FAARO 1 - Biblía Axweesantá Hhohho' ar Mungú 2004

Faarór geera ar múk Israeli

¹ Bál slahhángw tsár tawa wak oo kurkú tsár iimír múk Israeli tindiwa baraá yaamaá Misri wa ti'iít, AAKOÓ MUNGÚ ina axweés dír Mose baraá heémadár Mungú wa ale, baraá xaanxoó Sinai, iwa kaahi,

² «Kuungá' dinku'uuma sleémeero ar múk Israeli faaraak, umuúqo guruú do'o nee tlahhay'ín nee umuúqo ságw hhawaatuwo faaraak.

³ Mukdaádá' sleémeero baraá Israeliwo oo afiqoomár slaqwara gaa ay, oo kureerii'ín mibeeri tsár ngaa aye', nee ngaa ba/iye', inooín ki qoomesá' baraá daqooráy.

⁴ Nee hhawaatuú wák baraá umuúqo tlahhaywo masók a dinkwa nee kuungá', kuduú geeraharusmo baraá guruú doó baabuúwose.

⁵ Mukdá' kuúng u alee/iís a kwí: Tlahhoó Reubeniwo, a Elisuri garmoó Shedeuri.

⁶ Tlahhoó Simeoniwo, a Shelumieli garmoó Suri-shadai.

⁷ Tlahhoó Yudawo, a Nashoni garmoó Aminadabu.

⁸ Tlahhoó Isakariwo, a Netaneli garmoó Suari.

⁹ Tlahhoó Sebuluniwo, a Eliabu garmoó Heloni.

¹⁰ Baraá daaqoó Yosefuwo, tlahhoó Efraimuwo, a Elishama garmoó Amihudi. Tlahhoó Manasewo, a Gamalieli garmoó Pedasuri.

¹¹ Tlahhoó Benyaminiwo, a Abidani garmoó Gideoni.

¹² Tlahhoó Daniwo, a Ahieseri garmoó Amishadai.

¹³ Tlahhoó Asheriwo, a Pagieli garmoó Okrani.

¹⁴ Tlahhoó Gadiwo, a Eliasafu garmoó Deueli.

¹⁵ Tlahhoó Naftaliwo, a Ahira garmoó Enani.»

¹⁶ Mukwí an geeraharuuseedá' taa tsawaár dír tla/ángw múk Israeli sleémeero. Inooín an adór geeraharuusér uren baraá tlahh'ii'ine nee baraá gur'ér maraá baabi'ii'ine.

¹⁷ Mose nee Aroni mukwí ta ume aaín nguri ar tlayé',

¹⁸ nee bál slahhángw tsár tawa wak, mukdaádá' sleémeero taa faár kuri burumbuúr umuúqo heewo adoodá' múk do'ós i dirii'i. Iimír heé kureeriiwós mibeeri tsár ngaa aye' nee ngaa waarahhiye', inooín kiri wakeetín faarooro,

¹⁹ adoodár kilá' Mose kura hara'ayín nee AAKOÓ MUNGÚ. Mose mukwí guna faár baraá xaanxoó Sinaír wa aleeró.

²⁰ Múk tlahhoó Reubeni garmoó baris oo Israeli, ar adór xwaylar'ine tira haraahariyé' nee adór maray'ine i dirii'iya', nee adór gur'ér maray'ín i diria, nee adór umer'ín i diria, adoodá' kira wakeetín faarooro, umuúqo hhawaatuuwo oo kureeriiwós mibeeri tsár ngaa aye' nee ngaa ba/iye', múk slaqwara eemuwo ido,

²¹ dinkwaaro a muu kume mibeeri tsiyáhh nee lahhoó' nee tsiire kooán.

²² Múk tlahhoó Simeon ar adór xwaylar'ine tira haraahariyé', nee adór maray'ine i dirii'iya', nee adór gur'ér maray'ín i diria, nee adór umer'ín i diria, adoodá' kira wakeetín faarooro, umuúqo hhawaatuuwo oo kureeriiwós mibeeri tsár ngaa aye', nee ngaa ba/iye', kudá' slaqwara eemuuwo ido,

²³ dinkwaaro a muu kume mibeeri kooán nee gwaleél, nee tsiire tám.

²⁴ Múk tlahhoó Gadi ar adór xwaylar'ine tira haraahariyé', nee adór maray'ine i dirii'iya', nee adór gur'ér maray'ín i diria, nee adór umer'ín i diria adoodá' kira wakeetín faarooro, umuúqo hhawaatuuwo oo kureeriiwós mibeeri tsár ngaa aye' nee ngaa ba/iye', mukdá' slaqwara eemuuwo ido,

²⁵ dinkwaaro a muu kume mibeeri tsiyáhh nee kooán nee tsiire lahhoó' nee mibeeri kooán.

²⁶ Múk tlahhoó Yuda ar adór xwaylar'ine tira haraahariyé', nee adór maray'ine i dirii'iya', nee adór gur'ér maray'ín i diria, nee adór umer'ín i diria, adoodá' kira wakeetín faarooro, umuúqo hhawaatuuwo oo kureeriiwós mibeeri tsár ngaa aye' nee ngaa ba/iye', múk slaqwara eemuuwo ido,

²⁷ dinkwaaro a muu kume mibeeri faanqw nee tsiyáhh nee tsiire lahhoó'.

²⁸ Múk tlahhoó Isakari ar adór xwaylar'ine tira haraahariyé', nee adór maray'ine i dirii'iya', nee adór gur'ér maray'ín i diria, nee adór umer'ín i diria, adoodá' kira wakeetín faarooro, umuúqo hhawaatuuwo oo kureeriiwós mibeeri tsár ngaa aye' nee ngaa ba/iye', múk slaqwara eemuuwo ido,

²⁹ dinkwaaro a muu kume mibeeri kooán nee tsiyáhh nee tsiire tsiyáhh.

³⁰ Múk tlahhoó Sebuluni ar adór xwayla'ine tira haraahariyé', nee adór maray'ine i dirii'iya', nee adór gur'ér maray'ín i diria, nee adór umer'ín i diria, adoodá' kira wakeetín faarooro, umuúqo hhawaatuuwo oo kureeriiwós mibeeri tsár ngaa aye' nee ngaa ba/iye', múk slaqwara eemuuwo ido,

³¹ dinkwaaro a muu kume mibeeri kooán nee faanqw nee tsiire tsiyáhh.

³² Múk tlahhoó Efraimu garmoó Yosefu ar adór xwaylar'ine tira haraahariyé', nee adór maray'ine i dirii'iya', nee adór gur'ér maray'ín i diria, nee adór umer'ín i diria, adoodá' kira wakeetín faarooro, umuúqo hhawaatuuwo oo kureeriiwós mibeeri tsár gaa aye' nee ngaa ba/iye', múk slaqwara eemuuwo ido,

³³ dinkwaaro a muu kume mibeeri tsiyáhh nee tsiire kooán.

³⁴ Baraá tlahhoó Manasewo garmoó Yosefu ar adór xwaylar'ine tira haraahariyé', nee adór maray'ine i dirii'iya', nee adór gur'ér maray'ín i diria, nee adór umer'ín i diria, adoodá' kira wakeetín faarooro, umuúqo hhawaatuuwo oo kureeriiwós mibeeri tsár ngaa aye' nee ngaa ba/iye', múk slaqwara eemuuwo ido,

³⁵ dinkwaaro a muu kume mibeeri tám nee tsár nee tsiire tsár.

³⁶ Múk tlahhoó Benyamini ar adór xwaylar'ine tira haraahariyé', nee adór maray'ine i dirii'iya', nee adór gur'ér maray'ín i diria, nee adór umer'ín i diria, adoodá' kira wakeetín faarooro, umuúqo hhawaatuuwo oo kureeriiwós mibeeri tsár ngaa aye' nee ngaa ba/iye', múk slaqwara eemuuwo ido,

³⁷ dinkwaaro a muu kume mibeeri tám nee kooán nee tsiire tsiyáhh.

³⁸ Múk tlahhoó Dani ar adór xwaylar'ine tira haraahariyé', nee adór maray'ine i dirii'iya', nee adór gur'ér maray'ín i diria, nee adór umer'ín i diria, adoodá' kira wakeetín faarooro, umuúqo hhawaatuuwo oo kureeriiwós mibeeri tsár ngaa aye' nee ngaa ba/iye', múk slaqwara eemuuwo ido,

³⁹ dinkwaaro a muu kume mibeeri lahhoó' nee tsár nee tsiire faanqw.

⁴⁰ Múk tlahhoó Asheri ar adór xwaylar'ine tira haraahariyé', nee adór maray'ine i dirii'iya', nee adór gur'ér maray'ín i diria, nee adór umer'ín i diria, adoodá' kira wakeetín faarooro, umuúqo hhawaatuuwo oo kureeriiwós mibeeri tsár ngaa aye' nee ngaa ba/iye', múk slaqwara eemuuwo ido,

⁴¹ dinkwaaro a muu kume mibeeri tsiyáhh nee wák nee tsiire kooán.

⁴² Múk tlahhoó Naftali ar adór xwaylar'ine tira harahaariyé', nee adór maray'ine i dirii'iya', nee adór gur'ér maray'ín i diria, nee adór umer'ín i diria, adoodá' kira wakeetín faarooro, umuúqo hhawaatuuwo oo kureeriiwós mibeeri tsár ngaa aye' nee ngaa ba/iye', múk slaqwara eemuuwo ido,

⁴³ dinkwaaro a muu kume mibeeri kooán nee tám nee tsiire tsiyáhh.

⁴⁴ Mukwí an kudá' Mose nee Aroni taa faár, nee kina alee/iimiís nee geeraharuuseedá' mibaá nee tsár ar xoorór Israeli, umuú geeraharusmoowo ina sihhiít as daanduú tlahhaywós.

⁴⁵ Gawaá adoorihe hhawaate sleémeero baraá xoorór Israeliwo awa kureeri'ín mibeeri tsár ngaa aye' nee ngaa ba/iye', kudá' slaqwara eemuuwo ido,

⁴⁶ dinkwaaro sleémeero a kume tsiire lahhoó' nee tám, nee tsiire kooán nee mibeeri kooán.

⁴⁷ Ala múk tlahhoó Laáwi kwa harafaariiká dinkwa nee tlahhi'iidaá hatlá'.

⁴⁸ Asma AAKOÓ MUNGÚ Mose guna báy,

⁴⁹ «Múk tlahhoó Laáwi mu faaraar nee sleeme faaror'ín ma dahaasaar baraá faarór múk Israelírí alé.

⁵⁰ Ala múk tlahhoó Laáwi qaaseek heémár lamabu'uungw ngiwa amohhe'eemisiya', nee xooslarós sleémeero nee umuúqo gár baraadií diriia. Inooín heémadá' ngin gagariná' nee xooslaarós sleémeero, nee nin baraadá' wa gadiyuusiyá' nee xafay'ín kun tleehh as kuwa heémár harweeri.

⁵¹ Slám qoomár barnaxes a heémár tu/uundá' gadiyeésíng ar múk Laáwi, nee qoomár bar heémár tlehhitá', gadiyeésíng ar múk Laáwi, nee barnaxes heé tlahhoó Laáwiwooká aa bihhaadií tseewúy aqo kun gaas.

⁵² Múk Israeli oo hatlá' sleémeero xafay'ín ngu tleehhiye' ar daqooráy, didá' bendeérár dooín kay siíhh.

⁵³ Ala múk Laáwi xafay'ín ngu tleehhiye', ngu harweeriye' ar heémár lamabu'uungw, as heémaadá' ngiwa xuna' hee mingiwa i tseewúy aníng iri buhhtis daanduú múk Israeliwo. Naagáy múk tlahhoó Laáwi heémarír lamabu'uungw ngin amohhe'eemisiyá'.»

⁵⁴ Gawaá adoorihe múk Israeli adoodá' AAKOÓ MUNGÚ Mose ngura hara'ayín ngiri tleehhiyé'.