ESTA 6 - Biblía Axweesantá Hhohho' ar Mungú 2004

Mordekai kuwa uráy haniís nee waawutmo

¹ Xweeraadae waawutmo gu'ute gwaa otká, sagadiyusmoowós guri ádbáy, kitaábuúdá' taa muruú inslaslángw wa hariímií gooaain nee muruú qom'iiwo kuwa huwi as kuwa dír geeraawós wa soomuusi.

² Naxés baraá kitaábuuwo didá' kana harasliqiít, ar Mordekai kaangw nguwa duxún oo xuumuuseedár afkú doó waawutmo Bigtana nee Tereshi, mukdá' taa karmuumúy iwa waawutmoó gaasár wa slaiya'.

³ Waawutmo iri oó', «Xáy, Mordekai ilaiwa/amér aa sláy laqaá gár kwi haniisaán i deéro baraá kaangwihe?» Lawaaleerós guri beér, «Gár kwi tleéhh i káhh.»

⁴ Waawutmo iri oó', «Heé wa/aameesíng a heemá?» Qoomaadae Hamani i baraá afeenír doó waawutmo, i amór waawutmo káy as nguwa kaángwí ooár ay oo Mordekai nguwa tarereei gawaá xa'anoodá' aa amohhe'eés.

⁵ Naagáy lawaalér waawutmo guri beér, «Heé wa/ameerí a Hamani.» Waawutmo giri báy, «Ni dahi.»

⁶ Hamani iri dáh waawutmo guri báy, «Heé waawutmo i uráy haniisár wa slai gár kwi tleehhi a milá?» Hamani iri baraá muunaáwósí oó', «Heé waawutmo i uráy haniisár wa slai ta aninge a heemá?»

⁷ Hamani waawutmo guri báy, «Kudá' waawutmo i uráy haniisár wa slai,

⁸ ku tlabií huwi kudá' waawuti'iima awa waawutmo aa intsaáhh dahmisuuwo, nee faraásidá' waawutmo ir hi'iimaamiti, tidá' taa saga slamángw waawuti'iimárí dahaás.

⁹ Tlabaadá' nee farasiro ki haniis dír geeraharusmoó úr, kudá' waawutmo i uráy haniisár wa slai ngu tlabaakár tsiitisi, nee guri baraá loohír úr ar oohis nee i hara tseeamin iwa kaahi, ‹Adoorí an adór kwi tleehhi heedaádá' waawutmo aa uráy haniisár wa slaá'.› »

¹⁰ Waawutmo Hamani gway báy, «Tláw ar gaanslaay, tlaba' taataahheek nee farasi ar adoodá' ngira ó', Mordekai adoosíng ti tlehh, kuduú xoorór Yahudi, kudá' afkú doó waawutmoó wa iwaawiít, tam /aymuú wák miwa /aarúy baraá tidá' naa oi.»

¹¹ Hamani tlaba' giri taataáhh nee faraásiro, Mordekai gway tsiitiís nee gway tsa/aás gawaá faraási, tay waaraáhh ar loohír ur ar gixsa, nee i haratseeamín iwa kaahi, «Adoorí an adór kway tleehhi heedaádá' waawutmo i uráy haniisár wa slai.»

¹² Aluuwo Mordekai iri kií/ afkú doó waawutmo. Ala Hamani iri ta'aaín ay amór do'ós, i tsuunqumiis, sagós gwa tuuntuúk.

¹³ Naagáy Hamani hareerós Sereshi nee mulqeerós gay kangwdá' i alki/iít sleémeero kudá' gwa slay. Mukós kuduú sagalooár koóm nee hareerose nguri bayé', «Ala bar Mordekaisíng uray gwaa sláy, slamí inós a heé Yahudi, kuúng a alesleeraaká nee heesíng tiwa tlaampa'asa', kuúng kangók i kaahh.»

Gaasár Hamani

¹⁴ Qoomár tawa baraá axweesántí kahhi, sagesihhtuusér doó waawutmo tidá' taa karmuumúy iri hardát, as Hamani kuwa harakeesi nee kuwa huwi baraá muruú /aymár Esta aa amohhe'és.