ESTA 5 - Biblía Axweesantá Hhohho' ar Mungú 2004

Esta Waawutmo nee Hamani ngiwa dah'ís dír muruú /aymár úr

¹ Bál tám Esta tsitaywós kuduú waawuti'iima gway tsít, iri sihhít baraá afeenidár guruú doó waawutmo, guruuwós guna amór doó waawutmoó xu'ús. Waawutmo aa iwiít gawaá kitaangós kuduú xirif baraá doó waawutmo, guruuwós gwa amór afkú doó xu'ús.

² Qoomár waawutmo Esta ngiwa ár aa sihhít, inós gari gurií baá/, hhartadár waawuti'iima i kon gawaá dakose gari looloqoós amór Esta. Esta iri tseewuúr, hhartadá' gari kwatít.

³ Waawutmo inós gari báy, «Waawutó'o Ésta, kiíng gár ta sla' a milá? Gár ta sla' a milá, aáma? Tam tlaqtá waawuti'iima ngi haniís.»

⁴ Esta iri ó', «Barnaxes waawutmo ngaa slaá', inós nee Hamani ni hardihiye' baraá muruú /aymár tsiindo, kudá' naa amohhe'eés as waawutmo.»

⁵ Naagáy waawutmo sagadiyuuseerós gari báy, «Hamani ni gaanslár hardihi as adoodá' Esta i sla' iwa tleehharut.» Aluuwo waawutmo nee Hamani tari daqáy baraá muruú /aymaadá' Esta aa amohhe'és.

⁶ Qoomár inooín tawa difaáír xufi, waawutmo Esta gari báy, «Firoorók a milá. Kiíng ti qáy? Gár ta sla' a mila? Tam tlaqtá waawuti'iima kingi haniis.»

⁷ Esta iri ó', «Firor'eé' a tí, nee gár ni slaa' a tí,

⁸ bar waawutmo iga gurií baá/ nee tidá' ni firiim birngi haniis, gimáy waawutmo nee Hamani matlo ni malé ki/iye' baraá muruú /aymaadá' ni amohhe'ees as inooín, daqaní aníng gadaádá' ni slaa' ngi oó'.»

Hamani iwa tsabín Mordekai nguwa gaasi

⁹ Hamani baalaadae iri didá' wa tláy ar qwala/, nee qaseengw, ala Hamani Mordekai nguwa dír afkú doó waawutmówí ár aa iwitanángwí xasliít, i diiqiiká qoomár bir waaraahh, iri ló'wa qa/iít buhhtaawo as Mordekai.

¹⁰ Ala Hamani muneerós gari guú/, iri waátl amór do'ós. Mulqeerós gari ateét, nee Sereshi hareerós.

¹¹ Hamani giri yaareemaá daqaari'iimarósí alki/iít, nee daaqaywós oo yaariír nee adoodá' waawutmo nguwa uráy haniís, nee nguwa baalírí haniís daanduú geeraharuuse nee sagadiyuusér waawutmoowo.

¹² Hamani iri kumiít axweesanto iri oó', «Waawuto'o Esta heé hatlá' oo aa dahi'ís baraá muruú /aymár i ale dinkwa nee waawutmo i kaahh, aqo har aníng kilooeé', tam matlo sleeme iga malé dahi'ís dinkwa nee waawutmo.

¹³ Ala tí sleémeero gár iwa bu' a milá, bar Mordekai heé Yahudi in afkú doó waawutmoó wa iwaawiit?»

¹⁴ Naagáy hareerós Sereshi nee mulqeerós sleémeero Hamani kuri báy, «Xa'anoó tleér kungu tleehhi oo miíta mibeeri tsár nee tsár, daqaní matlo matlaatleero waawutmo ku ádbeér Mordekai ku gawaadií tarereei. Daqaní tari dát ar qwala/ baraá muruú /aymár i alé dinkwa nee waawutmo.» Axweesantí Hamani gari slaá', xa'ano guri tleéhh.