FAARO 11 - Biblía Axweesantá Hhohho' ar Mungú 2004

Dír ta bay Tabera

¹ Muu qununu/aay guna iimu/ún dír AAKOÓ MUNGÚ as daanduú slahh'amuudá' naa slayé'. AAKOÓ MUNGÚ adoorí ngiwa axaás, iri ló'wa buúhh, muu guri ásltí kwaáhh. Asltí iri ót tla/angw'ín wa ale, bihhaá wák awa xafaay giri /ák.

² Muu iri /aá/ dír Mose, Mose AAKOÓ MUNGÚ guri firín nee asltadá' iri gwá'.

³ Gawaá adoorihe didá' kari báy Tabera, asma didá' an dír asltá AAKOÓ MUNGÚ iwa ót baraá tla/ángw'ín wa ale.

Mose geeraharuusér mibeeraá faanqw ngiwa tsawaár

⁴ Baraá tla/ángw múk Israeliwo muko i deer oo fu'unaay gaa ló'wa haayuus, nee múk Israeli iri /aa/amín tawa kaahi «Ís hamí hee adór fu'unaay ngir tláy!

⁵ Baraá yaamaá Misriro atén siyó tlaxo wásl una /ayaán siiwár kuwa inslawaán. Axáy taangí inslawaak nee tikiti nee muruuko adór kuchunguru nee kuchunguruú saumu.

⁶ Ala ga/aawaak hamí aga slaaqamiitaán, muruú /ayma i kaahh, aqo har muruú /aymaarí ta babay maána umuúqo daqto.»

⁷ Gaarí ta bay maána uraraango a adór ileelaá maangwaré', kalaywós a booreék.

⁸ Muu ina harweerirín as ngiwa sleemisi nee ngiwa burumbuurina', aluuwo kari xoosl laqaá kan tu'uut baraá kune, nee kari qaas baraá hutlaay nee maandasi kuri tleehh. Tsuaarirós a adór mandaásoó taa garangaár ar di/i.

⁹ Qoomár xweeraawo hara' birna hardáh, maána sleeme nin páhh.

¹⁰ Mose muu guri axaás iwa /aa/amin dír afér maray'ín wa ale, umuú hee dír afkú heémaarós. Naagáy AAKOÓ MUNGÚ buhhtaawo iri ló'wa qa/iít, nee Mose kuri mune duúx.

¹¹ Naagáy Mose AAKOÓ MUNGÚ guri báy, «Ahaá waáy gár adór tí mas sagadiyusmoowók i tlehhít. Ahaá aníng mis sla'aká, ahaá mustu sla'aatamisiiká nee aníng, ahaá misa huwár iiloóí tsa/ás ar mukók amohhe'eemis?

¹² Ahaá heé mukwí gwaa tleehh a anínge, ahaá mukwí aníng una laqwaáli, tam iri beér, mukwí loohiseek gawaá da/eewór ale adór /ameenír na/oó qawrír loohiis, as ngiwa huuw baraá yaamuudá' kuúng taa lo'ór wa /ák kiwa hanis dír baabi'ii'ín?

¹³ Fu'unaá mukwí yaariír sleémeero ngur /aymiis dír ngiwa slaw a diimá? Asma hamí inooín daxta i /aa/aminá' dír geeraaeé' wa ale, tawa kaahi, ‹Qwaláng, fu'unaá /ayma slawang.›

¹⁴ Mukwí sleémeero aníng /aymisiro u aleeslawaaká, gadiyeérí dir'eene ka ló'wa gawit!

¹⁵ Ala barnaxes adoorí an adór kuúng ta aníng i tlehhit a tsiní bar iga gás. Ala barnaxés kuúng aníng iga gurií bá/, kaangwí oo slahh'amaaye muwa araa'ár.»

¹⁶ Naagáy AAKOÓ MUNGÚ Mose guri báy, «Bariisér múk Israeli ar mibeeri faanqw burumbuurang, tidá' ta ilaiwawa/i nee ta slai geeraharuusér wa ale. Huwang dír heémár Mungú, ta sihhiiti bihhaawók i ale.

¹⁷ Aníng ni yaamií aweér, aníng nee kuúng nari axweesaán, nee qeeruudá' naa dirók i haniís un bahh ar tláw nguri dir'ín i haniís. Inooín nee kuúng mukwí ku al'amohhe'eemisá', huwaarí ma kilók loohisaar.

¹⁸ Nee muu ku beer, ti kiloohúng hheehhe'eese' as matlo, nee fu'unaay i /agá'. Asma kuungá' AAKOÓ MUNGÚ una /aa/amiindé' tawa katé', ‹Ís hee hamí adór fu'unaay ngir slay! Atén tawa baraá yaamaá Misrír diriaan ti slaqo hhó'.› Ala hamí daxta AAKOÓ MUNGÚ fu'unaay ngi sláy, kuungá' kiri /agá'.

¹⁹ Kuungá' fu'unaay in /agá', ala a looár wák kilooseeká, laqaá deelo tsareeká, laqaá kooaneeká, laqaá mibaangooká, laqaá mibeeri tsareeká.

²⁰ Ala in /aa/agá' slahhángw doori kuri gwangwar'á', ay dír ni dungér ti'imitiya', nuri mune ayá'. Adoorí in tleehharút asma AAKOÓ MUNGÚ kuungá' ugwa sié', kudá' baraá tla/angwhúng i dirií', nee tawa geeraawós wa /aa/amiindé' tawa katé', ‹Ahaá waáy mista duúx baraá yaamaá Misrír wa alé.› »

²¹ Ala Mose AAKOÓ MUNGÚ guri bay, «Faarór múk ni geerahaar a kume tsiire lahhoó', múk ya'aaine hi'iimiít, nee kuúng a kat, ‹Fu'unaá bu'uutá' slahhángw wake ngi sláw.›

²² Axáy bee/ángw bu'uút oo ta tsu/i nee hikwaawo iqo dayá'a? Siyoó bu'uút oo baraá tlawi kun ohiína as inooín?»

²³ AAKOÓ MUNGÚ Mose guri mu/aywaáts, «Ahaá aleesleemueé' aa /aarúyí? Gimáy daxta axweesante'eé' adór tar ló' laqaá lama a tsáhh.»

²⁴ Naagáy Mose iri tláy axweesantadár AAKOÓ MUNGÚ gari oó' dír muu, nee bariisér mibeeri faanqw gari tsawaár tla/ángw geeraharuuseero, gari sihhtís heéma ngiwa harweeriya'.

²⁵ Nee AAKOÓ MUNGÚ iri aweér ar gawaá huunki, iri axweés nee Mose. Nee qeeru bahh'ale kudá' aáng aa Mose i haniís guri taataáhh, guri haniís dír bariiseedár mibeeri faanqw, qoomár qeeruuwí iwa gawaaín i iwiít, bariiseedá' tari aariirín, ala aariro taa malé ki/iiká.

²⁶ Baraá tla/ángw bariiseedá' mibeeri faanqwe bariisér tsár i káhh, a Eldadi nee Medadi. Inooín tana meét baraá xafaay, qoomár bariisér hatlá' iwa baraá heémár Mungú. Qeeru gina baraá xafáy áy iri gawaaín i iwiít, nee inooín tari aarín baraá xafaydá' wa ale.

²⁷ Garmoó wák ina ta'aaín, Mose guri báy, «Eldadi nee Medadi ta aariirín baraá xafáy wa ale.»

²⁸ Qoomaarihe Yoshua, garmoó Nuni kuduú alee/isusmoó Mose iimír tawa masoomo, Mose guri báy, «Aakooeé', inooín ilaa/eek!»

²⁹ Ala Mose guri mu/aywaáts, «Ahaá gár kuúng da/i usa ót a milá as aníng? Hamí geera a tsiní AAKOÓ MUNGÚ mukós sleémeero burngwa qeeruuwós i haniís nee tari aaruuse.»

³⁰ Naagáy Mose nee bariiseedár mibeeri faanqw ar múk Israeli tari kií/ baraá xafaay.

Mungú xooyaangw nguwa huúw

³¹ Aluuwo AAKOÓ MUNGÚ fur'a ngiri fukuku'uús ar gaanslaay, xooyaangw nguri húp baraá tlawtá wa ale, nee iri huuhu'ún bihhaá xafaay. Yaamaá xooyaangwí aa alqaát bartí wa tleemu ay tiqá', a adór aa'aá hee awa looár wák, baráy wa tleemu ay gawa tlenaango a miíta wak.

³² Naagáy muu xweera gina tlatla/aangw tleéhh as tawa xooyángw burumburin, umuú heewo oo kílo kumuú wák gaa ayká i kaahh, kuri intláh bihhér xafay'ín as kuwa kahaasi.

³³ Ala qoomár fu'unaá yaariir niwa kumiitiya' nee dír fu'unaydá' ngira faaki'iiká /aymaro, AAKOÓ MUNGÚ muu guri slaáhh ar slahhtá ur.

³⁴ Gawaá adoorihe didá' kari bay Kibrot-hata'afa asma múk haayír fu'unaá koóm kuna didií foliít.

³⁵ Muu iri tláy Kibrot-hata'afár wa ale ay Haseroti.