FAARO 10 - Biblía Axweesantá Hhohho' ar Mungú 2004

Tarumbeétár taa tleéhh ar muqslaadár peésa

¹ AAKOÓ MUNGÚ Mose guna báy,

² «Tarumbeetadaá tsár awa muqslaadár peésa kwahhuteek. Tarumbeétarí an ufhhaán qoomár bar múk ateetiín, nee qoomár bar ta xafoó fe/iit as tawa loohi.

³ Tarumbeéta tsaraawo barka al'ufaáhh dinkwaárí ale, muu sleémeero i burumburiiti dír geeraawók, bihhaá heémár Mungú.

⁴ Ala tarumbeétár wák kilós barka ufaáhh, geeraharuusér tlahh'aá Israeli ni hardát dirók i ale.

⁵ Tarumbeéta bara ufáhh a layár tleemu, mukduú baraá xafaay oo bihhaá da/aáw loohaay ngu iimu/une'.

⁶ Tarumbeéta bara sagaáwa tsár wa ufáhh, mukdaáduú xafay'ín bihhaá basa loohaay ngu iimu/une'. Layaarír tarumbeéta ufahhaangw ka tleehhi qoomár bar loohoó iimu/u/uundá'.

⁷ Ala qoomár barnaxes a múk dinkwaárí ateetindá', tarumbeéta ka ufaahhi ar afór muu iwa kwislitiiká.

⁸ Kaahamuusér Mungú daaqoó kaahamusmo Aroni an múk tarumbeéta ga ufahhaám. «Adoorí ka eehari baraá qari sleémeero.

⁹ Qoomár bar slaqwara baraá ayahunge naa ti'ít tla/ángw kuungá' nee wakuuserhúng, tidá' kuungá' nu baramaanuus, layár slaqwara ka laqaandá' ar tarumbeéta ufaahha as AAKOÓ MUNGÚ, Munguúhúng nuwa inslay nee nuri ba/amis dír wakuuserhunge.

¹⁰ Sleeme adoorí tleehhaak qoomár bar baraá qwal/amaaye, adór deelór ur bál slahhaangw birna ti'iít, nee deelór ur ar hatlá' ar ta tleehhamór wa sla'a', tarumbeéta ufahhaak qoomár bar ilahhooár da/aa/ángw hanmisá', nee ilahhooár wayda ar muruú ta tsu/i. Daqaní diirihe anuú Munguúhúng nun insláw. Aníng an AAKOÓ MUNGÚ, Munguúhúng.»

Múk Israeli iwa lóh

¹¹ Bál slahhángw tsár tawa mibeeri tsár oo kurkú tsar iimír múk Israeli niwa baraá yaamaá Misrír wa ti'iít, huunkiidár gawaá heémadár lamabu'uungw ina gáwtí tleér,

¹² nee múk Israeli loohaay guri iimu/ún amór xaanxoó Sinai wa ale. Huunkidá' iri sihhít baraá xaanxoó Parani.

¹³ Gaarí an wa'aá' geera awa múk Israeli loohaay nguwa iimu/uné' ar adoodá' AAKOÓ MUNGÚ Mose ngura hara'ayín.

¹⁴ Mukdá' dír bendeerár taa qaás as tlahhoó Yuda tana giirín tleemuuwo ar bohhu. Geeraharusmoó bohhuuká' a Nashoni garmoó Aminadabu.

¹⁵ Netaneli garmoó Suari, an geeraharusmoó múk tlahhoó Isakari.

¹⁶ Nee Eliabu garmoó Heloni, an geeraharusmoó múk tlahhoó Sebuluni.

¹⁷ Naagáy heémadá' kari yaamií daáhh, nee múk guruú doó Gershoni nee oo guruú doó Merari, ngiri gagaariyé' niri tlayé'.

¹⁸ Aluudae mukdá' dír bendeérár taa qaás as tlahhoó Reubeni, tari tláy ar bohhu. Geeraharusmooín a Elisuri garmoó Shedeuri.

¹⁹ Shelumieli garmoó Suri-shadai, a geeraharusmoó tlahhoó Simeon.

²⁰ Nee Eliasafu garmoó Deueli, a geeraharusmoó tlahhoó Gadi.

²¹ Aluuwo múk guruú doó Kohati xosluudá' hhoohhoo' ngina gagaariyé' tari tláy, tawa hardihi heémadá' kikiaro kaa hhe'eés.

²² Aluudae mukduú dír bendeérár taa qaás as tlahhoó Efraimu tari tláy ar bohhu. Geeraharusmooín a Elishama garmoó Amihudi.

²³ Gamalieli garmoó Pedasuri a geeraharusmoó tlahhoó Manase,

²⁴ nee Abidani garmoó Gideoni, an geeraharusmoó tlahhoó Benyamini.

²⁵ Alhhe'esaywo mukduú dír bendeérár taa qaás as tlahhoó Dani tana tláy. Inooín an xumuuse alaá bohhu sleémeerowo. Kuká' geeraharusmooín an Ahieseri garmoó Amishadai.

²⁶ Pagieli, garmoó Okrani a geeraharusmoó tlahhoó Asheri.

²⁷ Nee Ahira garmoó Enani a geeraharusmoó tlahhoó Naftali.

²⁸ Adoorí an digir wakeetíngw taa eehár nee múk Israeli ar adoodá' bohhuuín i dirii'iya', umuú daqto bar ta xafay'ín fe/iit, bar ta lolohín.

²⁹ Mose kumbu'uuwós, kudá' ta bay Hobabu garmoó taatoó hareerós Reueli, heé Midianír daáhh guna báy, «Atén a aa'aá kawaán amoodá' AAKOÓ MUNGÚ atén tiwa báy, ‹Yaamuudá' ngi kuungá' i haniís.› Gimáy góh ti alkoomaán, atén kuúng u adór hhoó' i tleehhaán, asma AAKOÓ MUNGÚ diihhooa gaa al'axweés dír múk Israeli.»

³⁰ Ala Hobabu Mose guri báy, «Aasla'áy, aníng nee kuungá' ti alkoomanaaká, ala aqo an kií/ baraá yaamuueé' nee amór hhaee'eé'.»

³¹ Mose guri báy, «Gám na'amaamís miti geexawaar, asma kuúng dír atén xafaay kway tleehhaan baraá xaanxaywo a xú', nee kuúng a iltarén.

³² Slamí atén birta alkoomaán nee kuúng tidá' hhoo' AAKOÓ MUNGÚ ni atén i tleehhi an tidá' atén ni dirók i tleehhaan.»

Aai i iimu/u/uuná'

³³ Naagáy tari tláy didár tloomár AAKOÓ MUNGÚ wa ale, deelo tám ta baraá aai, sandakmoó alqadór AAKOÓ MUNGÚ ku geeraaín wa loohiis deelo tám as dír xafay'ín kuy tleehhi kawa laqan.

³⁴ Huunkír AAKOÓ MUNGÚ i gawaaín i dirí' iimír tawa tláy dír xafaywo.

³⁵ Umuú daqto qoomár sandakmo bur ku ar tlatláy Mose in ooi, «Aá AAKOÓ MUNGÚ, tlawáng wakuuseerók diya/eek, nee kudá' u ahhiitá' i geeraawók wa guwiye'.»

³⁶ Nee umuú daqto bar sandakmo aa sihhiít, Mose in ooi, «Aá AAKOÓ MUNGÚ, mukók kwí oo Israeli oo kumér yaariir i ki/eek.»