ESTA 8 - Biblía Axweesantá Hhohho' ar Mungú 2004

Múk Yahudi kwaa ádbáy tiwa harmagaahhiya'

¹ Baalaadae waawutmo Ahasuero waawuto'o Esta gay doó Hamani haniís, kuduú wakusmoó múk Yahudi. Iimír qoomaadae Mordekai kuna ya/aámár i haniís iwa daqaaqay amór waawutmo, asma Esta waawutmo gwaa kángw beér adór Mordekai tar mar'afmoowós.

² Naagáy waawutmo mungaywós kuduú duguno qamiingw gway duúx, kudá' aa dír Hamani wa hayóh, gway dír Mordekai haniís.

³ Esta waawutmo guri male i ilaawáts, tiri kwáhh dír ya'aawós gway harhhehhe'és i hara /aa/amiín, as kahhó' waawutmo adoodá' tlaakw Hamani oo tlahhoó Agagi aa qoomeés daanduú múk Yahudiwo ngiwa hhitin.

⁴ Waawutmo hhartós tidár waawuti'iima tidár sahaábu gari amór Estí looloqoós. Naagáy Esta iri tleér, iri sihhít geeraá waawutmo.

⁵ Iri ó', «Bar waawutmo gaa slaá', aníng bar iga gurií baá/, nee /aymuuwí burku hhoó' dír waawutmoowo, nee aníng bar waawutmo ugwa sla'atís, barwadu ki gooin as barwaduudá' Hamani garmoó Hamedata kuduú tlahhoó Agagi aa gooín as múk Yahudi kuwa hhaamisi kiwa kwahhi.

⁶ Asma adór nir qiitl slahh'amuú amór muk'eé' káw nguwa ga/aw? Adór qitla ngur aleeslaw qwanoó mar'eefooeé' ngur ga/aw?»

⁷ Aluuwo waawutmo Ahasuero waawuto'o Esta nee Mordekai kuduú heé Yahudi giri báy, «Ga/aawaak, Esta aga doó Hamani haniís, inós kwa tarereé', as adoodá' iwa tsabín múk Yahudi nguwa qwaareesi.

⁸ Ala /ayma'aá ta sla'a gooimaak amór múk Yahudi ar umuú waawutmo, dugno ku qasá' ar mungoó waawutmo, asma barwár taa gooín ar umuú waawutmo nee kay dugunií qaás ar mungoó waawutmo, heé warqeesaro ga aleesláw i kaahh.»

⁹ Goouusér waawutmo kay didií ateét siiwadár kilae, slahhángw tám kudá' ta bay Siwani, bál tawa mibeeri tsár nee tám, barwadu' kiri gooín amór geeraharuusér slaqwaruuse, nee ga/awuuse, nee amór geeraharuusér ayeemaá tsiiruú wák nee mibeeri tsár nee faanqw, ar adoodá' Mordekai ngira oó' daanduú múk Yahudiro, umuú ayko nee gooirós, nee umuú xoorooro ar tsifriirós, nee sleeme múk Yahudi ar gooir'ín nee ar tsifrir'ín.

¹⁰ Barwadu kina gooín ar umuú waawutmo Ahasuero, kari dugunií qaás ar mungoó waawutmo, barwadu kay ya/abuusérií haniís tari tsa/án gawaá faras, asma a makaá inslahh ti'iingo, awa tar gadiyumaamisi gadiyér doó waawutmoowo, an kudá' taa laqwaál baraá matla/ángw doó waawutmo.

¹¹ Baraá barwadukae waawutmo, múk Yahudi guna pa/ángw i haniís baraá umuúqo gixsaro tawa burumburiiti as slafingw'ín nguwa xuna', mikiwa tsuú/, laqaá mikiwa hhaamiís nee mikiwa qororo'oós, nee slaqwaruusér xoordu baraá ayeemoowo as inooín mikiwa i haratlay, na/ii'ín nee /ameenar'ine nee daqaari'iimar'ín makawa haasaáng wa ar tláy baraá ayeemo sleémeero awa waawutmo Ahasuerowo.

¹² Adoorí in tleehharút baraá ayeemo sleémeero awa waawutmo Ahasuerowo bál slahhángw mibaá nee tsár bar mibaá nee tám, kudá' ta bay Adari.

¹³ Gooír barwito'oodá' kana ilahaniís baraá ayeemo sleémeero tawa adór hara'ayár waawuto'o, kari oín dír muu sleémeero as múk Yahudi tiwa amohhe'eesi baalaadae as li/aay kuwa bui dír wakuuser'ín.

¹⁴ Naagáy ya/abuuse iri tleér tawa tsa/án gawaá farsuú insláhh ti'iingo oo tar gadiyumamisi gadiyér waawutmowo, amqae kina gaanslár guús kin harakeemiis kiwa tliw/in ar hara'ayár waawutmo. Afoorí sleeme kari ilahaniís baraá gixsár ur ar Susaro.

¹⁵ Aluuwo Mordekai iri dír geeraá waawutmoó wa tláy, tlabaá waawuti'iima ngaa dahaás awa kaloó sirboó/ nee awa /awak, nee slamángw úr gu kón oo sahaábu, nee hiyoó kitaánír hhohho' nee oo kaloó sirdaa/aát. Baraá gixsár Susaro tari tseeamín ar bara/ nee ururu'umisuuwo.

¹⁶ Múk Yahudi gwa/aateema giri sláy nee qwala/ nee bara/ nee ilaiwa/amero.

¹⁷ Nee baraá ayko, nee umuúqo gixsaro, umuúqo dír hara'ayár waawutmo i hardati nee afoorose, múk Yahudi qwala/ gway sláy, nee tay baraá/ nee muruú /aymár úr kway /aáy. Tam múk hatlá' oo yaariír tiri ilaqaamiís nee múk Yahudi, asma múk Yahudi kuna da'ayuumiít.