FAARO 12 - Biblía Axweesantá Hhohho' ar Mungú 2004

Miriamu slahhtá Mungú ngiwa sleér kawa muúx

¹ Qoomár tawa baraá Haserotírí dirii'i, Miriamu nee Aroni, Mose nguri iimu/uné' kaantingo as /ameenidár Kushi aa duúx,

² tawa kaahi, «Ahaá AAKOÓ MUNGÚ aqo in axweési ar loohír Mose kilós? Ahaá aa axweesiikáhe ar loohír atén sleeme?» AAKOÓ MUNGÚ axweesantí gari axaás.

³ (Mose a heé ló'wa tsatsaa'aár ta muu sleémeero oo baraakaá yaamuwo.)

⁴ AAKOÓ MUNGÚ Mose nee Aroni nee Miriamu giri gaanslár ateét, iwa kaahi, «Qwalaasaré' baraá heémár Mungú, kuungásingá tám.» Naagáy tamaawo tari dáh baraá heémaadár Mungú.

⁵ AAKOÓ MUNGÚ iri aweér ar uhmoó huunki, iri sihhiít dír afkú heéma, Aroni nee Miriamu giri ateét. Tsaraawo tari geerií suruúk.

⁶ Naagáy AAKOÓ MUNGÚ giri báy, «Axweesante'eé' iiárií qaasaak, ‹Barnaxes aarusmo i deer baraá tla/angwhunge, aníng tin dirós i xu'utís ar loohír iigu'utu, nee tari axweesaán ar baraá tlata.

⁷ Ala daanduú sagadiyusmooeé' Mosewo a adooriheeká. Inós ku inkihhím baraá dooeé' sleémeero.

⁸ Gawaá adoorihe aníng nee inós an axweemaamisaán ar afe, nee ar geehhooeema, nee sleeme ar axweesantá bo/eeká. Inós slaqsay'eé' anuú AAKOÓ MUNGÚ guna ár. Gawaá adoorihe, asma waáy kuungá' sagadiyusmooeé' Mose musa qitlé' kaantiingo?› »

⁹ AAKOÓ MUNGÚ buhhtaawo iri qa/iít dir'ín, iri tláy.

¹⁰ Qoomár huunkidá' iwa gáwtí tleér gawaá daanduú heémaro, naxés Miriamu tiqtír tsatmit gaa sleér, ina /awakuúr adór tlaa/aá tluwaay. Aroni iwa qaytsiít amór Miriamu, naxés i tiqtír tsatmituú koón.

¹¹ Aroni Mose guri bay, «Aá aakooeé', atén miti slahh'eesaar as kángw daktu'uuma nguwa tleehhaán nee tlakweemawo.

¹² Gám Miriamu ma adór gurkwahhama tleehhaar, tidá' slaqwtós sleémeero aa lak tsutsu' iimír kingiwa laqwaali.»

¹³ Mose iri /aa/aá ay dír AAKOÓ MUNGÚ iwa kaahi, «AAKOÓ MUNGÚ, aníng kuúng un fiririím, hungu/uuseek.»

¹⁴ Ala AAKOÓ MUNGÚ Mose guri báy, «Barnaxes kaa gitsee/a i tsuúq nee baabuúwós, xáy kaa mureekeesiikáhe deelo faanqwe? Gimáy, baraá xafto tsee/ií duuxeek deelo faanqwe, daqaní ni baraá xáftí ki/.»

¹⁵ Gawaá adoorihe Miriamu kari tsee/áy guús baraá xafto deelo faanqw. Muu iri didá' wa iwiít, aaiiwo taa kumiitiiká ay bál Miriamu kingiwa ki/ís baraá xafi.

¹⁶ Alaá tihe muu iri Haserotír wa tláy, xafay'ín kuri tleéhh baraá xaanxoó Parani.