FAARO 18 - Biblía Axweesantá Hhohho' ar Mungú 2004

Gadiyér kaahamuuse nee ar tlahhoó Laáwi

¹ AAKOÓ MUNGÚ Aroni guri bay, «Kuúng nee daaqaywók nee múk guruú doó baabuúwók dinkwa nee kuúng dakuúsár aa tleehharut didá' hhoohhooe i gawaá daandeemoohúng, ala dakuúsár aa tleehharut baraá gadiyér kahamuusi'iimaro i gawaá daanduuwók nee daaqaywók kiloohúng.

² Kuúng hhaeewók kudaá tlahhoó Laáwi huweek, kudaá guruú doó baabuúwók huweek dír bihhiiwók, niwa dirók i haragwaaiya' nee uwa sagadiyuusiya' qoomár kuúng nee daaqaywók bar dír geeraá heémár lamabu'uúngwí diriiá'.

³ Inooín gadiyér kuúng taa ó' ngi tleehhiye', nee gadiyér heémaadá' sleémeero ngi boo/eesiye'. Ala inooín xosluudá' hhohho' ar baraá heéma mingiwa kwatiitiyé', laqaá mindiwa tseewuyé' dír kitángw ilahhooa as matawa qaátl dinkwa nee kuungá'.

⁴ Inooín nee kuúng ti dabe ote' baraá gadiyeérihe, nee gadiyeédá' kiwa hariím sleémeero ngi boo/eesiye' daanduú heémár Munguhe, nee slám heé hatlá' tumu wák miwa baraadií tseewúy.

⁵ Kuungá' kiloohúng gadiyér didá' hhoohhoo' an tlehhá' nee ar kitángw ilahhooa, as aníng buhhtaawo mawa daa/atúw amór xoorór Israeli.

⁶ Aníng hhaeehúng awa tlahhoó Laáwi iga tsawaár baraá tla/ángw múk Israelír wa ale, tawa adór qeemuú naa dirhúng i haniís. Inooín kaa paraátl as anuú AAKOÓ MUNGÚ as tawa gadiyuusi baraá heémár Mungú wa ale.

⁷ Ala kuúng kilók nee daaqaywók gadiyér kaahamuusi'iima sleémeero an tlehhá' ar ilakaahara, ar dír kitángw ilahhooa nee muruudá' sleémeero oo didá' ak hhoohhoo' ar alaá inqwaaridá' do' gwaa qasis. Gaarí an gadiyérhúng, asma kaahamuusi'iima ngina qeemu wa haniís. Heé hatlá' barnaxes aa tseewúy ku gaasi.»

Hariímár kaahamuusér Mungú

⁸ AAKOÓ MUNGÚ Aroni guri báy, «Aníng ilahhooadá' múk Israeli naa aníngí haniís, aníng ngi kuúngí haniís, muruudá' sleémeero hhohhó' naa aníngí haniisiyé', muruudá' sleémeero taa dimbé paraátl nee múk Israeli. Muruuwí sleémeero ngun kuúngí haniís nee daaqaywók as tawa koohúng, nee an hariímarhúng ar kahamuusi'iima ay alhhe'eesáy wasle.

⁹ Baraá tla/ángw muruú hhohhó' ló'wa ale, kudá' taa da/iika baraá asla, muruuwí an koohúng, adór ilahhooár balaangw, nee ilahhooár tlakweema hingeesa, nee ar dakuús hingeesa. Umuúqo gár muu naa sa haniisi ilahhooár hhohhó' wa ale, a tók nee ar daaqaywók.

¹⁰ Muruuwí /ayaak as tawa muruú ló'wa hhohhó', nee múk muruuwí gu /aáy a hhawaate kilooín, asma muruuwí dirhunge ku ló'wa hhohhó'.

¹¹ «Sleeme muruú hatlá' sleémeero oo múk Israeli ni duuxi adór ilahhooár ta haniisi dír Mungú, muruuwí a kók. Muruuwí ngu dirók i haniís, nee dír daaqaywók nee dír dasuuwoge, tawa hariímarhúng ay alhhe'eesáy wasle. Hee barnaxes ku harmeetinká baraá xwaylaroge i harín muruuwí nguwa /ayi.

¹² «Aníng mura' sleémeero kudá' hhohhó' oo múk Israeli naa aníngí haniís adór di/tá hhohho', nee difaáiro nee balángw geera ngu kuúngí haniís.

¹³ Bu'úngw geera sleémeero baraá qamuuwo, kudá' tindá dir'eéní huúw, a kók. Heé ta harmeetinká baraá xwaylaroge ngu /ayi.

¹⁴ «Umuú gaaro baraá yaamaá múk Israeliwo ar taa paraátl a toohúng.

¹⁵ «Umuú na/oó baris kudá' múk Israeli ni aníng i haniisi, bar an na/oó baris oo hee laqaá oo makiito'o, a kók. Ala na/oó baris oo hee i harín kuwa tu/, nee oo baris oo makiito'ór ta harmeetin i harín kuwa tu/.

¹⁶ Na/iikaá baris ki tu/i a qoomár bar slahhángw wák ngwaa ayé', gár kiri tu/i a peésár shekeéli kooán ar qoomayduú heémaadá' hhoohhoo'.

¹⁷ Ala tsa/eetaá baris awa hikwa, laqaá deeloó baris oo bee/aangw laqaá oo aara mi tu/aar, kuká' ki hhohho'. Tseerer'ín ka tsipipi'ís gawaá kitángw ilahhooa, nee wahhnar'ín ka dá/ as tawa ilahhooár slaahhareeriiwós anuú AAKOÓ MUNGÚ i sla'atamiisá'.

¹⁸ Fu'unaay'ín ki /ák, adór da/eewo nee fu'unaá naawe awa yaaér doó /iyáy, kudá' taa haniís tawa adór ilahhooa, tidá' ta haniisi dír Mungú, kuká' a kók.

¹⁹ «Muruudá' sleémeero hhohhó' oo múk Israeli ni aníngí hanmiisi, aníng ngu kuúng i haniís, nee daaqaywók nee dasuuwók as tawa hariímar'ín daqisleém. Gaarí an alqadór alhhe'eesay wasl dir'eene nee diroge nee dír xwaylaroge.»

²⁰ AAKOÓ MUNGÚ Aroni guri báy, «Kuúng aalír ta sleer i káhh, baraá yaamuuine, laqaá tawa garká koon baraá tla/angw'ine, aníng an gár kuúng ta koon, nee an aalirók baraá tla/ángw múk Israeliwo.»

Hariímár tlahhoó Laáwi

²¹ «Daanduú tlahhoó Laáwiwo, inooín iga ilahhooa sleémeero i haniís, tidár gár wák baraá muruú mibaango, tidá' múk Israeli ni aníngí hanmisiya' as tawa aalir'ín. Gaarí an bu'utuuín as daanduú gadiyeédár amohhe'eemisuú heémar'eé' tidá' hhoohhoo'.

²² Ala iimír hamí daxta, múk hatlá' oo Israeli miwa tseewúy dír heémár Mungú, tlakweema ngiri tleehhiyá' nee niri qatliyá'.

²³ Ala múk Laáwi kilooín an múk gadiyuús baraá heémadár Munguhe, nee dakuúsa sleémeero ar daanduú heémaadá' a daanduuín. Gaarí an dákw kumaamiít baraá qari sleémeero ar iitlawa. Múk Laáwi daqaari'iimár ta aali i káhh baraá yaamaá Israeliwo,

²⁴ asma ilahhooadár gár wák baraá muruú mibaango, tidá' múk Israeli ni hanmisi, aníng aga haniís as tawa aalir'ín. Gaarí an gár nisa oó', ‹Inooín aalír ta kon i káhh baraá tla/ángw Israeliwo.› »

Ilahhooár gár wák baraá muruú mibaango ar tlahhoó Laáwi

²⁵ Naagáy, AAKOÓ MUNGÚ iri axweés dír Mose iwa kaahi,

²⁶ «Slamí tlahhoó Laáwi kaangwí ti beer, ‹Qoomár ilahhooár gár wák baraá muruú mibaango bara ilaaoté', tidá' múk Israeli i hanimiisi as tawa aalirhúng, kuungá' baraá muruudá' taa sleeri'i gár wák baraá muruú mibaango ngin anuú AAKOÓ MUNGÚ i haniisá' tawa ilahhooarhúng.

²⁷ Ilahhooadá' ka ya/án tawa adór bu'úngw geera, laqaá adór sabiíbuú geera oo dooslusmo naa aníng i haniís.

²⁸ Naagáy, adoorí an adór anuú AAKOÓ MUNGÚ ir ilahhooárí hanmisa' tidár gár wák baraá muruú mibaango, tidá' taa dír múk Israeli wa ilaaoté', ilahhooarí ni aníngí hanisa', kuungá' an hanisá' dír kaahamusmo Aroni.

²⁹ Baraá ilahhooadá' sleémeero ta ilaaota'a, gár wák baraá muruú mibaango, tidá' ló'wa hhoo' nee ar hhoohhoo' an AAKOÓ MUNGÚ i hanisá'.

³⁰ Kuúng ki beer, «Barnaxes didaádá' ló'wa hhoo' ngaa hanisé', tidá' aa met a toohúng, kuungá' tlahhoó Laáwi, adoodá' dooslusmo balángw aa meet ngur waawatli, alaá ilahhooár balaangós oo geera nee oo sabiíbuwo burngwa hhe'eés haniisaro.

³¹ Kuungá' muruudá' tindi hanmiisi un /agá' umuúqo dír tay dir'a'a, kuungá' nee mukhunge, asma gaarí a bu'utuuhúng as tawa múk baraá heémár Mungú wa gadiyuús.

³² Kuungá' dakuúsár ta koonda' i káhh bar muruuwí ugwa /agé', barnaxes kuungá' AAKOÓ MUNGÚ ugwa didá' ló'wa hhoó í hanisé'. Ala kuungá' muruú hhohhó' oo múk Israeli mu meetagaasara', tari qatlá'.»