ESTA 7 - Biblía Axweesantá Hhohho' ar Mungú 2004

Mordekai kuwa uráy haniís nee waawutmo

¹ Naagáy waawutmo nee Hamani tay daqáy muruú /aymaadá' waawuto'o Esta aa amohhe'és kuwa /aymár ay.

² Nee bál tsare inooín tawa xufiiti, waawutmo Esta gari malé yaahaás, gari báy, «Waawutó'o Ésta, firoorók a milá? Kiíng ti qáy. Gár ta sla' a milá aáma? Tam tlaqtá waawuti'iima kingi haniis.»

³ Naagáy waawuto'o Esta iri ilaawáts, iri ó', «Waawutámo, barnaxes iga gurií baá/, aníng gár ni fiririim a slafingw'eé' nee gár ni slaa' a slafíngw muk'eé'.

⁴ Asma atén taa haniís, aníng nee muk'eene as tiwa hhaamisi nee tiwa tsu/i nee tiwa suquy. Alók geeraawo atén tin lawaalér /ameena nee hhawaate tleehh, alók a dir'eéní xasliít, tam adoorihe slahh'amuurén ku alqoomeesiiká nee basloó waawutmo gu sláw.»

⁵ Waawutmo Ahasuero waawuto'o Esta gari báy, «Heesíng a heemá, nee i diimá, kwisíng adoosíng gaa qiitl tleehhamooro?»

⁶ Esta iri ó', «A wakusmo, a tsu/utusmo Hamani, heewí ló'wa tlaákw.» Hamani gura' ma'aay ngway dalaa/iyé' dír geeraá waawutmoowo nee dír geeraá waawuto'ooro.

⁷ Waawutmo niri dír muruú /aymár wa tláy ar xarasleema, iri dáh baraá asalmooduú doó waawutmo, Hamani iri didií meét as slafiingós nguwa firin dír waawuto'o Estawo, asma gaa tsaáhh, adór waawutmo ira tsabín nguwa gár tlaákwí tleehhi.

⁸ Aluuwo waawutmo nay kií/ amór asalmo wa alé ay dír xufta. Qoomaarihe Hamani aa yaamií qaát dír geeraá kitangwdá' Esta i diri', waawutmo iri oó', «Adoorí a adoomá, xáy waawuto'o gan /uurúr oóhi dír geeraaeé' wa alé, slám a baraá doó waawutmo?» /Aymuuwí iwa ti'iít baraá afkú waawutmoowo, Hamani kuri gitsee/a tuuntuúk.

⁹ Aluuwo sagesihhtusmoó úr oo wák oo doó waawutmo, kudá' taa karmúy, ta bay Harbona, iri oó', «Xa'anooko i deer oo tlenaango miíta mibeeri tsár nee tsár, Hamani guna amohhe'eés as Mordekai nguwa gawaadá' i tarereei, kudá' waawutmo gwaa tuu/ ar axweesantós, Hamani gwa sihhtís bihhaá do'ós.» Waawutmo iri oó', «Hamani gawaasíng ti tarere'e'.»

¹⁰ Naagáy Hamani kway gawaá xa'anoodií tarereé', kudá' geeraawo aa amohhe'eés as Mordekai. Buhhtaá waawutmo nay tsauyé'.