FAARO 15 - Biblía Axweesantá Hhohho' ar Mungú 2004

Dabér ilahhooa

¹ AAKOÓ MUNGÚ ina axweés dír Mose iwa kaahi,

² «Xoorór Israeli kabeeto, qoomár bara hardaté' baraá yaamuudá' ta aalír eera', kudá' aníng ni dirhúngí haniis,

³ anuú AAKOÓ MUNGÚ in ilahhooárí hanisá', ilahhooár da/a, laqaá ilahhooár muruú ta tsu/i, as hee al'axweesantós ngiwa boo/eesi, laqaá ilahhooár sla'aari, laqaá ilahhooár deelór uren, tidá' taa qaás as slaahhareeriiwós anuú AAKOÓ MUNGÚ iwa sla'atisiya'. Ilahhooarí ngi baraá hikwaahúng wa hanisá', nee baraá muruú ququmát.

⁴ Heedaádá' ilahhooár hanmiís dír AAKOÓ MUNGÚ, ilahhooár balaangw ngi haniisi sleeme, ar kílór wák ar puuruú natsaatsaá' oo taa lufuú/ nee oo aleedoók nee liítár wák ar di/i,

⁵ dinkwa nee difaáír liítár wák as tawa ilahhooár muruú wahaangw. Muruuwí sleémeero kun alhaniis nee gwaanda, laqaá gurta kuduú ilahhooár da/a, laqaá oo ilahhooár muruú ta tsu/i.

⁶ Gár ta ilahhooár wa hanmiisi bar an gwaanda, kuungun ilahhooár balángw alhaniis ar puuruú natsaatsaá' oo kílór tsár oo taa aleedoók nee liítár wák nee tlaqi ar di/i,

⁷ dinkwa nee difaáír liítár wák as tawa ilahhooár muruú wahaangw. Slaahhareeraá ilahhooarí AAKOÓ MUNGÚ nguri sla'atisiyá'.

⁸ Gár ta ilahhooár wa hanmiis bar an awuú batlitamo as tawa ilahhooár da/a, laqaá ilahhooár muruú ta tsu/i as hee al'axweesantós ngiwa boo/eesi, laqaá as tawa ilahhooár wayda,

⁹ ilahhooarí kingin ilahhooár balángw alhuuw ar puuruú natsaatsaá' oo taa lufuú/ oo kílo tám, oo taa aleedoók nee liíta tsár ar di/i,

¹⁰ dinkwa nee difaáír liíta tsár. Slaahhareeraá ilahhooarí AAKOÓ MUNGÚ nguri sla'atisiyá'.

¹¹ Adoorí an adór ta tlehh dír ilahhooár umuúqo awuwo nee ar gwaanduwo nee ar umuúqo deelmoó gwaanduwo, nee ar gurtuwo.

¹² Qoomár faarór hikwaá ta ilahhooár wa hanmiisi bira doogiín, faarór muruudá' ta hikwaá alhanmiisi sleeme in doogiín.

¹³ Umuúqo heé Israeliro aqo dabeerí gan tleehh qoomár bir ilahhooár da/tá hanmiis tidá' slaahhareeriiwós AAKOÓ MUNGÚ ngu sla'atamisá'.

¹⁴ Nee barnaxes hoomoó waaraáhh laqaá oo ayaahúng hoót i ilahhooár mooyángw tsuú' haniisár wa slaa' ar asla as tawa ilahhooár AAKOÓ MUNGÚ gu sla'atamís, hoomoowí adoodá' kuungá' ta tlehhita' ngi eehari.

¹⁵ Baraá qari sleémeero ar hi'iita dabeedá' kuungá' ta eeharaahada' hoomoó nee kuungá' alhootá' sleeme gan eehar, asma kuungá' nee hoomoowí dír geeraá AAKOÓ MUNGUHE dimbé i káhh.

¹⁶ Kuungá' nee hoomoodá' dabér nu geeraharahaar a wak, nee kaahír nu geeraharahaar a wak sleeme.»

¹⁷ AAKOÓ MUNGÚ ina axweés dír Mose i kaahi,

¹⁸ «Múk Israeli ku beer, qoomár bara daté' baraá yaamuudá' aníng kuungá' nuy huuw,

¹⁹ qoomár bar balángw yaamuudá' u /agá', balaangw ngu bahh qasisá' as nguwa hanisa' dír anuú AAKOÓ MUNGÚ.

²⁰ Qoomár bar mikaátér tlehhitá', mukatmoó geera oo balángw geera ku hanisá' as tawa ilahhooár didár afeenír balaangw muxta.

²¹ Kuungá' baraá qari sleémeero ar hi'iita anuú AAKOÓ MUNGÚ in ilahhooarí hanmisá' ar mukatmoó geera oo balángw geera.

²² «Ala barnaxes hara'ayar'eé' tidá' anuú AAKOÓ MUNGÚ naa haniís dír Mose sleémeero eeharto aga harslaaqaté',

²³ muruudá' sleémeero oo anuú AAKOÓ MUNGÚ na dirhúngí hara'ayiím ar afkú Mose iimír bál hara'aya ngiwa haniís nee tam aluudae baraá qartuhunge,

²⁴ daqaní barnaxes dakuúsarí a gár taa tsabindi'iiká, dinku'uuma ga xu'uká, dinku'uuma awuú niiná oo wák ngu hanis as tawa ilahhooár da/a, ar slaahhareeriiwós AAKOÓ MUNGÚ ngu sla'atimisá', dinkwa nee ilahhooár balaangw nee ar muruú wahaangw adoodá' hara'aya i kat. Nee sleeme muu gurtuú wák ku haniisi as tawa ilahhooár tlakweema hingeesa.

²⁵ Kaahamusmoó Mungú haraki/isa gan tleehh as daanduú dinku'uuma sleémeero ar Israeli, inooín kiri gurtláy as dakuúsadá' ar pa/aayo, nee ilahhooar'ín ngi huwiye', ilahhooár ta da/i dír AAKOÓ MUNGÚ, nee ilahhooár tlakweema hingeesa as daanduú dakuúsadá'.

²⁶ Dinku'uumár Israeli sleémeero nee hoomár ayaahúng hoot kiri gurtláy, asma sleémeero tlakweema kaa tleéhh.

²⁷ «Heé wák bar aa dakuús ar pa/aayo, inós dareemír leei ar kurkú wák ngi ilahhooár tlakweema hingeesár wa haniisi.

²⁸ Kaahamusmoó Mungú haraki/isa gan tleehh dír geeraá AAKOÓ MUNGÚ wa ale, as daanduú heewí dakuúsár pa/aayo gaa tleehh, nee inós ku gurtláy.

²⁹ Yaamuloouusér Israeli laqaá hoomár ayaaín hoota, dír mukwí sleémeero dakwí wák na eeharaak dír umuúqo heé dakuúsár pa/aayo gaa tleehhi.

³⁰ «Ala barnaxes hee iwa dakuusi ina tsabín a dakuús ar pa/aayorooká. Inós bar an yaamuloousmo, laqaá hoomo, inós gár kuwa hariím a gaasa. Asma inós AAKOÓ MUNGÚ gun waaqaqaa'.

³¹ Asma inós kaahír AAKOÓ MUNGÚ gana sií', nee hara'ayaarós gana sií', heewí gár kuwa hariím aqo kun gaas. Lo'ór gwa'araarós inós kilós gun /ák.»

Deelór Sabaáto kawa hhitín

³² Looarka wake múk Israeli tawa baraá xaanxáy dirii'i, heé nguna ariyé' i migiruú sleemiis bál deelór Sabaátoro.

³³ Naagáy heewí kuri huúw dír geeraá Mose, nee Aroni nee dinku'uma sleémeero ar Israeli.

³⁴ Inooín nguri qaasiyé' baraá doó tseegamoórí ale, asma dabér gwa/aat i káhh, daanduú heé adór kwihe.

³⁵ Naagáy, AAKOÓ MUNGÚ Mose guri báy, «Heé adór kwí harimaaro aqo kun gaas, kun tlaa/ér tlaquut nee dinku'uuma sleémeero tsee/aá xaftá wa ale.»

³⁶ Naagáy muu guri tsee/aá xaftí duúx, heedaádá' kuri tlaquút ar tlaa/e, iri gwaá', adoodá' AAKOÓ MUNGÚ Mose ngura hara'ayín.

Pasleemaá inqwar kiwa afuuntluri

³⁷ Aluuwo AAKOÓ MUNGÚ Mose guri báy,

³⁸ «Múk Israeli ku beer, pasleemaá inqwaruhúng afuuntluráy tleehhaak, ka tsegá' ar neewór sirbo/. Adoorí ka tlehhitá' umuú qarta iitlawa.

³⁹ Afuuntluraywí qoomár bura aandé', kuungá' nu inslawtamisi, hara'ayár AAKOÓ MUNGÚ sleémeero, nee nee adoodá' i kat ka tlehhá' as kuungá' ilaatleerír munerhúng ma eeharaharaara', nee muruú ilaahunge ta ara'aandá'.

⁴⁰ Afuuntluráywí kuungá' hara'ayar'eene nu inslawtamisi, nee adoodá' hara'ayar'eé' sleémeero i kat ka boo/esá', kuungá' daqaní a muk'eé' oo hhohhó'.

⁴¹ Aníng an AAKOÓ MUNGÚ, Munguúhúng kudá' naa duux baraá yaamaá Misrír wa ale, as tawa Munguúhúng. Aníng an AAKOÓ MUNGÚ, Munguúhúng.»