FAARO 13 - Biblía Axweesantá Hhohho' ar Mungú 2004

Tsawtsawuuse

¹ AAKOÓ MUNGÚ Mose guna báy,

² «Muu ya/aaweek yaamaá Kana'ani, kudá' ni haniisár wa slaa' dír Israeli, ngi tsawtsawuusiye'. Heé wák ya/aaweek dír umuú tlahhaaywo, nee masók heedaádá' a geeraharusmoó tlahhaydá'.»

³ Naagáy Mose muu guri baraá xaanxoó Paranír wa ya/aáw ar adoodá' AAKOÓ MUNGÚ ngura hara'ayín. Mukdá' sleémeero aa ya/aáw an geeraharuusér tlahh'aá Israeli.

⁴ Mukdá' taa ya/aáw umer'ín a tí: Baraá tlahhoó Reubeniwo a Shamua garmoó Sakuri.

⁵ Baraá tlahhoó Simeoniwo a Shafati garmoó Hori.

⁶ Baraá tlahhoó Yudawo a Kalebu garmoó Yefune.

⁷ Baraá tlahhoó Isakariwo a Igali garmoó Yosefu.

⁸ Baraá tlahhoó Efraimuwo a Hoshea garmoó Nuni.

⁹ Baraá tlahhoó Benyaminiwo a Palti garmoó Rafu.

¹⁰ Baraá tlahhoó Sebuluniwo a Gadieli garmoó Sodi.

¹¹ Baraá tlahhoó Yosefuwo laqaá tlahhoó Manase a Gadi garmoó Susi.

¹² Baraá tlahhoó Daniwo a Amieli garmoó Gemali.

¹³ Baraá tlahhoó Asheriwo a Seturi garmoó Mikaeli.

¹⁴ Baraá tlahhoó Naftaliwo a Nabi garmoó Wofsi.

¹⁵ Baraá tlahhoó Gadiwo a Geueli garmoó Maki.

¹⁶ Umeerí ar mukdá' Mose aa ya/aáw yaamaá Kana'ani ngiwa tsawtsawuusiya'. Mose Hoshea garmoó Nuni guna umií tsaát, guri báy Yoshua.

¹⁷ Mose inooín giri ya/aáw yaamaá Kana'ani ngiwa tsawtsawuusiya', giri báy, «Tlawsé' ay amór yaamaá Negebu, nee amór yaamaá tlom'i.

¹⁸ Yaamuudá' ngi tsawtsawusá', axáy adór i dirii'iya'. Nee múk ayaadá' hoót ngu aandá', axáy i /uureemaá koná'a, laqaá ki daqe tlakw, axáy ki yaariíre laqaá ki niina.

¹⁹ Axáy yaamuudá' i hootiya' i wahhaaría laqaá gaa kwankwaari, nee gixsadaá ni hootiya' kaa tleéhhi ar koo/ír gawit laqaá aasla'áy.

²⁰ Yaamu xuuxuuaak, xáy i wahhaaría, laqaá yaamaá tawo kaahaar, nee i xaa'aá koná'a' laqaá i kahhiyá'. Kuungá' masók a pihh'uumár koondá', nee birni ki/á' masók mamaá yaamuudá' ngi bahh hubá'.» Qoomaadá' an qoomár mamaá sabiíbu iwa hamnoó slaiya'.

²¹ Naagáy, mukdá' iri tláy, yaamuudá' kiri tsawtsawuusár áy iimír xaanxoó Sinír wa tleemu ay Rehobu, isaapoó loohír dahmuú aw Hamati.

²² Tana tláy ay Negebu, tari hardáh ay gixsár Hebroni. Tlahhoó Anaki in baraadá' hoot, inooín án múk Ahimani nee múk Sheshai nee múk Talmai. (Gixsár Hebroni kana geerií qaro tleéhh kureeri faanqw dír gixsár Soaniro tidár yaamaá Misri.)

²³ Qoomár tawa hardáh baraá xatstá Eshkoli, halmír sabiíbu ar /aroó wák koom ngiri tsatiyé'. Múk tsár gari gagaár ar xa'ano. Nee mamaá komamaanga nee mamaá /antsihe ngiri huwiyé' sleeme.

²⁴ Didaádá' kari báy xatstá Eshkoli asma /arayduú sabiíbu múk Israeli aa didá' wa tsaát.

²⁵ Alaá deelo mibeeraá tsiyahhe mukdá' iri waátl baraá yaamu tsawtsawumisuuwo.

²⁶ Tari kií/ amór Mose, nee Aroni nee amór dinkwaadár múk Israeli sleémeero, tidár Kadeshi baraá xaanxoó Parani, kangwdá' naa baraadá' wa ariyé' nguri ooiyé' dír muu sleémeero, nee mamuudaá xaai ngiri laqané'.

²⁷ Mose nguri bayé', «Aga hardáh amór yaamuudá' ti ya/áp, yaamuudá' a yaamaá diihhooár ilwa nee dane, nee gaarí an /aroó mamaá baraá yaamuudá'.

²⁸ Ala yaamuloouuser'ín an múk ló'wa /uureemaá koóm, nee gixsaduuín ki gawden. Kina tleéhh ar koo/ír gawit nee ki diren. Slamí amoodae xwaylár Anaki ana araán.

²⁹ Múk Amaleki dír Negebu ngi hootiyá'. Múk Hiti, nee oo Yebusi nee oo Amori dír i hootiya' a gawaá tlom'i, nee múk Kana'ani dír i hooti a isaapoó Tlawtá Tla/aangw nee afaá yaaér Yordani.»

³⁰ Ala Kalebu muu guri gurkwa/ás dír geeraá Mose wa alé iwa kaahi, «Gusé' yaamuudá' i aalaán. Asma atén aleesleemu u koomaán oo arba/ati kawa slawaan.»

³¹ Ala mukduú hatlá' nee inós taa alkone' baraá yaamu tsawtsawuusaro tana oó', «Atén slaqwarár nee mukdá' a aleeslawanaaká, asma inooín i /uureemaá koná' ta atene.»

³² Gawaá adoorihe lameemaá tawo ngiri alki/iitiyé' dír múk Israeli daanduú yaamuudá' naa tsawtsawuusár ayi'i, tawa kaahi, «Yaamuudá' atén naa tsawtsawuusár awaán an yaamaá muk'ín tsu/á'. Nee sleeme múk atén taa araán a múk ló'wa dirén.

³³ Baraadae atén múk dirén una araán, kuduú xwaylár Anaki. Nee atén dir'ine a adór tsaxw'i, adoorí an adór inooín atén tir ga/aya' sleeme.»