ESTA 9 - Biblía Axweesantá Hhohho' ar Mungú 2004

Múk Yahudi wakuuser'ín kawa hhaamiís

¹ Bál slahhángw mibaá nee tsár kudá' ta bay Adari tawa mibaá nee tám, iwa xeér, an baalaadár hara'ayár waawutmo kawa boo/eesi, wakuusér múk Yahudi gana harahhíf múk Yahudi nguwa bal, naxés ado ina warqeér, wakuuseedá' kari baál baalaadár kilae.

² Baalaadae múk Yahudi tana burumburiít baraá gixsaduuín awa baraá ayeemo sleémeero awa waawutmo Ahasuero, as mukdá' inooín gi slahh'eemisuú wa slaá' kuwa i haratlay. Tam heé inooín gaa tlampa'aas i kaahh, asma muu sleémeero inooín gina da'ayuút.

³ Múk urén oo ayeemo sleémeero, nee geeraharuusér slaqwaruuse, nee ga/awuuse nee sagadiyuusér waawutmo, múk Yahudi nguna alee/iisiyé', asma Mordekai nguna da'ayutiyé'.

⁴ Asma Mordekai a heé úr doó waawutmoowo, nee xirfuuwós ina xu'utiít baraá ayeemo sleémeero, asma aleesleemuú Mordekai ina ak doogiigín.

⁵ Naagáy múk Yahudi wakuuser'ín kari muúx sleémeero ar paangadu nee kay tsuú/, nee kiri hhaamiís. Múk Yahudi adoodá' i slai gana tleéhh dír mukdá' inooín ngaa aahhiye'.

⁶ Tam baraá gixsár ur ar Susaro múk Yahudi múk tsiire kooán guna tsuú/ nee ngiri hhaamiisiyé'.

⁷ Múk hatlá' oo taa tsuú/ a kwí: Parshandata nee Dalfoni nee Aspata,

⁸ nee Porata, nee Adalia nee Aridata,

⁹ nee Parmashta, nee Arisai, nee Aridai, nee Waisata.

¹⁰ Mukwí an daaqoó mibaangw oo Hamani garmoó Hamedata, wakusmoó múk Yahudi, ala muruuín kwaa haasaáng wa hayohiiká.

¹¹ Baalaadár kilae waawutmo kuri faarór mukdá' taa tsuú/í huúw baraá gixsár Susa wa alé.

¹² Waawutmo waawuto'o Esta gari báy, «Múk Yahudi muu ngwa tsu/iyé' tsiire kooán baraá gixsarí ur ar Susaro, dinkwa nee daaqoó mibaangw oo Hamani. Xáy, gár ta tleehhi a milá baraá ayeemaá hatlá' naa meetiye' awa waawutmoowo? Firoorók a milá? Kiíng ti qáy. Gár ta sla' a milá aáma? Tam tlaqtá waawuti'iima kingi haniis.»

¹³ Naagáy Esta iri ó', «Waawutmo birngi slaa', áx múk Yahudi kuduú baraá Susa ku pa/ángw i haniisi matlo, as adoorí laarí taa tleéhh kawa tleehhi, nee daaqaysíng mibaangw oo Hamani ku tarerein gawaá xaai.»

¹⁴ Waawutmo adoodá' gari oó' kawa tleehhi, afo gari ilahariís baraá Susa, daaqaydá' mibaangw oo Hamani kuri tarereín.

¹⁵ Bál slahhángw mibaá nee tsár kudá' ta bay Adari tawa mibaá nee tsiyáhh, múk Yahudi kuduú baraá gixsár Susa tari burumburiít, múk tsiire tám kuri tsuú/ baraá gixsár Susaro. Ala muruuín ngwaa haasaáng wa ar tlay'iiká.

¹⁶ Múk Yahudi oo hatlá' oo baraá ayeemaá waawutmoó hootá' tana burumburiít slafingw'ín nguwa xuna', amohhooa kay sláy dír wakuuser'ine, kudá' inooín ngi ahhiitá' kina tsuú/ muu kume mibeeri faanqw nee kooán, ala baraá muruuine gár taa haasaáng wa ar tláy i káhh.

¹⁷ Adoorí iwa tleehharút a slahhángw mibaá nee tsár kudá' ta bay Adari tawa mibaá nee tám, nee bál mibaá nee tsiyáhh ar slahhaangwí tana hungu/uús, kay deelór muruú /ayma nee qwala/ tleéhh.

¹⁸ Ala múk Yahudi kuduú baraá gixsár Susa, tana burumburiít bál slahhaangw tawa mibaá nee tám nee tawa mibaá nee tsiyáhh. Aluuwo bál mibaá nee kooán, tana hungu/uús, baalaadá' kay deelór ur ar muruú /ayma nee qwala/ tleéhh.

¹⁹ Gawaá adoorihe, múk Yahudi kuduú baraá ayeemo nee baraá gixsadaá koo/ír gawit ngi kooma'aaká, deeloorí kana óh, ar mibaá nee tsiyáhh slahhángw Adari, tawa deelór muruú /ayma nee qwala/ nee deelór tiwa qeemií ya/abitiya'.

Deelór ur ar ta bay Purimu

²⁰ Naagáy Mordekai kaangwí gway gooín, inós barwadu gay ya/aáw amór múk Yahudi kuduú baraá ayeemo sleémeero awa baraá waawuti'iimár waawutmo Ahasuero, kudá' tsewen nee awa sawene,

²¹ as muu nguwa ádbáy kahhó' bál mibaá nee tsiyáhh nee bál mibaá nee kooán ar slahhángw Adari kawa inslaslay umuúqo kurko.

²² Asma deeloorí an deelór múk Yahudi amohhooa ngiwa slayé' dír wakuuser'ine, nee an slahhángw gurhaami kawa warqeés tawa qwala/, nee an deelór tsuunqumis kuwa warqeés tawa deelór ur. Múk Yahudi kuna ádbáy deeloorí ngiwa oohiya', ngiwa deelór ur tleehhiya' nee ar qwala/, nee qeemuú dimbadimbé kuwa hanmiisi dír muu nee dír narkuute.

²³ Múk Yahudi adoodá' ngiri ya/ané' ar adoodá' ngira geerií tleehhiyé', nee ar adoodá' Mordekai ngira gooín.

²⁴ Asma Hamani garmoó Hamedata oo Agagi, wakusmoó múk Yahudi sleémeero, ina tsabín múk Yahudi nguwa hhaamisi. Nee tsawdoodá' ta bay Puri gana tleéhh as múk Yahudi nguwa hhaamisi.

²⁵ Ala qoomár Esta iwa amór waawutmoó keér, waawutmo hara'aya gari oó' barwadu kiwa gooin as adoodá' tlaakw Hamani aa qoomeés daanduú múk Yahudiro kawa gawaawós i tleehhi nee daaqaywós kuwa tarereín gawaá xa'ano.

²⁶ Gawaá adoorihe, baalaadá' kari báy Purimu as /aymuuwí ta bay Puri an tsawdo. Asma barwaduuká' Mordekai aa gooín nee as muruuwí múk Yahudi gwaa slay.

²⁷ Múk Yahudi deeloorí tsár gari qaás tawa dawa dir'ine nee dír na/ii'ine, nee dír mukdá' sleémeero aa dir'ín i haragwaa', matawa baloó slaaqaát deeloorí tsár inslaslaango qoomaarós bira xeér, umuúqo kurko, ar adoodá' Mordekai ngira gooín.

²⁸ As kahhó' deeloorí kawa inslaslay nee kawa oohi nee qari sleémeero umuúqo do'o, baraá umuúqo ayko nee umuúqo gixsaro. Tam deeloorír Purimu makawa baloó slaáx nee makawa máy, inslaslaangós miwa alhhe'eesuút dír xwaylar'ine.

²⁹ Aluuwo waawuto'o Esta, dasír Abihaili nee Mordekai kuduú Yahudumo barwiito'ór tsár kari gooín ar aleesleemu sleémeero as deeloorír Purimu kawa gawdeemiisi.

³⁰ Barwadu kina ya/aáw amór múk Yahudi sleémeero kuduú baraá ayeemo sleémeero awa tsiiru nee mibeeri tsár nee faanqw awa waawuti'iimár Ahasuero. Baraá barwadukae múk Yahudi kuna amohhooár i slaá' nee looeema,

³¹ nee as múk Yahudi nee xwaylar'ín deelór Purimu ngiwa harmagaahhiya' ar afiqoomaarós, ar adór dabér gwaawito nee tsuunqumis ngira harmagaahhiyé'. Hara'ayaarí Mordekai kuduú Yahudumo, nee waawito'o Esta ngina ooiyé' dír múk Yahudi.

³² Hara'ayár Esta kaangwí oo Purimu gway gawdés, kway gooín baraá kitaábu.