FAARO 16 - Biblía Axweesantá Hhohho' ar Mungú 2004

Dee/aanuú Kora nee Datani nee Abiramu

¹ Aluuwo Kora garmoó Ishari, garmoó Kohati, garmoó Laáwi, múk tám oo tlahhoó Reubeni guna ar tláy, inooín a Datani, nee Abiramu daaqoó Eliabu, nee Oni garmoó Peleti,

² Mukwí sleémeero kuna dawa óh nee geeraharuusér iia tleer ar tsiire tsár nee mibeeri kooán, kudá' taa tsawaár nee dinku'uumár muu, niri dee/anutiyé' dír Mosewo.

³ Inooín tari burumburiít dír geeraá Mose nee Aroni ngiri bayé', «Kuungá' daxta ado a tlahhmisá', dinku'uumaarí ka hhoohhoo' nee umuú hee oo baraá dinku'uumarí ku hhoohhoó', nee AAKOÓ MUNGÚ a dinkwa nee atén sleémeero. Ahaá waáy bare kuungá' daxta tin múk urén tlehhitá' dír daanduú xoorór AAKOÓ MUNGUHE?»

⁴ Mose kaangwí nguwa axaás, iri gurúr qaát.

⁵ Kora nee mukós kudá' gwaa eehari giri báy, «Matlo matlaatle, AAKOÓ MUNGÚ heewós ngu laqán, nee axáy a heemá oo hhoohhoó', nee a heemá oo i pa/aángwí haniisi oo inós gu i tseewúw, kudá' aa tsawaár an kudá' gu i tseewúw.

⁶ Gimsé', adoorí tleehhaak: Matlaatleero kuúng dinkwa nee mukók xosluudá' ta gil'ór qamaamin tataahhaak,

⁷ gil'ór asla ka qasá' nee muruú mooyángw tsuú' ku gawaá daanduudá' i qasá', nee daqaní ngi hubá' dír geeraá AAKOÓ MUNGÚ. Daqaní a tsaahhaán heé taa tsawaár nee AAKOÓ MUNGÚ a heemá. Kuungá' múk Laáwi ado aga tlahhasé'.»

⁸ Mose Kora guri malé báy, «Kuungá' hhay Laáwi, iia qaasaak!

⁹ Xáy kuungá' ka ga/eera', a gár niinaáwe tunduwa tsawaár baraá tla/ángw múk hatlae as Mungú kuwa sagadiyusa' baraá heémár AAKOÓ MUNGÚ wa ale, nee tawa sihhmita' as xooroorí kawa sagadiyuusa'?

¹⁰ Mungú naa ilaiwa/amér i haniís inós kuwa i tseewuura', kuungá' dinkwa nee múk Laáwi sleémeero. Tam adoorí hám daxta a malé kaahamusi'iimár sla'á'a?

¹¹ Gawaá adoorihe kuúng nee mukoge aga burumburité' AAKOÓ MUNGÚ kuwa i slaqwa'. Xáy Aroni a heemá kuwa i qununu/a'?»

¹² Mose afo gári ya/aáw amór Datani nee Abiramu daaqoó Eliabu as kiwa ateeti, ala inooín tari oó', «Atén ni daqawanaaká.

¹³ Xáy gaarí an gár niinaáwe tiwa dúx baraá yaamaá Misrír wa ale, yaamaá diihhooár ilwa nee dane, as tiwa tsu/ baraá xaanxaywí ale? Slám ti malé sawaawuti'iín!

¹⁴ Tam adoorihe ta hubiiká baraá yaamaá diihhooár awa ilwa nee dane, nee sleeme taa qamaá sabiibií sleeriiká as kiwa aalaan. Kuúng ka xu' mukwí sleémeero uqo taampuúr xáy?»

¹⁵ Mose iri ló'wa buúhh, AAKOÓ MUNGÚ guri báy, «Ilahhooár mukwí ma oohaar. Aníng daqoó hee oo naa ar tláw i kaahh, laqaá heé naa slahh'eés i kaahh.»

¹⁶ Mose Kora guri báy, «Matlo hardaharé' nee mukók dír geeraá AAKOÓ MUNGÚ. Aroni sleeme ni hardah.

¹⁷ Umuú heewo dirhunge xooslmoowós oo asla ngu taataahhi nee mooyángw tsuú' ngu gawaadá' i qaasi, nee guri huuw dír geeraá AAKOÓ MUNGÚ. Xooslaarí dinkwaaro a tsiire tsár nee mibeeri kooán. Sleeme kuúng nee Aroniwo umuú heewo xooslmoowós.»

¹⁸ Naagáy, umuú heewo xooslmoowós guri taataáhh gil'ór asla nee mooyangwdá' tsuua, tari tláy, tari sihhiít dír afkú heémár Mungú, dinkwa nee Mose nee Aroni.

¹⁹ Aluuwo Kora muu sleémeero guri dinkwaárí burumbuúr, tari sihhiít dír geeraá Mose nee Aroni, kudá' dír afkú heémár Mungú i diriiá'. Nee xirfuú AAKOÓ MUNGÚ iri geehhoúy dír dinku'uumadá'!

²⁰ AAKOÓ MUNGÚ iri axweés dír Mose nee Aroni iwa kaahi,

²¹ «Kuungá' dír mukwihe ti paratle', as kahhó' hamír kilá' i adaá hhaamiís.»

²² Ala Mose nee Aroni tari gur'ér qaqtín tawa kaahi, «Aá AAKOÓ MUNGÚ Kudaádá' oo slafíngw muu sleémeero, xáy heé wák bira dakuús, aqo xooro sleémeero an i búhha?»

²³ AAKOÓ MUNGÚ ina axweés dír Mose, iwa kaahi,

²⁴ «Muu ádbawaak, ta suruuki dír heémár Korawo, nee ar Dataniwo nee ar Abiramuwo.»

²⁵ Naagáy, Mose iri tláy amór heémár Datani nee Abiramu, ti alkoná' nee bariisér múk Israeli.

²⁶ Iwa hardáh, muu guna báy, «Quutlé' dír heemadaá mukwí tlakwe, gar'ín tam ar wák ma kwatiitara' as mutundwa hhaamiís as tlakweemaaín sleémeero.»

²⁷ Muu didár heémár Kora, nee ar Datani nee ar Abiramu ngiri geexayé'. Datani nee Abiramu niri ti'iitiyé' dír afér heemaduuín niri didií sihhitiyé', ti alkoná' nee tlaaway'ín nee na/ii'ín nee kudaá qaweerowo.

²⁸ Qoomaarihe Mose giri báy, «Adoorí an adoodá' kuungá' AAKOÓ MUNGÚ kur tsahha' adór aníng ira ya/aáw, aníng tí aga sagw'ér tleehhár awiiká.

²⁹ Mukwí barnaxes taa qaátl adór múk hatlá' ir qatlaatlin, laqaá amotlakwe gana sláy adór múk hatlá', daqaní aníng AAKOÓ MUNGÚ iga ya/awiiká.

³⁰ Ala barnaxes AAKOÓ MUNGÚ gár /aben gaa tleéhh, yaamu afa nguri awaatliyé' as inooín ngiwa gu/iya', dinkwa nee muruuín kudá' sleémeero i kona'a, iri slafi /eetiyá' baraá gi'i, daqaní ka xuá' adór mukwí AAKOÓ MUNGÚ ngura waaqaaiyé'.»

³¹ Qoomaadár kilá' Mose kaangwí sleémeero ooaro nguwa hhe'eés, yaamuudaá didár Datani nee Abiramu niri feehhitiyé',

³² afa nguri awaatliyé' inooín ngiri gu/iyé' dinkwa nee múk maray'ín sleémeero, mukdá', nee eeharuusér Kora nee daqaari'iimar'ín sleémeero.

³³ Naagáy, inooín dinkwa nee muruuín sleémeero kudá' ta kon tari slafiingw /eét baraá gi'i. Yaamu niri haraki/iyé', sleémeero tari hhán.

³⁴ Múk Israeli sleémeero kudá' didií tsewén /aa/eeín ngiwa axaasiyé' tarí goów tawa kaahi, «Atén yaamu mitiwa gu/iyé' sleeme.»

³⁵ Naagáy AAKOÓ MUNGÚ asla ngiri huúw, mukduú tsiire tsár nee mibeeri kooán aa mooyángw da/tá ay, guri hhaamiís.

Xooslár asla

³⁶ Alaá tihe, AAKOÓ MUNGÚ ina axweés dír Mose, iwa kaahi,

³⁷ «Eleasari garmoó Aroni ádbaweek, xooslaadár asla ngi hingeesi baraá aslto, asltadár baraá do' ngi bihheérí diyaa/i asma xoosluudá' ka hhohho'.

³⁸ Asma mukwí ngina huwiyé' dír kitángw ilahhooár AAKOÓ MUNGÚ. Gimáy, xooslarír mukwí taa tsuú/ as tlakweemaaín taataahheek, kwahhuteek as kawa daqa niinawes as tawa muruú kitángw ilahhooa kur tuuntukun. Gaarí an gurbu'utá múk Israeli sleémeero.»

³⁹ Naagáy, kaahamusmo Eleasari xooslaadár muqslár sirda/aten, nee hhansi'idaá muqslár sirda/aten, kudaá mukdá' asla aa fák naa huúw gari taataáhh, gari kwahhuút tawa tuuntukumár kitángw ilahhooa.

⁴⁰ Gaarí an gurbu'utá múk Israeli, hee bar a kaahamusmoó xwaylár Aroniwooká, miwa daqáy dír kitángw AAKOÓ MUNGÚ kuwa ilahhooár mooyángw tsuú' i da/a/an. Bar adooriheeká aqo kun qwaarees, ar adoodá' Kora nee mukós kira hhaamiís. Adoorí sleémeero ina tleehharút adoodá' AAKOÓ MUNGÚ Eleasari ngura ádbáy ar loohír Mose.

Aroni muu guna ba/amís

⁴¹ Matlaatlér taa kayi, múk Israeli sleémeero ina qununuú/ dír Mose nee Aroni tawa kaahi, «Múk AAKOÓ MUNGÚ ugwa tsu/é'.»

⁴² Qoomár niwa burumbuuriyé' dír geeraá Mose nee Aroni as tawa qununu/i, gur'er'ín kana amór heémár Mungú xu'ús, tawa qaytsiít naxes heémaadá' kaa tuuntuúk nee huunki, nee xirfuú AAKOÓ MUNGÚ ina geehhooúy didaádae.

⁴³ Mose nee Aroni tari tláy, tari sihhiít dír geeraá heémár Mungú,

⁴⁴ nee AAKOÓ MUNGÚ ina axweés dír Mose iwa kaahi,

⁴⁵ «Dír dinku'uumasinge ti paratle', hamír kilá' i adaá hhaamiís!» Ala Mose nee Aroni tana gur'ér ar qaát.

⁴⁶ Mose Aroni guri báy, «Xooslomoowók taataahheek, asltadár gawaá kitángw ilahhooa ka gawaawós i qás, nee mooyángw tsuú' ku gawaá asltadá' i qás, ta'aaiím ar gaanslaay amór dinku'uumár muu, haraki/isa tleehheek as inooín. Buhhtaá AAKOÓ MUNGÚ naa hardihiyé', asma tiqtír pu/i aa qaroó iimu/uún.»

⁴⁷ Aluuwo Aroni adoodá' kwaa báy nee Mose gari tleéhh. Xooslmoowós kuduú asla guri taataáhh iri ta'aaín amór dinku'uumaadá' ay tla/ángw mukdá' pu/i iwa iimu/uún, mooyangwdá' tsuú' guri daá/, haraki/isa gari tleéhh as muu.

⁴⁸ Adoorí ngiwa hhe'eés tleehharo, tiqtidár pu/i iri fák, inós iri sihhiít tla/ángw mukdá' aa qaatl nee kudá' slaáf.

⁴⁹ Faarór múk aa qaatl baldae a kume mibaá nee tsiyáhh nee tsiire faanqw, kudá' naa qatliye' as dee/anuú Kora kaa dír kuká' i harafariiká.

⁵⁰ Tiqtidár pu/i iwa fák, Aroni iri kií/ amór Mose dír afkú heémár Mungú.