirii'iya' nee adoodá' gur'ér maray'ín i dirii'iya'.