FAARO 17 - Biblía Axweesantá Hhohho' ar Mungú 2004

Hhartá Aroni

¹ Aluuwo AAKOÓ MUNGÚ ina axweés dír Mose iwa kaahi,

² «Múk Israeli ádbaweek u hhadaá mibaá nee tsár i huwiye', umuú geeraharusmoó tlahhaywo hhara wak. Heé hhara nga huuw umuuwós ku gawaá hhártí gooiín,

³ nee umuú Aroni gooiimeek gawaá hhartidá' tinda huúw as múk tlahhoó Laáwi. Hhartá wák ar daanduú geeraharusmoó tlahhaay.

⁴ Hhadoodá' ki qás baraá heémár Mungú dír geeraá sandakmoó alqado, didá' aníng nee kuúng tay dogaagitaan.

⁵ Hhartá heé naa tsawaár in harmá/. Ar gawaá loohirihe qununu/oó múk Israeli daanduuhunge un faák.»

⁶ Mose múk Israeli guri i axweés, umuú geeraharusmoowo hhartá wák gana huúw adoodá' tlahhaywós i dirii'i, hhado dinkwaaro a mibaá nee tsár. Hhartá Aroni sleeme i baraá hhadoodá' i dirí'.

⁷ Mose hhadoodá' giri qaás sleémeero dír geeraá AAKOÓ MUNGÚ baraá heémaadár lamabu'uungw.

⁸ Matlaatlér taa kayi, Mose iri dáh baraá heémár lamabu'uungw. Baraadae hhartá Aroni oo tlahhoó Laáwi, ina harmá/, nee iri /ayús nee mamu naa hamaariyé' awa xa'anoó taa bay loósi.

⁹ Naagáy Mose aluuwo hhadoodá' giri taataáhh dír geeraá AAKOÓ MUNGÚ wa ale, giri laqán dír múk Israeli sleémeero. Inooín ngiri ariyé', nee umuú geeraharusmoowo hhartós gari taataáhh.

¹⁰ AAKOÓ MUNGÚ Mose guri báy, «Hhartá Aroni ki/isek dír geeraá sandakmoó alqado. Hhartí ka didií batsi, as kahhó' tawa gurbua dír mukdá' dee/aanumiita nee as qununu/ay'ín iwa faaki daandueene. Bar adooriheeká inooín i qatliyá'.»

¹¹ Mose adoodá' AAKOÓ MUNGÚ ngura hara'ayín gari tleéhh.

¹² Múk Israeli Mose nguri bayé', «Ga/aaweek, atén aga hhaamaán, aga qwaaraán, atén sleémeero aga qwaaraán.

¹³ Umuúqo heé heémár AAKOÓ MUNGÚ gaa i tseewuyi aqo in gwaa'. Xáy a hhaamána sleémeero?»