FAARO 19 - Biblía Axweesantá Hhohho' ar Mungú 2004

Da/arár slér daa/aat

¹ AAKOÓ MUNGÚ axweesanto ina kumiít dír Mose nee Aroni iwa kaahi,

² «Gaarí an kaahi nee dabe tidá' anuú AAKOÓ MUNGÚ naa hara'ayiím. Kuungá' múk Israeli ádbawaak: Slér /ameeni ar daa/aat ar xaslxaansli wasl ngi slaye' ar taa isa taaqwantí tseegiiká as kawa ar gadiyuusi.

³ Kuungá' sleedaádá' ka dír kaahamusmoó Mungú Eleasari hanisá'. Ka duxá' tsee/aá xáftí ale, nee ka dír geeraawós wa gaasi.

⁴ Daqaní kaahamusmoó Mungú Eleasari tseerér niina ngi taataahhi nee ngi hikiisi ar diitsarós wai faanqw guruuwós ngu amór heémár Mungú xu'usi.

⁵ Sleerí ka sleémeero wa da/i dír geeraá kaahamusmoó Mungú wa ale. Umuúqo gaaro kan daa/, kaahartós, nee fu'unaywo, nee tseerero nee sankarose.

⁶ Aluuwo kaahamusmoó Mungú xa'anoó sahhti ngu taataahhi, nee xa'aanó ta bay hisoópo, nee se'éngw bee/aangw oo da/atén ngi qaasi baraá asltadá'.

⁷ Alaá tihe, kaahamusmoó Mungú tlabaawós ngi hhuuntsi nee slaqwtós ngi hamaatli ar ma'aay, daqaní dahamaá baraá xafi gi aleesláy, inós i baraá meeta ay tsiindo.

⁸ Heé sleedaádá' gaa daa/ sleeme tlabaawós ngi hhuuntsi ar ma'aay, nee i hamtlin ar ma'aay, ala inós sleeme i baraá meeta ay tsiindo.

⁹ Heé daba' hhohhó' da/arár sleerí ngi fiitsi, nee ngi huwi didá' hhoohhoo' ar tsee/aá xafi. Da/araarí kari amohhe'ees, nee kari ar gadiyuus nee dinku'uuma sleémeero ar Israeli ngiwa tleehhiyá' ar ma'aá tlakweema kir hamtliiti, as tawa ilahhooár tlakweema hingeesa.

¹⁰ Nee heé da/arár sleerí gaa fiits aqo tlabaawós gin hhuunts, ala inós i baraá meeta ay tsiindo. Dakwí an dákw alhota, nee dakwí oo múk Israeli nee hoomár baraá ayaaín hoota.»

Dabér hheehhe'eesa

¹¹ «Barnaxes hee tuuár hee gaa kwatiít, i baraá meeta deelo faanqwe.

¹² Bál tám nee bál faanqwe heewí i hamtlin ar ma'aydaá hheehhe'eesa, inós daqaní ku hhoohhoó'. Ala barnaxes aa hamtlinká bál tame nee bál faanqwe, heewí i baraá meetá wa kumamiit.

¹³ Heé tuaa gaa kwatiit, slaqwtá heé aa gwaa' barnaxes taa hheehhe'eesiiká, inós heémár AAKOÓ MUNGÚ ga meetagaas, inós ku paraatli nee múk Israeli. Hee aqo kun baynitis asma kwaa ma'aydaá hheehhe'eesárí hikiisiiká, nee meetaawós in kumaamitiyá'.

¹⁴ «Gaarí an dabér ta eehari, barnaxes hee aa gwaá' baraá heémaárí ale, umuúqo heé aa dahi baraá guruú heémaadá', laqaá heé baraá guruú heémaadá' i dirií', inós i baraá meeta deelo faanqwe.

¹⁵ Umuú xooslmoowo oo afa tuuntukumár koomaaká sleeme ku harmeetín.

¹⁶ Barnaxes hee tuuár heé taa gaás gaa kwatiít, laqaá tuuár heé aa kilós gwaa' tsee/aá dó' i ale, laqaá fartá hee, laqaá /aantár hee, heé adoorí i baraá meeta deelo faanqwe.

¹⁷ «As daanduú kudá' taa kiloóín meetagaasi'i, da/arár ilahhooadá' taa daá/ as tlakweema hingeesa ka haragaasi nee ma'aá yaae baraá hutlaay.

¹⁸ Heé daba' hhohhó' xa'anoó ta bay hisoópo ngu taataahhi, nee ngu tikiisi baraá ma'aydá', ngi hikiisi baraá heéma, nee gawaá xoosla sleémeero ar baraá guruudá' nee gawaá muu sleémeero oo baraadá' i dirií'. Nee ka hikiisi gawaá heedá' fara ga kwatiit, laqaá tuuár heé taa gaás, laqaá tuuár heé aa kilós gwaa', laqaá heé /aanta gaa kwatiit.

¹⁹ Bál tám nee bál faanqw, heé daba' hhohhó', heedaádá' baraá meetá i dirií' ngu ma'aydaá hheehhe'eesárí hikiisi, heedaádá' ngu hheehhe'eesi, heedaádá' baraá meetá i dirií', inós tlabaawós ngi hhuntsi nee i hamtlin, nee tsiindoowo meetaawós naa faakiyé'.

²⁰ «Ala barnaxes hee i baraá meetaáwí dirii' kwaa hheehhe'eesiiká, heé adór kwí ku baynitis dír dinku'uumár Israeliwo, asma inós heémár AAKOÓ MUNGÚ gaa meetagaás. Asma inós kwa ma'aaydaá hheehhe'eesárí hikiisiiká, gawaá adoorihe inós i baraá meeta.

²¹ Muu dakwí ngu oohi umuúqo daqto. Heé ma'aydá' hheehhe'eesa gi hikiís, tlabaawós ngi hhuntsi, nee kudá' ma'aydaá hheehhe'eesa gaa kwatiit, i baraá meeta ay tsiindo.

²² Umuú gaa ar taa kwatiít nee heé baraá meeta, aqo in meetaagwá', nee heé gadaádá' gaa kwatiit aqo in baraá meeta ay tsiindo.»